ABŞ-nin Müharibə Araşdırmaları İnstitutunun son araşdırmalarına əsasən, Qərb Ermənistan üçün Rusiyanı əvəz edə bilməz. Qurumun hesabatında vurğulanır ki, bu, xüsusilə Ermənistanın coğrafi mövqeyi ilə bağlıdır.
Rusiya rəsmiləri və müstəqil analitikləri ikitərəfli münasibətlərin pisləşməsinə görə Ermənistana təzyiqləri davam etdirirlər: "Kreml rəsmiləri Ermənistanın Rusiyadan uzaqlaşma cəhdləri ilə bağlı getdikcə daha çox tənqidi bəyanatlar verir".
Qeyd edək ki, son zamanlar ikitərəfli münasibətlər pisləşməkdədir. Ermənistan xarici işlər naziri Ararat Mirzoyan deyir ki, Rusiya ilə münasibətlərdəki problemləri gizlətmək mümkün deyil: "Rusiya ilə münasibətlərdə mövcud olan problemləri gizlətmək mümkün deyil. Biz demokratik ölkəyik və demokratik institutları gücləndirmək istəyirik. Biz görürük ki, məsələn, ABŞ və Avropa İttifaqı əsas tərəfdaşlardır. Biz həmçinin gördük ki, Avropa İttifaqı ölkəmizə daha çox mülki missiya göndərməyə hazırdır və sərhəddə vəziyyət xeyli yaxşılaşıb, onların mövcudluğu regionun bir hissəsində və Ermənistanda sülhə böyük töhfə verir. Ermənistan üçün əlverişli olduğu müddətdə Ermənistan Avropa İttifaqı ilə yaxınlaşmağa hazırdır. Onilliklər ərzində istifadə etdiyimiz təhlükəsizlik mexanizmləri işləmirdi. Ona görə də biz Avropa İttifaqından xahiş etməli olduq ki, gəlib vəziyyəti müşahidə etsin. Biz indi Brüssel və Vaşinqtonla iqtisadi və siyasi əlaqələri dərinləşdiririk. Mən bunu dönüş nöqtəsi adlandırmazdım, biz öz təhlükəsizliyimizi təmin etməyə çalışırıq və bunun üçün Qərbdə yaxşı tərəfdaşların olduğunu görürük". Bütün bunlar Rusiya xarici işlər naziri Sergey Lavrovun açıqlamasından sonra səslənir. Lavrov elə bu günlərdə açıq mətnlə bildirmidşdi ki, Ermənistan bilərəkdən Rusiya Federasiyası ilə münasibətləri korlamağa çalışır. Onun sözlərinə görə, Ermənistanla Rusiya arasında münasibətlərdəki vəziyyət nikbinlik yaratmır: "Ermənistan rəhbərliyi, açığını desəm, işi son üç-üç il yarımın tarixini təhrif edərək, uydurma bəhanələrlə bilərəkdən Rusiya ilə münasibətlərin pozulmasına aparır". Lavrov vurğulayıb ki, İrəvanın bu kursu Gümrüdəki 102-ci hərbi bazada xidmət edən Rusiya hərbçilərinin, sərhədçilərin, eləcə də bütövlükdə Kollektiv Təhlükəsizlik Müqaviləsi Təşkilatının böhtanında özünü göstərir: "İrəvanda xatırlamırlar ki, məhz KTMT çətin vəziyyətlərdə Ermənistanın maraqlarını dəfələrlə müdafiə edib və 2021-ci ildə Azərbaycanla münasibətlərində gərginliyi azaltmaq üçün bu ölkəyə öz sülhməramlı missiyasını göndərməyə hazır olub". Amma Ermənistan bütün bunlardan imtina edib. Baş verənləri şərh edən türkiyəli hərbi ekspert Yücel Karauz vurğulayır ki, Ermənistanın son addımları onun bir dövlət kimi məhv olmasına gətirib çıxaracaq. O, burada Qərbin rolunu da xüsusi qabardıb. Hərbi ekspert bildirib ki, Ermənistanın son hərəkətləri dostyana deyil: "Bir neçə ay əvvəl Ermənistan Azərbaycana toqquşma olmaması üçün ordunun bəlli bir məsafəyə geri çəkilməsi barədə təklif vermişdi. Bu ölkə sərhəd ərazilərə ordu yığmamışdan əvvəl üzünü Qərbə tutaraq, guya Azərbaycanın onlara hücum edəcəyini əsas gətirmişdi. Daha sonra Qərb missiyası sərhəd ərazilərə dəvət edildi. Fikrimcə, Ermənistan Qərblə razılaşaraq bölgədə toqquşma yaratmaq istəyir, həm Rusiyadan canını qurtarmaq, həm də Qərb qüvvələrini ölkəsinə gətirmək istəyir". Y.Karauzun sözlərinə görə, Ermənistan Rusiya ilə müttəfiqliyi dayandırmağa çalışır: "Onlara bu məqsədə çatmaq üçün, başda Fransa olmaqla, Hindistan, zamanla bu tələyə düşən İran silahlanmaqla kömək edir. Bunun nəticəsində Ermənistan uzun illər öz ordusunu bərpa edə bilməyəcəyi üçün Qərbin Qafqazda missiyasını yerinə yetirən bir quruma çeviriləcək. Ekspert "report"a açıqlamasında vurğulayıb ki, Qərbin Ermənistana müdaxiləsinə Rusiya səssiz qalmayacaq: "Bölgə çox sürətlə toqquşma meydanına çevrilməyə doğru gedir. Azərbaycan Ermənistanın istənilən təxribatına həm İkinci Qarabağ müharibəsindəki kimi, həm də antiterror tədbirləri kimi cavab verəcək. Lakin bu toqquşma sadəcə iki ölkə arasında olmayacaq". Ermənistanın "Alternativ Layihələr Qrupu"nun üzvü, Ermənistan parlamentinin keçmiş deputatı Vahe Hovhannisyan da həyəcan təbili çalır: "Ermənistan çirkin mərhələyə qədəm qoyur: bütün anormal-təhlükəli ssenarilər havadan asılıb". Onun sözlərinə görə, Ermənistan növbəti eksperimentin qurbanı olmamalıdır: "Ölkəmizi 99 faiz minalanmış sahədən çıxarmaq üçün bizə savadlı məzmun və effektiv iş formatları lazımdır. Mənim dərin qənaətimə görə, düzgün məzmun deeskalasiyadır. Ermənistanın sərhədlərdə və daxildə deeskalasiyaya ehtiyac var. 5-6 ildir ki, təhlükəli zəhərli mühitdə yaşayırıq. Bu, cəmiyyətimizin birləşdirici ideyasına çevrilməlidir". Ermənistanın "Past" nəşri isə yazır ki, Kreml artıq hərəkətə keçib: "Bu yaxınlarda məlumatlar yayılıb ki, Rusiya Federasiyası bir sıra erməni məmurların və hakim partiya üzvlərinin Rusiya Federasiyasına girişinə qadağa qoyub. Nəşr qeyd edib ki, Ermənistan parlamentinin hakim "Vətəndaş Müqaviləsi" fraksiyasının deputatı Qurgen Arsenyanın, eləcə də digər deputat Qurqen Melkonyanın da adı hallanırdı: "Bundan əlavə, Rusiya Federasiyasının "Qarabağın Soros ictimai təşkilat sektoru"nun aktiv anti-Rusiya fəalı hesab edilən Tiqran Petrosyanın ölkəyə girişinə artıq qadağa qoyduğu barədə məlumatlar var. Məlumata görə, bunlar "hələ gül"dür. Moskvadakı mənbələrimiz bildirir ki, Rusiyada Ermənistanda anti-Rusiya kampaniyasının "aktorları"nı təfərrüatı ilə izləyirlər, kimlərin xüsusilə önə çıxdığını, anti-Rusiya ideyaları yaratdığını və bu istiqamətdə konkret addımlar atdığını araşdırırlar".
Tahir TAĞIYEV
