Abutalıb Səmədov: "Paşinyanın Finlandiya baş naziri ilə görüşü və apardığı danışıqlar ilk növbədə anti-Azərbaycan xarakteri daşıyır"
Brüsseldə Ermənistan və Finlandiyanın baş nazirləri Nikol Paşinyan və Petteri Orpo arasında görüş olub.
Ermənistan baş nazirinin aparatının informasiya və ictimaiyyətlə əlaqələr şöbəsindən verilən məlumata görə, görüşdə Ermənistan və Finlandiya arasında ikitərəfli əməkdaşlıq məsələlərinə toxunulub.
Həmsöhbətlər Ermənistan və Avropa İttifaqı arasında hərtərəfli tərəfdaşlığın gündəliyi, əməkdaşlığın genişləndirilməsi və dərinləşdirilməsi perspektivləri barədə fikir mübadiləsi aparıblar.
Ermənistanın baş naziri Ermənistan Respublikası hökuməti tərəfindən hazırlanmış "Dünyanın kəsişməsi" layihəsini Cənubi Qafqazda iqtisadi qarşılıqlı əlaqənin və sülhün təmin edilməsinin mühüm təminatı kimi təqdim edib.
Diqqət çəkən məqam budur ki, Finlandiya NATO-ya girəndən sonra fin-rus münasibətləri dəhşətli dərəcədə pisləşib.
Finlandiya ilə olan bu görüş Ermənistanın daha bir anti-rus jesti hesab edilə bilərmi?
Müstəqil siyasi şərhçi Abutalıb Səmədov "Bakı-Xəbər"ə açıqlamasında bildirdi ki, Paşinyanın Finlandiya baş naziri ilə görüşü və apardığı danışıqlar ilk növbədə anti -Azərbaycan xarakteri daşıyır: "Təbii ki, Paşinyanın fəaliyyətində anti-rus istiqaməti mühümdür. Ancaq onun orda "sülh kəsişməsi" deyilən erməni layihəsini təqdim etməsi ilk növbədə dünya ictimai rəyini Azərbaycana qarşı dömdərməyə yönəlib. Çünki sülh sazişinin imzalanmasına mane olan məsələlərdən biri də Ermənistanın təbliğatını apardığı "sülh kəsişməsi" layihəsidir. Bu layihə ilk əvvəl Zəngəzur dəhlizinə qarşl yönəlib. Bizim üçün, Türkiyə üçün son dərəcə əhəmiyyətə malik olan Zəngəzur dəhlizinə qarşı Ermənistan "sülh kəsişməsi" layihəsini ortaya atıb və bütün dünyada bu cür təbliğatla məşğuldur. Layihənin mahiyyəti ondan ibarətdir ki, Ermənistan Naxçıvandan Azərbaycanın əsas hissəsinə çəkiləcək dəmir yolunun Mehridən keçən, sərhədin yaxınlığında olan 43 km - lik hissəsini qəbul edir, ancaq avtomobil yolunun tamamilə başqa istiqamətdən çəkilməsini istəyir. Eyni zamanda, həmin o "sülh kəsişməsində" nəzərdə tutulan hissə dağlıq ərazidir, dolayı yollarla keçmək lazımdır. Həmçinin, Qarabağdan qaçmış ermənilərin sıx yerləşdiyi ərazidir. Təbii ki, bu da bizi həm təhlükəsizlik baxımından, həm də yolun qışda keçilməz olması baxımından qane etmir. Yəni bu cür layihənin qəbul edilməsi qışda yolun bir müddət bağlanmasına gətirib çıxara bilər. Şübhəsiz, bu da qətiyyən arzuolunan deyil. Paşinyan layihə əlində bütün dünyanı gəzir və hamını inandırmağa çalışır ki, bu "sülh kəsişməsi" sülhə, iqtisadi əməkdaşlığa xidmət edir. Ancaq əslində həm sülhün, həm də iqtisadi əməkdaşlığın qarşısını almağa yönəlmiş bir layihədir. Azərbaycan da onu heç vaxt qəbul etməyəcək. Eyni zamanda, Ermənistanın irəli sürdüyü digər tələblər də var ki, bu tələblər də qəbulolunmazdır. Ermənistanın imzaladığı 10 noyabr bəyanatında Zəngəzur dəhlizinə Rusiya sərhədçilərinin nəzarəti nəzərdə tutulub. Bu variant da bizi qane edir. Ermənilərin terrora meylini, bizə qarşı erməni nifrətinin pik həddə olduğunu nəzərə alsaq, bir müddət Naxçıvandan Azərbaycanın əsas hissəsinə çəkiləcək yolun rus sərhədçilərin nəzarətində olması bizim maraqlarımıza xidmət edir. Digər tərəfdən, Ermənistan sərhəd və gömrük nəzarətinin tətbiq olunmasını tələb edir. Ancaq biz başa salmağa çalışırıq ki, Azərbaycanın bir hissəsindən başqa hissəsinə keçən yüklər və vətəndaşlar heç bir gömrük yoxlamasından, sərhəd xidmətinin yoxlamasından keçməməlidir. Ermənistan Kalininqrad modelinin tətbiqini də təklif edir ki, burada da ermənilər reallıqları qəti qəbul etmək istəmirlər. Növbədi prinsip onların qarşılıqlılıq və bərabərlik prinsipidir ki, buna əsasən Naxçıvandan Azərbaycana və Azərbaycanın əsas hissəsindən Naxçıvana gedən vətəndaşlar və yüklər üçün qoyulan tələblər Ermənistan vətəndaşlarının Azərbaycandan keçərək Rusiyaya, digər istiqamətlərinə hərəkət etməsinə qoyulan tələblərlə eyni olmalıdır. Bu da məntiqsizdir. Birinci halda söhbət Azərbaycandan Azərbaycana gedən yüklərdən, sərnişinlərdən gedir. İkinci halda isə Ermənistandan Çinə qədər hərəkət edən erməni vətəndaşlarından söhbət gedir. Bir sözlə, Ermənistan bu prosesi dalana dirəmək üçün əlindən gələni edir. Hələ ki, vəziyyətin dəyişəcəyini gözləmək şansımız yoxdur. Ancaq Azərbaycan prezidenti NATO - nun baş katibi ilə görüşündə qeyd etdi ki, bu gün Azərbaycan və Ermənistan heç vaxt olmadığı qədər yaxındırlar. İnşallah, Ermənistan konstruktiv mövqe tutar və bölgəmizi sülh və əməkdaşlıq bölgəsinə çevirmək imkanı yaranar".
Məhəmmədəli QƏRİBLİ
