Elşən Həsənov: "Müharibə bu nəticə ilə başa çatarsa, sonrakı dövrlərdə Rusiyanın aqressiyası daha da artacaq və postsovet respublikalarına təzyiqləri gücləndirməyə çalışacaq"
NATO Baş katibi Yens Stoltenberq alyasın müdafiə nazirlərinin iclasından sonra yekun brifinqdə deyib ki, əgər Prezident Putin Ukraynada qalib gəlsə, bu, bizim üçün də problemdir: "Qafqaz Rusiyanın genişmiqyaslı təcavüzkar müharibə apardığı Ukraynadan o qədər də uzaq deyil. Bu da həm Avropa, həm də Qafqaz üçün vacibdir. Əgər Prezident Putin Ukraynada qalib gələrsə, bu, təkcə Ukrayna üçün faciə deyil, həm də hər kəsə, o cümlədən Azərbaycana və NATO müttəfiqlərinə təhlükə törədər…"
Göründüyü kimi, NATO rəsmisi bildirib ki, Putinin Ukraynada qələbəsinin Azərbaycana təhlükəsi var. Bunu real saymaq olarmı?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, Rusiya Ukrayna müharibəsində hədəflərinin bir qisminə çatarsa və müharibə bu nəticə ilə başa çatarsa, sonrakı dövrlərdə Rusiyanın aqressiyası daha da artacaq və postsovet respublikalarına təzyiqləri gücləndirməyə çalışacaq: "Rusiyanın maraq istiqamətlərindən, təbii ki, biri də Cənubi Qafqaz və Xəzər dənizi hövzəsidir. Bu baxımdan həmin dövrə qədər Azərbaycan və Ermənistan arasında sülh müqaviləsinin imzalanması vacibdir. Nə qədər ki, Rusiya-Ukrayna müharibəsi bitməyib, xüsusilə də məhz Rusiyanın qələbəsi ilə başa çatmayıb, sülh müqaviləsinin imzalanması hər kəsin maraqlarına, xüsusilə də Azərbaycanın və Ermənistanın maraqlarına uyğundur. Çünki sülh sazişi tərəflər arasında nə qədər tez müddətdə imzalanarsa, o zaman regiona da kənar təsirlərin azalması baş verəcək. Hal-hazırda isə müxtəlif güc mərkəzləri məhz münaqişədən istifadə edərək bölgədə təsir imkanlarını artırmağa çalışırlar. Artıq bunun üçün müxtəlif səviyyələrdə tərəflərə təzyiq göstərilir. Bu istiqamətdə Ermənistan daha zəif bənd olduğundan təsirlər və təzyiqlər daha çox ona yönələcək. Amma son dövrlər Qərb cinahında, xüsusilə ABŞ tərəfindən Azərbaycana qarşı ikili standartlar daha bariz şəkildə görünməkdədir. ABŞ özünün maraqlarını həyata keçirmək üçün bütün variantlara əl ataraq, Azərbaycanı qaralamağa, bütün iyrənc vasitələrdən istifadə etməyə çalışır. Biz bunları da nəzərə almalıyıq. Yaxşı olardı ki, NATO baş katibi bizi hədələməkdənsə, özü obyektivliyi qoruyub, sülh sazişinin imzalanmasına nail olsunlar. Ancaq düşünmürəm ki, Azərbaycan bundan ciddi əziyyət çəkə bilər. Çünki bizim Rusiya ilə çox dərin əlaqələrimiz var".
Bugünlərdə Polşa Prezidenti Anjey Duda da deyib ki, Rusiya Ukraynaya qarşı müharibədə qalib gələrsə, Vladimir Putin digər dövlətlərə hücum edəcək:
"Bu gün Ukrayna əmin olmalıdır ki, Putin müharibədə qalib gəlməyəcək. Biz bir neçə dəfə Rusiyanın əsarətinə düşmüş xalqıq. Rusiya Ukraynadakı müharibədə qalib gəlsə, yenidən hücuma keçəcək. O, (başqalarına da hücum edəcək. Buna görə də onların fəaliyyəti dayandırmalıdır".
Çox güman ki, Qərb dairələri bu ismarıçlarla Rusiyaya qarşı müqaviməti daha da gücləndirmək marağını güdür.
Məhəmmədəli QƏRİBLİ
