Akif Nəsirli: "Ermənistan hakimiyyəti Qərbə, ABŞ-a üz tutmaqda və Rusiya ilə maliyə, iqtisadi əlaqələri kəsməkdə israrlı görsənir"
Məlum olduğu kimi, martın 30-dan Ermənistanda "Armenian Card" (ArCa) ödəniş sisteminin iştirakçısı olan bankların əksəriyyəti Rusiyanın "Mir" kartlarına xidmət göstərməyi dayandırıb
Rusiya prezidentinin mətbuat katibi Dmitri Peskov Ermənistanda Rusiyanın "Mir" kartlarının istifadəsinin dayandırılmasına münasibət bildirib. Bu barədə Rusiya KİV məlumat yayıb.
Onun sözlərinə görə, Moskva dəfələrlə bir çox ölkələrin ABŞ tərəfindən təzyiqlərə məruz qaldığını bildirib. "Biz erməni dostlarımızla birlikdə amerikalılar tərəfindən bu görülməmiş təzyiqin verdiyi zərərin müzakirəsi və kompensasiyasının yollarını axtarmağa davam edirik", - deyə Kreml nümayəndəsi əlavə edib.
"Ermənistanda Rusiya ilə bütün sahələrdə əlaqələri üzüb atmaq istiqamətində addımlar atılır"
Liberal İqtisadçılar Mərkəzinin rəhbəri Akif Nəsirli "Bakı-Xəbər"ə şərhində bildirdi ki, Rusiya və Ermənistan arasında münasibətlər həm siyasi-diplomatik, həm də iqtisadi baxımdan kəskinləşib.
"Hazırda Ermənistan uğrunda Rusiya və Qərb arasında ciddi mübarizə gedir. Yəni Qərb və Amerika Ermənistanı Rusiyanın caynağından almaq, onun nüfuz dairəsindən çıxarmaq istəyir. Sözsüz ki, bu istiqamətdə siyasi addımların, siyasi cəhdlərin də baş verdiyinin şahid oluruq. Eyni zamanda iqtisadi addımlar da görünməkdədir. Yəni "Mir" kartlarının Ermənistan banklarında xidmətinin dayandırılması da bu istiqamətdə atılan addımlardan biridir və indiyə qədər atılan ən ciddi addım sayılır. Ancaq məsələ burasındadır ki, Ermənistan iqtisadiyyatının böyük əksəriyyəti birbaşa Rusiya hökumətinin nəzarətindədir, ya da rusiyalı biznesmenlərin, iş adamlarının əlindədir. Bu gün Ermənistanın Rusiyanın iqtisadi nüfuz dairəsindən çıxarılması ağlagəlməz dərəcədə inanılan deyil. Amma siyasi hakimiyyət hər halda buna cəhd edir. Düşünürəm ki, Rusiya hələ ki, gözləmə mövqeyində dayanıb. Siyasi məsələləri bir qırağa qoyuram, iqtisadi baxımdan onların situasiyası siçanı ovlayıb sakitcə buraxmış pişiyə bənzəyir. Yəni bəzən görüsən ki, pişik siçanı ovlayır, amma öldürmür, qarşısına qoyub sakit dayanır, siçan da heç bir hərəkət göstərməyib durur, bir müddətdən sonra siçan tərpənən kimi pişik onu qəfil tutur. Yəni onunla oynayır. Rusiya da ancaq oynmaq yox, gözləmə mövqeyi tutur, gözləyir ki, bəlkə Ermənistanın daxilindəki Rusiya yönümlü qüvvələr daha ciddi addımlar ata və hakimiyyəti devirə bilər, bununla da məsələ bitər. Hələ ki, Rusiya Ermənistana iqtisadi baxımdan təzyiq göstərmir. Siyasi təzyiqlər də hələ ki, yumşaqdır, sadəcə olaraq nəsihət xarakteri daşıyır. Rusiya Ermənistanın bu hərəkətlərinə hələ ki, loyal yanaşır.
Sözsüz ki, Azərbaycan-Ermənistan münaqişəsində Rusiyanın loyal mövqe göstərməsi də, məhz Paşinyan hakimiyyətinin Qərbə və Amerikaya üz tutmasının nəticəsdir. Əslində, bununla Rusiya Ermənistanı cəzalandırır. Yəni Azərbaycan qarşısında onu tək qoyur. Çalışır Ermənistan başa düşsün ki, Rusiyasız mümkün deyil"-deyə A.Nəsirli qeyd etdi.
A.Nəsirlinin sözlərinə görə, Rusiyanın onu geri döndərmək cəhdləri gücləndikdə Ermənistan hakimiyyəti də daha çox Qərbə, ABŞ-a yaxınlaşmaqda israrlıdır. "Ermənistan hakimiyyəti Qərbə, ABŞ-a üz tutmaqda və Rusiya ilə maliyə, iqtisadi əlaqələri kəsməkdə israrlı görsənir. Ermənistanda Rusiya ilə bütün sahələrdə əlaqələri üzüb atmaq istiqamətində addımlar atılır"-deyə bildirən A.Nəsirli qeyd etdi ki, buna nümunə olaraq Ermənistanın KTMT-də fəaliyyətini dondurmasını göstərmək olar, ondan əvvəl KTMT-nin İrəvanda keçirilən iclasında protokola Ermənistan imza atmadı. "İndi də Ermənistan Rusiyanın ən məşhur ödəniş sistemini dayandırdı. Bundan sonra yəqin ki, Ermənistan rusiyalı iş adamlarının, Rusiya dövlət şirkətlərinin ölkədən çıxarılması istiqamətində müəyyən addımlar atacaq. Amma bu addımları atanda məsələ bir qədər başqa cür ola bilər. Rusiyanın artıq hərəkətə keçməsi mümkündür. Yəni Rusiya üçün də müəyyən mərhələdə "qırmızı xətt" deyilən bir məsələ var. Amma Rusiya elan etmir ki, onun üçün "qırmızı xətt" hansıdır, Ermənistan o xətti nə vaxt keçə bilər. Yəni belə bir xətt hələ ki, müəyyən etməyib. Amma düşüncələrdə, daxili müzakirələrdə Ermənistanın hərəkətlərində Rusiya üçün "qırmızı xətt" var. Mən elə bilirəm ki, bu "qırmızı xətt" Rusiya iş adamlarının Ermənistan iqtisadiyyatından çıxarılmasına başlanması mərhələsidir. Bəli, Rusiyanı iqtisadi baxımdan Ermənistan hökuməti ölkədən çıxarmağa başlyanda artıq o "qırmızı xətt"i keçəcək və Rusiya buna dözməyəcək. Yəni gözləniləndir ki, Ermənistanın bütün bu hərəkətlərinə görə Rusiya Ermənistana silahlı hücum, ekskalasiya etsin, bununla daxildə hakimiyyəti dəyişsin. Bu, Rusiya üçün çox asandır, bir neçə saatlıq əməliyyatdır. Çünki Rusiyanın Ermənistanın daxilində də kifayət qədər silahlı qüvvələri var, 102-ci baza Gümrüdə yerləşir, eyni zamanda bu ölkənin ətrafında –Abxaziya və Osetiyada da Rusiyanın hərbi bazası mövcuddur. Belə bir şəraitdə Ermənistanın Rusiyadan kənar iqtisadi müstəqilliyinin təmin edilməsi mümkünsüz görünür. Amma buna baxmayaraq, Paşinyan hakimiyyəti bu məsələdə israrlıdır. Görək növbəti mərhələdə hansı addımlar atacaqlar. Hər halda, Ermənistan hökumətinin bu hərəkətləri Qafqazda yeni münaqişə ocağının yaranmasına gətirib çıxara bilər. Qeyd etdiyim kimi, Rusiya Ermənistana silahlı hücum edə bilər"-deyə A.Nəsirli əlavə etdi.
İradə SARIYEVA
