Azər Həsrət: "Ani sensasiya dalınca qaçdığımız üçün ermənilərin toruna çox asan düşürük"
Ermənistanın Baş naziri Nikol Paşinyanın sentyabrda növbədənkənar parlament seçkiləri keçirmək qərarına gəlməsi ilə bağlı məlumat təkzib olunub.
Bu barədə Ermənistanın "Baqramyan 26" Teleqram kanalı məlumat yayıb.
Kanal "sensasiyalı" məlumatın 1 aprel zarafatı olduğunu yazıb.
Həmçinin bildirilib ki, bu "zarafat"ı Azərbaycan mediası ciddi sayıb, manşetə daşıyıb.
Doğrudan da bizdə belə hal yaşandı və bundan əvvəl də olub ki, erməni mediasının tirajladığı məlumatı olduğu kimi tərcümə edib veriblər. Ümumiyyətlə, erməni mediasının dezinformasiyslarının toruna düşməmək üçün mediamız iş prinsipində hansı meyarlara önəm verməlidir?
Media eksperti, Əməkdar jurnalist Azər Həsrət "Bakı-Xəbər"ə açıqlamasında bildirdi ki, ümumiyyətlə Ermənistan və onlara yaxın olan bütün media nümunələrinin yaydığı bütün məlumatlara, təhlillərə şübhə ilə yanaşmaq gərəkdir: "Çünki onlar fəaliyyətlərində jurnalistikanın prinsiplərini ayaqlar altına atırlar. Uydurduqları "ağ yalanları" gerçək kimi bütün dünyaya təqdim edirlər. Mən onların Xocalı soyqırımı ərəfəsində yaydıqları məlumatları izləyirdim. Həyasızcasına yazırdılar ki, güya Azərbaycan erməniləri ittiham etmək üçün özü həmin qətliamı törədib. Belə məlumatı yayan mediaya güvənmək olarmı? Onların Paşinyanla bağlı yaydığı xəbəri mən də oxudum və gülüb keçdim. Niyə bunu etdim? Birincisi ona görə ki, buna qədər Paşinyanın istefa verəcəyini şərtləndirən siyasi mühit və hadisə yox idi. Ona görə də iddia tutarlı görünmədi. İkinci tərəfdən, yəqin ki, 1 aprel zarafatı etdiklərini düşündüm. Bir müddət sonra məlum oldu ki, doğrudan da 1 aptel zarafatı olub. Bu məsələdə biz erməniləri yox, özümüzü ittiham etməliyik. Çünki problem bizdədir. Ani sensasiya dalınca qaçdığımız üçün ermənilərin toruna çox asan düşürük. Bizim jurnalistlərimiz, xüsusilə də sosial media fəallarımız diqqətli olmalıdır. Ermənilərin etdiyi nə varsa, sensasiya kimi qəbul edib yaymamalıyıq. 100 dəfə ölçüb-biçmək lazımdır. Mən jurnalistlərimizi və sosial media fəallarımızı buna çağırıram. Jurnalistikanın prinsipləri də tələb edir ki, bir xəbəri ən azı 3 mənbədən təsdiqlətdirmədən yaymaq olmaz. Biz buna riayət etməyəndə, belə vəziyyətə düşmüş oluruq".
Əslində erməni mediası belə xəbəri tirajlamaqla Nikolla sözün əsl mənasında məzələnib.
Bu isə Paşinyanın və erməni mediasının düşdüyü rəzil durumdan xəbər verir.
Ermənistan mətbuatının yaydığı məlumatın məğzi belə idi: "Nikol Paşinyan növbədənkənar parlament seçkilərinin sentyabrda keçirilməsinə qərar verib.
Məlumata görə, bununla bağlı Paşinyan təcili partiya toplantısı keçirib. Azərbaycanın kəndlərin qaytarılması ilə bağlı tələbləri "o qədər artıb" ki, Paşinyan vəziyyəti sakitləşdirmək üçün istefa vermək qərarına gəlib. Baş nazir hesab edir ki, bu, məhz onun "xilas"ıdır. Seçkilər sentyabrın 10-da keçirilməlidir".
İndi özünüz qiymət verin və görün erməni mediası Paşinyanı hansı ciddi mövzu üzərindən ələ salır?..
Məhəmmədəli QƏRİBLİ
