Məhəmməd Əsədullazadə: "Ümumilikdə, Qarabağın azad edilməsi asan başa gəlmədi"
Prezidenti İlham Əliyev Xankəndidə Azərbaycan xalqını Novruz bayramı münasibətilə təbrik edərkən dedi ki, torpaqların azad edilməsi üçün bir neçə istiqamətdə hazırlıq gedirdi:
"Biz iyirmi il torpaqlarımızın azad olunmasına hazırlaşmışdıq. Bir çox istiqamətlər üzrə planlı şəkildə işlər gedirdi. Siyasi müstəvidə dünyada Azərbaycanın mövqeləri möhkəmləndi, dostlarımızın sayı böyük dərəcədə artmışdır. Beynəlxalq təşkilatlar bizim təşəbbüsümüzlə münaqişə ilə bağlı bizim mövqeyimizi dəstəkləyən və beynəlxalq hüquqa əsaslanan qərar və qətnamələr qəbul etmişlər və bu münaqişənin həlli üçün hüquqi və siyasi zəmin yaratmışdır. Biz iqtisadi inkişafa nail olduq, iqtisadi müstəqilliyə nail olduq və bu gün heç kimdən iqtisadi cəhətdən və təbii ki, siyasi cəhətdən asılı deyilik. Güclü iqtisadiyyat bizə imkan verdi ki, siyasi müstəvidə öz siyasətimizi müstəqil şəkildə aparaq".
"Uyğun beynəlxalq vəziyyətin yetişməsini səbrlə gözlədik və nəticədə güc yolu ilə ərazi bütövlüyümüzü təmin etdik"
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin fikrincə, cənab Prezidentin Xankəndidə Novruz tonqalını yandırması çox mühüm əhəmiyyət kəsb edir: "Bu, həm də erməni separatizminin yandırılması anlamına gəlir. O baxımdan hesab edirəm ki, Prezident İlham Əliyevin Xankəndidə verdiyi mesajlar xüsusi əhəmiyyət kəsb edir. Azərbaycanın güclü olduğu, müstəqil siyasət həyata keçirdiyi və bundan sonra da ordu quruculuğuna xüsusi yer verəcəyi mesajını verdi. Azərbaycanın güclü olmasının nəticəsi idi ki, ərazilərimiz işğaldan azad edildi. Bu gün Azərbaycan öz imkanları hesabına işğaldan azad edilən əraziləri bərpa edir. Bu o deməkdir ki, Azərbaycan heç bir beynəlxalq təşkilatdan, maliyyə qurumundan asılı deyil. Ümumilikdə, Qarabağın azad edilməsi asan başa gəlmədi. Azərbaycan sistemli şəkildə müharibəyə hazırlaşdı. Beynəlxalq müstəvidə mövqelərini möhkəmləndirdi. Beynəlxalq hüquq Azərbaycanın tərəfində idi. Bütün dövlətlər Azərbaycanın ərazi bütövlüyünü tanıyırdılar. BMT Təhlükəsizlik Şurasının 4 məlum qətnaməsi, digər beynəlxalq təşkilatların qərarları hüquqi baxımdan bizim xeyrimizə işləyən faktorlar idi. 1994-cü ildə Ermənistanla atəşkəs əldə olunandan sonra Azərbaycan balanslaşdırılmış siyasət yeritməyə başladı. Bu çərçivədə ikitərəfli əlaqələr genişləndirildi. Yeni-yeni ikitərəfli iqtisadi əlaqələr quruldu. Ordu quruculuğu yeni müstəviyə keçirildi. Müasir silahlar əldə edildi. Uyğun beynəlxalq vəziyyətin yetişməsini səbrlə gözlədik və nəticədə güc yolu ilə ərazi bütövlüyümüzü təmin etdik. Ümumiyyətlə, beynəlxalq təşkilatlarla Azərbaycan çox ciddi işlər görür. Əksər böyük dövlətlər, beynəlxalq təşkilatlar Azərbaycana dəstək verir. Beynəlxalq Bakı Forumu, NATO Baş katibinin səfəri göstərdi ki, Azərbaycan qlobal dünyanın bir mərkəzidir. Azərbaycan dəyişən dünya nizamında yer alır. Bütün bunlar, əlbəttə ki, Prezident Əliyevin apardığı siyasətin bəhrəsidir".
Vidadi ORDAHALLI
