Elxan Şıxəliyev: "Birləşmiş Qərbin də ehtiyatlandığı tək məqam ondan ibarətdir ki, Rusiya nüvə silahından istifadəyə məcbur edilməsin"
Moskvada baş verən terrorun Ukrayna-Rusiya müharibəsinin gedişinə ciddi təsirlər edəcəyini bildirirlər. Bu proses müharibənin xarakterini dəyişə bilərmi və müharibənin xaraktercə nüvə müharibəsinə çevrilmək şansı artır, ya azalır?
Hərbi-siyasi ekspert, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, terror aktından sonrakı müzakirələr, xüsusən də Rusiya prezidentinin əsas istiqaməti olaraq sifarişçilərin Ukrayna və birləşmiş Qərbdən olmasını göstərməsi baş verən terror aktının səbəblərini Ukraynaya yönəldəcəklərinə bir işarədir: "Birbaşa Ukraynanın bu terror aktında iştirakı ilə bağlı faktlar olmasa da, nəticənin qəzəbinin onun üzərinə yönəlməsinə çalışacaqlar. Həm də ölkənin içərisində xalqın konsolidə olmasından, dövlətin ətrafında səfərbər olmasından istifadə edəcəklər. Rusiya höküməti xalqı səfərbər edərək müharəbəyə, xüsusən də Ukrayna üzərinə yönəltməyə çalışacaq. Terroru planlayanlar, sifarişçilər və icraçılar hissəsi artıq yekunlaşıb. Yekun Rusiyanın davranışından asılıdır. Rusiyanın davranışında isə ölüm hökmünün bərpası üzrə müzəkirələrin açılması, müharibənin həcminin və arealının artırılması gözlənilir. Areal və həcmin artırılması isə o deməkdir ki, artıq Rusiya Ukrayananın üzərindən hədəflərini bir az da mərkəz şəhərlərinə, əhalinin cəmləşdiyi hökümət və qeyri - hökumət binalarına yönləndirəcək. Nəticəsə qisasçılıq olacaq. Bunun üzərindən Rusiyanın arsenalında olan xüsusi raket sistemlərinin, orta mənzilli ballistik raketlərin istifadə həcmi artırılacaq. Ukraynanın mərkəzi şəhərlərinə, strateji infrastrukturuna, xüsusən də enerji istehsalı hədəflərinə kütləvi zərbələrin həyata keçirilməsinin həcmi çoxalacaq. Digər bir məsələ də Rusiyanın nüvə silahının istifadəsini həyata keçirməsidir. Düşünürəm ki, bunun üçün sırf terror üzərindən heç bir əsas yoxdur. Ancaq bunun olmaması üçün də ABŞ Ukrayna rəhbərliyinə Rusiyanın dərinliyində yerləşən strateji obyektlərə, xüsusən də neft emalı zavodlarına zərbələrin edilməməsini, edilən zərbələrin də durdurulmasını eşitdirdi. Faktiki nüvə silahının Ukraynada istifadəsinə dair ehtiyatlanmalar var. Bundan sonra Ukraynanın Rusiyanın dərinliklərinə zərbələrinin dayandırılması mümkün olacaqsa, Rusiya da nüvə silahından istifadə ilə bağlı fikirlərini korrektə edə bilər. Ukrayna həcmi artırarsa, Rusiya höküməti hədsiz aqressivləşəcək, qisasını almağa çalışacaq. Birləşmiş Qərbin də ehtiyatlandığı tək məqam ondan ibarətdir ki, Rusiya nüvə silahından istifadəyə məcbur edilməsin. Xüsusən də terrorun Moskvaya çatması üzərindən Rusiya hökümətinin siyasi - hərbi qərarları proqnozlaşdırılmayacaq həddə çata bilər. Bunun da fərqindədirlər. Ona görə də bu terrordan maksimum Ukraynaya qarşı istifadə etməyə çalışacaqlar. Qərb də Ukrayna ilə birlikdə Rusiyaya qarşı siyasi - hərbi addımlarında korrektələr edə bilər. Ancaq bu, hər hansı bir zaman kəsimində mümkün olacaq. Qərbin, Ukraynaya dəstək verən qüvvələrin əsas strateji məqsədi Rusiyanı strateji məğlubiyyətə uğratmaqdır. Strateji məğlubiyyətin içərində olan bütün variantlar Rusiyanın atəşkəsə getməsi və müharibəni dayandırması üçün keçərli sayılır. Ancaq düşünürəm ki, müharibə hələ bir müddət də davam edəcək".
Məhəmmədəli QƏRİBLİ
