Bu adamlara jurnalist fəaliyyətlərinə görə ittiham irəli sürülməyib - həqiqət başqadır...
Azərbaycanda söz və məlumat azadlığı təmin olunur. Ölkəmizdə fikir, söz, məlumat azadlığı qanunvericiliklə tənzimlənir. Media haqqında qanun qəbul edilib və bu məsələlər hamısı orada öz əksini tapıb. Hər bir media orqanı, hər bir mətbuat nümayəndəsi, jurnalist təbii ki, öz fəaliyyətinə qanunvericiliyə uyğun şəkildə qurmalıdır.
Bu da məlumdur ki, Azərbaycanda söz və ifadə azadlığı var və indiyə qədər kimsə yazdıqlarına, dediklərinə, çıxışlarına görə hər hansı bir təzyiqlə üzləşməyib.
Çox təəssüflər olsun ki, Qərb təşkilatları, Qərbdəki bəzi media qurumları, eləcə də xarici ölkələrin müəyyən rəsmiləri Azərbaycanda söz, fikir azadlığının olmadığı barədə absurd iddialar irəli sürürlər. Onlar bəzi media orqanlarının yazdıqlarına görə yox, məhz işlətdikləri qanunsuz əməllərə görə saxlanıldıqlarını qəbul etmək istəmirlər. Ölkəmizə qarşı qarayaxma kampaniyası aparan bir sıra Qərb media qurumları müxtəlif qəbulolunmaz fikirlərlə çıxış edirlər.
Qərb institutları öz qanunazidd fəaliyyətlərindən diqqəti yayındırmağa çalışır
Azərbaycanda ən müxtəlif səviyyələrdə bildirilib ki, heç kəs peşə fəaliyyəti ilə əlaqədar həbs edilmir, saxlanılanlar isə başqa maddələr üzrə saxlanılıblar.
Bildiyimiz kimi, ölkəmizdə fəaliyyət göstərən "Abzas Media" və "Toplum TV" adlı media nümunəsinin qanunazidd fəaliyyəti və əməkdaşlarının müxtəlif xarici təşkilatlardan maliyyə vəsaiti almalarına dair əsaslı faktlar aşkarlandığı üçün cinayət işi qaldırılıb və adı qanunsuz əməldə keçən şəxslər həbs edilib.
Bir müddət əvvəl hüquq-mühafizə orqanları Toplum internet TV-nin ofisində apardıqları axtarış-əməliyyat tədbirləri zamanı onların cinayət əməlini sübut edən bir sıra sənədlər aşkarlayaraq götürüblər. Qanunvericiliyə uyğun olaraq da həbs edilənlər var. Hadisə ilə bağlı yayılan rəsmi bəyanatlarda bildirilib ki, Azərbaycan xalqının milli maraqlarına, Azərbaycan dövlətinin əleyhinə qarşı işləyən, hətta qeyri-qanuni üsullarla fəaliyyət göstərməkdən belə çəkinməyən şəbəkələrin müəyyən edilməsi və neytrallaşdırılması vacibdir. Amma təəssüf ki, bəzi məkrli qüvvələr bu faktla razılaşmaq istəmirlər və onların əməlləri ifşa olunduğu üçün vaxtaşırı hay-küy qaldırıb diqqəti əsas məsələdən yayındırmaq istəyirlər. Əslində, onların məqsədi odur ki, saxlanılan və barələrində həbs qətimkan tədbirləri seçilən şəxslərin əsl əməllərindən diqqəti yayındırsınlar. Bu səbəbdən də ortalığa söz azadlığının boğulması kimi qondarma iddialar atırlar. Əslində, ənənəvi ampluasında olan və yalandan səs-küy salmağı özü üçün peşəyə çevirən məlum Qərb institutları "Abzas Media"nın, Toplum TV-nin əməkdaşlarının qanunauyğun olaraq saxlanılmasını "media azadlığının pozulması" kimi qiymətləndirməyə cəhdlər göstərirlər.
Ekspertlər qeyd edir ki, halbuki, axtarış tədbirləri Azərbaycan qanunlarına zidd şəkildə medianın, jurnalistlərin və ayrı-ayrı şəxslərin maliyyələşdirilməsinə dair ciddi dəlilərin müəyyən edilməsi ilə bağlıdır. Məhz bu faktlara görə qaçaqmalçılıq maddəsi ilə cinayət işi qaldırılır.
Ekspertlərin fikrincə, Toplum TV ilə bağlı tədbirlərin görülməsindən sonra xarici media, hüquq müdafiə təşkilatları, sonra isə Qərb rəsmiləri tərəfindən ardıcıl ittihamların səslənəcəyi heç bir sual doğurmur. "Lakin bütün bu addımlar Azərbaycanı öz daxili məkanını təxribat və qeyri-qanuni fəaliyyətdən qorumaqdan çəkindirməyəcək.
Bəllidir ki, Azərbaycan dövləti demokratiyanı, insanların hüquq və azadlıqlarını, mətbuat azadlığını Qərbin xoşuna gəlməsi üçün təmin etməyib. Ölkəmizdə bütün hüquqlar vətəndaşlarımızın firavan yaşaması üçün təmin olunub. Amma heç kimə təmin edilmiş hüquqlardan dövlətə qarşı istifadə olunmasına da imkan verilməyəcək.
ABŞ və Qərbin bir çox fondları müstəqil siyasət yürüdən dövlətlərin uğurlarını əlindən almaq üçün iş aparırlar. Onlar gizli yollarla ayırdıqları maliyyə vəsaitləri ilə mətbuat orqanları, QHT-ləri maliyyələşdirir və öz sifarişlərini icra etdirirlər". Bu fikirlər mediada yer alıb.
Qərb institutlarının saxta ittihamları...
Qeyd olunur ki, "Abzas Media"nı, "Toplum TV"ni, müəyyən QHT-ləri, radikal müxalifəti və s. maliyyələşdirən bəzi Qərb fondları ölkəmizdəki siyasi sabitliyi pozmaqla xalqı dövlətə qarşı çıxarmağa çalışırlar. Təbii ki, Azərbaycan dövlətinin təhlükəsizlik orqanları dövlətə qarşı cinayətkar məqsədlərini həyata keçirmək istəyənləri vaxtında müəyyən edir və neytrallaşdırır. Ekspertlər bildirir ki, Qərb Azərbaycanda demokratiya, insan haqları, söz azadlığının olmadığını və siyasi baxışlarına görə həbslər keçirildiyini bildirməklə saxta ittihamlar səsləndirir. "Burda sual olunur ki, ABŞ və Qərbdə insan haqları, söz azadlığı qorunurmu? Qərbin bu məsələlərə aidiyyəti yoxdur. Əgər belə olmasaydı, Edvard Snouden, Culian Assanj və digərlərinə qarşı məxfi məlumatların yayılması bəhanəsi ilə təqib və həbslər həyata keçirməzdilər. Onların da hüquq və azadlıqları təmin olunmalıydı. Fransada öz fikirlərini ifadə etmək üçün dinc aksiya keçirən insanlar polis dəyənəyi altına salınaraq həbsxanalara atılmazdılar. Yeni Kaledoniyaya ezam olunmuş AZƏRTAC-ın jurnalisti Aygün Həsənovanın Fransa polisi tərəfindən qanunsuz həbs olunaraq işgəncələr verib deportasiya edilməsi söz azadlığı və jurnalisitin informasiya almaq hüququnun tapdalanması deyildimi? Belə misalları çox çəkmək olar. Təbii ki, onlar bu mövzuları milli müstəqilliyinə qovuşmuş ölkələrin müstəqlliklərini əllərindən almaq üçün silah kimi istifadə edirlər". Bu fikirlər əməkdaşımız Məhəmmədəli Qəriblinin şərhində yer alıb.
"Bəzi media orqanları xarici dövlətlərin layihələri əsasında fəaliyyət göstərib"
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində "Təbii ki, biz Azərbaycanda hansısa bir jurnalistin həbs olunmasını istəmirik. Əgər həbs prosesi baş veribsə bu əsaslı surətdə sübutlarla törətdiyi əmələ görə olmalıdır. O ki qaldı adıçəkilən mətbuat orqanlarının saxlanılan əməkdaşlarına, onların hansı maddələrlə ittiham olunduğu aydındır, bu rəsmən açıqlanıb. Bu onların jurnalist fəaliyyətləri ilə əlaqədar deyil. Onlara qarşı jurnalist fəaliyyətlərinə görə ittiham irəli sürülməyib. Qərb mediasında onların başqa bir şəkildə təqdim edilməsi gözlənilməz deyildi. Çünki bəzi media orqanları xarici dövlətlərin layihələri əsasında fəaliyyət göstərib, onlarla əməkdaşlıq ediblər"-deyə bildirdi.
Ş.Ağayev qeyd etdi ki, bu gün Qərb mediasının yazdıqlarının heç bir əsası yoxdur və o şəxslərə qarşı konkret maddələr irəli sürülüb, hər şey məhkəmə prosesi zamanı bilinəcək.
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
