Qərb Azərbaycana 5 aprel həmləsi ilə 2016-cı ilin qisasını alır...
Sahil Kərimli: "Bizə qarşı yönələn görüşün məhz Aprel döyüşlərinin ildönümünə təsadüf etməsi mesaj ola bilər"
Aprelin 5-də Ermənistanın Baş naziri Nikol Paşinyanın ABŞ Dövlət katibi Entoni Blinken və Avropa Komissiyasının sədri Ursula fon der Lyayenlə Brüsseldə görüşü planlaşdırılır. Görüşün Cənubi Qafqazda siyasi tarazlığa ciddi şəkildə təsir edəcəyi ehtimal olunur.
Vaşinqton görüşün Bakı və İrəvan arasında sülh danışıqlarına aid olduğunu bildirib. Rəsmi İrəvan isə görüşün üçüncü tərəfə qarşı olmadığını deyib.
ABŞ, Ermənistan və AB görüşün Azərbaycana qarşı yönəlmədiyini desə də, bu, Bakının narahatlığını aradan qaldırmır. Ümumiyyətlə, Vaşinqton və Brüssel başa düşməlidir ki, bugünə qədər etdikləri Bakının nəzərində onların etibarını sarsıdıb. Misal üçün, 44 günlük müharibədən sonra Qərb Qarabağda "Kosovo variantı" hazırlayırdı. Bu məqsədlə son 3 il ərzində "Ermənilərin humanitar fəlakəti" bəhanəsi ilə Azərbaycan və şəxsən Prezident İ.Əliyevə qarşı təzyiq kampaniyası aparıldı. Bundan başqa, Azərbaycanda qanunsuz maliyyələşmə ilə yaratdıqları informasiya resurslarını gücləndirirdilər. Bütün bunlar nəticəsiz qaldığından indi açıq şəkildə hərbi planlar qurulur.
Brüsseldə nəzərdə tutulan görüşün vaxtının məhz 5 aprel olaraq seçilməsi təsadüfdür, yoxsa burada bir sətiraltı mesaj var? Çünki Azərbaycan uzun sürən işğal faktı ilə bağlı əsas dönüşü məhz Aprel döyüşləri ilə yaratdı. 2016-cı ilin 2-5 Aprelində 3 günlük müharibə ilə biz düşmənə uzun illərdən sonra öz gücümüzü göstərdik.
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Brüsseldə keçiriləcək görüş birbaşa olaraq Azərbaycana qarşı yönəlib: "Çünki uzun müddətdir ki, ABŞ və Avropa Birliyi Ermənistanın əli ilə Cənubi Qafqazda gedən proseslərə təsir etməyə çalışır. Görüş öncəsi Ermənistanın Azərbaycanla sərhəddə qoşun və silah-sürsat yığması bir çox niyyətlərdən xəbər verir. Onlar Ermənistana çox ciddi dəstək verməklə, onu yeni müharibəyə ruhlandırırlar. Bu ölkəyə açıq şəkildə siyasi və hərbi dəstək verməklə bizə qarşı növbəti işğalçılıq siyasətinə yönəldirlər. Ermənistan 30 ilə yaxın bir müddətdə Azərbaycan ərazilərini işğalda saxladığı dönəmdə də bu dairələr onlara dəstək veriblər. Azərbaycanın 44 günlük müharibədəki qələbəsindən sonra da bu dəstək açıq şəkildə həyata keçirilir. Onun işğalçılıq və separatizm addımlarına böyük dəstək ifadə olunur. Bütün bunlar həmin dairələrin Cənubi Qafqaza nəzarət etmək niyyətinfən irəli gəlir. Ermənistanı bir alət kimi istifadə etməklə, bizə qarşı olan məkrli planlarını həyata keçirirlər. Bu da bölgəmizdə çox ciddi təhlükəli proseslərin baş verməsilə nəticələnə bilər. Azərbaycan həm hərbi, həm də siyasi baxımdan bütün ssenarilərə cavab verməyə hazırdır. Bu gün Azərbaycanın ordusu dünyanın ən gücü silahlı qüvvələri sırasındadır. Biz 44 günlük müharibədə çox çətin əməliyyatları icra edərək, ərazi bütövlüyümüzü təmin etdik. Ermənistan heç kimə arxayın olmasın. Heç bir ölkə gəlib Ermənistanın əvəzindən bizimlə döyüşməyəcək. Bu təxribatın cavabı çox ağır olacaq və Ermənistanın bir dövlət kimi taleyi sual altına düşəcək. Çünki onlar özünü çox təhlükəli oyuna atıb. Təbiidir ki, görüşün vaxtının məhz 5 aprelə salınması təsadüfi deyil. Ola bilər ki, bununla Qərb və ABŞ Azərbaycana sətraltı mesaj vermək istəyir. Çünki Azərbaycanın Ermənistan üzrərindəki ilk qələbəsi məhz 2016-cı ilin 2-5 aprelində oldu. Bizə qarşı yönələn görüşün məhz Aprel döyüşlərinin ildönümünə təsadüf etməsi mesaj ola bilər".
Məhəmmədəli QƏRİBLİ
