Elşən Manafov: "Bu xətti Azərbaycanı təxribata dəvət etməklə müəyyənləşdirməyə çalışır"
Ermənistanın baş naziri Nikol Paşinyan Artaşat şəhərində partiya üzvləri ilə görüşdə Azərbaycanı yeni, genişmiqyaslı müharibəyə başlamaq üçün bəhanələr axtarmaqda ittiham edib:
"Çox açıq şəkildə qeyd etmək lazımdır ki, Ermənistan hökumətinin Tavuş rayonunun 4 kəndi ilə bağlı heç vaxt ambisiyaları olmayıb, xüsusən də Azərbaycanın bölgədə yeni, genişmiqyaslı müharibəyə başlamaq üçün səbəblər axtardığı bizə aydın olan bir şəraitdə. Bizim siyasi mövqeyimiz, mesajımız ondan ibarətdir ki, Ermənistan Respublikasının beynəlxalq səviyyədə tanınmış, suveren ərazisindən, o cümlədən Azərbaycanın qeyd etdiyi kəndlərin ərazilərindən kənarda heç bir iddiası yoxdur".
Göründüyü kimi, Paşinyan iddia edir ki, Azərbaycan regionda yeni müharibəyə başlamaq üçün onsuz da bəhanə axtarır. Guya gərginliyi yaradan özü deyil, Azərbaycandır. Maraqlıdır, Paşinyan bölgədə yeni müharibə risqini Azərbaycanın üzərinə atmaqla nə məqsəd güdür?
"Nikol Qərbdən aldığı təlimatlara uyğun olaraq bölgədə eskalasiyanın gücləndirilməsi istiqamətində addımlar atır"
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafovun fikrincə, Paşinyan Qərbdən aldığı təlimatlara uyğun olaraq bölgədə eskalasiyanın gücləndirilməsi istiqamətində addımlar atır: "Onun aprelin 5-də Brusseldə ABŞ və Avropa İttifaqı rəsmiləri ilə keçirəcəyi görüşdə Qərblə hərbi-texniki sahədə əməkdaşlığın genişləndirilməsi məqsədilə danışıqlar aparacağı gözlənilir. Rəsmi İrəvanın Qərblə əməkdaşlığı isə bölgədə Rusiyanın təsir dairəsinin daraldılmasına, onun perspektivdə regiondan uzaqlaşdırılmasına yönəldilib. Qərb Cənubi Qafqazda anti-Rusiya halqasının qapanması üçün Ermənistandan alət olaraq istifadə edir. Bölgədə eskalasiyanın gücləndirilməsi məqsədilə Ermənistan həm də Azərbaycanı ona qarşı təhdid siyasətində ittiham edir. Sülh proseslərində rəsmi Bakının əyləc mexanizmləri rolunda çıxış etdiyini bildirməklə, Azərbaycanı bölgədə sülh və sabitliyin pozula biləcəyinə görə məsul tərəf kimi təqdim etməyə, ona qarşı Qərbdən təzyiqlərin gücləndirilməsinə çalışır. Azərbaycana qarşı ərazi iddialarının olmadığını bəyan edən Ermənistan Qərbin dəstəyi ilə silahlanmaqda davam edir. Kommunikasiya xətlərinin açılacağı ilə bağlı öhdəliklərini yerinə yetirmir. Demarkasiya ilə bağlı danışıqlarda qeyri-konstruktiv mövqe sərgiləyir. Bütün bunlar isə Azərbaycanı təxribata sürükləmək, ona qarşı beynəlxalq sanksiyaların tətbiqinə nail olmaq üçün edilir. Rəsmi İrəvan Qərbin bölgə ilə bağlı geosiyasi oyunlarında ötürücü qayış rolunda çıxış edərək, regionda yeni bölücü xəttin çəkilməsinə cəlb edilib. Bu xətti Azərbaycanı təxribata dəvət etməklə müəyyənləşdirməyə çalışır. Onun KTMT ilə münasibətləri göstərir ki, Qərbdə yüksək dairələr Paşinyana təhlükəsizliklə bağlı zəmanətlər veriblər. Onun bu vədlərə inanıb avantürist siyasəti davam etdirməsi bölgənin mövcud durumuna ciddi təhlükə təşkil edir. Bu təhlükəli tendensiyaların qarşısını yalnız regional təhlükəsizlik sahəsində səmimi əməkdaşlıqla almaq olar. Ancaq rəsmi İrəvan bu proseslərə hələ ki, ikili standartlardan yanaşır".
Vidadi ORDAHALLI
