Elxan Şıxəliyev: "Ermənistan anklav kəndlərin olduğu Qazax və Kərki istiqamətində təxribat yaradacaq ki…"
Ermənistan rəhbərliyi yenə özünü qeyri-adekvat aparır. Bir tərəfdən sülhdən dəm vurur, digər tərəfdən Azərbaycanla şərti sərhədə qoşun toplayır.
Azərbaycan Müdafiə Nazirliyinin Ermənistan silahlı qüvvələrinin sərhəddə canlı qüvvə və zirehli texnika cəmləşdirilməsi haqda bəyanatı da təsdiqləyir ki, İrəvan yaxın tarixdən dərs çıxarmaq istəmir, Qərbin xəyali dəstəyinə ümid edərək, regionda vəziyyəti gərginləşdirməyə can atır. Ancaq Ermənistan rəhbərliyi və onun havadarları anlamalıdır ki, Azərbaycan əvvəllər olduğu kimi, bu dəfə də istənilən hərbi təxribatın qarşısını qətiyyətlə alacaq.
Müdafiə Nazirliyinin son məlumatı da göstərir ki, XİN-nin Qərbə ünvanladığı xəbərdarlıq əbəs deyil. Ermənilər yenə də illüziyaya qapılırlar. İrəvan 2020-ci il müharibəsindən sonra ortaya çıxan reallıqları qəbul etmək istəmir. Normallaşma prosesi davam etdiyi bir vaxtda Ermənistan öz öhdəliklərini yerinə yetirmir və bununla da gərginlik yaratmaqla diqqəti yayındırmağa, bununla da normallaşma prosesinə xələl gətirməyə çalışır. Ermənistanın destruktuv mövqedən çəkilməsinə də Qərbin səsləndirdiyi vədlər mane olur. Ermənistanı dəstəkləyən Qərb ölkələri də gözəl anlayırlar ki, Cənubi Qafqaz regionunda sabitlik və əməkdaşlıq mühitinin yaradılması, münaqişələrin və təhdidlərin aradan qaldırılması üçün Azərbaycan və Ermənistan arasında sülh müqaviləsinin imzalanması vacibdir. Məhz buna görə də, bunu ləngitmək istəyirlər.
Ermənistanın məhz 5 aprel Brüssel görüşü ərəfəsində sərhədlərə qoşun toplaması onların eyforiyaya düşərək Qərbin dəstəyindən həvəslənməsindən xəbər verirmi?
Hərbi-siyasi ekspert, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, son zamanlar Ermənistan tərəfdən şərti sərhəddə hərbi texnikanın kalonlarla hərəkətinin videoları yayıldı: "Ermənistan tərəfi bu videolarda əks edilən görüntülərə belə izah verdi ki, bunlar təlim məqsədilə olub. Xüsusən də bunu hərbi sürücülərin təlimi kimi təqdim etdilər. Ermənistanın bu əsaslandırması reallıqdan çox uzaqdır. Videolarda əks olunan hərbi texnikanın tərkibinə baxsaq görürük ki, bu, hücum silahlarının yerdəyişməsidir. Döyüş maşınlarının şərti sərhədə yönəlməsi, yanlarında da artilleriya qüvvələrinin hərəkət etməsi adətən hücum əməliyyatı zamanı olur. Ermənistanın əsaslandırması həqiqəti gizlətmək anlamına gəlir. Bu, həqiqətən sürücülərin təlimi olsaydı, onu poliqonlarda həyata keçirərdilər. Bunu niyə sərhəddə edirlər? Belə qənaətə gəlirik ki, Ermənistan gizli fəaliyyət icra edir. Bunun da zamanına baxanda, ortaya 5 aprel görüşü çıxır. Bu görüş öncəsi Ermənistan gərginlikdə maraqlı görsənir. Brüssel görüşü baş tutarsa, ondan sonrakı mərhələdə ABŞ və Qərbin böyük planı işə düşəcək. NATO-nun Şərqə doğru genişlənməsi Ermənistanı da öz içərisinə ala bilər. Onlar istəyər ki, Rusiyaya qarşı ikinci cəbhəni məhz Cənubi Qafqazdan açsınlar. Onlar bizi müharibəyə təhrik edib, sonra günahlandırmağa çalışacaqlar. Ermənistan anklav kəndlərin olduğu Qazax və Kərki istiqamətində təxribat yaradacaq ki, sonra həmin əraziyə NATO qüvvələrinin gəlməsilə Ermənistanın təhlükəsizliyinin təmin edilməsinin vacib olduğunu desinlər.
5 aprelə qədər Ermənistan tələsəcək ki, bu vəziyyəti yaratsın. Buna görə də, 5 aprel tarixinə kimi və ondan sonra şərti sərhəddə gərginliyin pik həddə çatacağını gözləməliyik".
Məhəmmədəli QƏRİBLİ
