Turab Rzayev: "Biz başa düşmürük, bu NATO qüvvələridir, yoxsa Avropanı təmsil edən müşahidəçilər?"
Son iki gündə Azərbaycan Ermənistanı şərti sərhədə qoşun yığmaqda və hücum xarakterli dayaq nöqtələri yaratmaqda ittiham edib.
Ermənistan bu ittihamı rədd edərək, bunu müdafiə xarakterli mühəndislik, möhkəmləndirmə və tikinti işləri adlandırıb. Avropa İttifaqının Ermənistandakı müşahidə missiyası bazar günü və bazar ertəsi sərhəddə hər hansı qeyri-adi hərbi hərəkət müşahidə etmədiyini bildirib.
Azərbaycan Müdafiə Nazirliyi (MN) aprelin 2-də yaydığı məlumatda bildirib ki, bazar ertəsi axşam saatlarında təxminən 20 dəqiqə Ermənistan silahlı qüvvələrinin bölmələri Naxçıvan MR-nın Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan fasilələrlə atəşə tutub.
Bundan bir gün əvvəl isə Azərbaycan MN iddia edib ki, Ermənistan şərti sərhəd boyu qoşun cəmləşdirir və hücum xarakterli dayaq məntəqələri qurur, müxtəlif istiqamətlərdə uzunmüddətli atəş nöqtələri yaradır, fortifikasiya qurğuları inşa edir:
"Yeni inşa edilmiş dəmir-beton fortifikasiya qurğularında Ermənistan silahlı qüvvələrinin artilleriya sistemləri, digər hücum silahları və ağır atəş vasitələri yerləşdirilir".
Azərbaycan MN-ın açıqlamasında deyilir ki, bunlar xüsusi texniki vasitələr və vizual müşahidə ilə qeydə alınıb və bu hərəkətliliyin əks olunduğu iddia edilən videokadrlar yayıb.
Çox maraqlıdır ki, Ermənistan sərhədə açıq şəkildə qoşun, ağır texnika yığır, müharibəyə hazırlıq görür və bütün bunlar videokadrlarla sübuta yetirilir, ancaq güya sərhəddə monitorinq missiyasını üzərinə götürən Avropa Müşahidə Missiyasının səsi çıxmır. Bütün bunlar Missiyanın gözü qarşısında yaşansa da, onlar belə faktın olmadığını deyirlər. Baş verənlərə Missiyanın səsi çıxmırsa, onların əslində funksiyasının heç də obyektiv monitorinq olmadığı tam təsdiqini tapmış olurmu?
Siyasi şərhçi Turab Rzayev "Bakı-Xəbər"ə açıqlamasında bildirdi ki, Avropa İttifaqının bu Missiyasının təyin edilmə səbəbi başından bəri qaranlıq olaraq qalmaqdadır: "Bunu nə Azərbaycan istəyirdi, nə də Rusiya. Ermənistanın özündən daha çox Fransanın diqtəsi ilə yaradılan Missiyadır. Hətta qurum yaradılarkən Azərbaycan buna tam qarşı çıxmaq istəyirdi. Biz kompromis variant kimi buna razılaşdıq ki, tərkib 40 nəfərdən ibarət olacaq və fəaliyyət müddəti iki aydan artıq olmayacaq. Belə qərara gəlindi ki, bizim razılığımız olmadan onun fəaliyyət müddəti uzadılmayacaq. Ancaq biz bunun tam tərsini gördük. Missiyanın sayı artırıldı, hazırda mindən çox üzvü var və fəaliyyət müddəti də qeyri-müəyyən vaxta qədər uzadılıb. Rusiya buna konkret etiraz edir. Çünki Rusiya KTMT müşahidəçilərinin sərhəddə yerləşdirilməsini əvvəlcədən təklif edirdi. Azərbaycan öz növbəsində bütün baş verənlərə konkret etiraz edir. Missiyanın bu cür davranışı onun məqsədi ilə bağlı çoxlu suallar doğurur. Bizə onların əslində nə işlə məşğul olduqları qaranlıq qalır. Artıq neçənci dəfədir sərhəddə təxribat olur, onlar neçənci dəfədir dolğun məlumat təqdim etmirlər. Ən son məlumata görə, Müşahidə Missiyasının tərkibinə: ABŞ, Kanada, Avropa İttifaqına aid olmayan ölkələrdən adamlar əlavə olunub. Halbuki, onun tərkibində yalnız Aİ-yə üzv ölkələrin təmsilçiləri olmalıdır. Biz başa düşmürük, bu NATO qüvvələridir, yoxsa Avropanı təmsil edən müşahidəçilər? Onların tərkibi keçmiş jandarm işçilərindən ibarətdir. Mülki missiyada hərbçilər niyə olmalıdır? Fransa jandarmeriyası ordusunun tərkibinə aiddir. Onların qərəzli münasibəti son hadisələrdə açıq görünür. Əsl həqiqəti gizlədirlərsə, deməli, məqsədləri tam başqadır. Onlar açıq şəkildə Ermənistanı müdafiə edir. Neytrallıq yoxdursa, hansı müşahidədən söhbət gedə bilər? Müşahidə Missiyası özünü Ermənistanı qoruyan ordu kontingenti kimi aparır".
Məhəmmədəli QƏRİBLİ
