Mübariz Göyüşlü: "Həmin qurum bizim məcburi köçkünlərimizə görə bələdiyyələrə bir qəpik də olsun yardım ayırmadı"
Avropa Şurasının Yerli və Regional Hakimiyyətlər Konqresi (AŞ) Ermənistanda Qarabağdan olan "qaçqınları" qəbul edən bələdiyyələrə dəstək üçün qrant proqramına start verib.
Məlumata görə, Avropa Şurasının İrəvan ofisinin səhifəsində bildirilir ki, proqramın ümumi büdcəsi 100,000 avro təşkil edir və bu, hər bir bələdiyyə üçün 25,000 avroluq 4 qrant şəklində ayrılacaq.
Ermənistanda Qarabağdan gedən "qaçqınları" qəbul edən bələdiyyələr üçün Avropa Şurasının Yerli və Regional Hakimiyyətlər Konqresinin
qrant ayırması bu qurumun qatı ermənipərəst olduğunu bir daha təsdiqləyir.
Söhbət ondan gedir ki, Qarabağdan gedən ermənilər qaçqın və ya məcburi köçkün deyillər, onlar oranı könüllü tərk ediblər. Biz onların ermənilərə göstərdikləri bu isti münasibəti 30 il bundan əvvəl öz yurdlarından didərgin salınmış azərbaycanlılara qarşı görmədik. Azərbaycanın qaçqın və məcburi köçkünlərinə bu münasibət göstərilmədi, həmin qurum bizim bələdiyyələrə bu istiqamətdə yardım etmədilər. Ötən 30 il ərzində eşitmədik ki, Avropa Şurasının müvafiq Konqresi bu yöndə addım atsın. Bu da Avropa Şurasının Azərbaycana ikili standartlarla yanaşmasının bir nümunəsidir.
"Onlar bizə həmişə ikili standartlarla yanaşıb"
Müasir İnkişaf Birliyinin sədri Mübariz Göyüşlü "Bakı-Xəbər"ə şərhində bildirdi ki, bu yanaşmanın bircə adı var - ikili standart. "Hesab edirəm ki, Avropa strukturları Azərbaycana, Azərbaycanın haqlı mübarizəsinə həmişə ədalətsiz yanaşıb. Avropa Şurasının da bizə hər zaman ikili standartlarla yanaşdığı danılmaz faktdır. Qarabağdan könüllü olaraq Ermənistana köç etmiş ermənilərə görə bu ölkənin bələdiyyələrinə qrant ayrılması da bizə qarşı ögey münasibətin tərkib hissəsidir.
Çox təəssüf ki, Avropa Şurası mütəmadi olaraq ermənipərəst mövqe göstərir. Bu qurumlar hər zaman haqdan, ədalətdən, hüquqdan, qanunun aliliyindən danışa da, əməli işə gələndə biz onlardan ədalətsiz yanaşmalar görürük. Konkret olaraq ermənipərəst mövqedən çıxış etmələri həmin qurumun və onun strukturlarının etibarsız bir təşkilat olduğunu göstərir. Bu da ermənipərəst qüvvələrin təmsil olunduqları qurumların etibarını zədələməsi deməkdir. Ermənipərəst mövqedən çıxış etmək onlara başucalığı gətirmir.
Onlar Ermənistanı, erməniləri gücləndirməklə, maliyyələşdirməklə, yenidən Azərbaycana qarşı tətikləməklə nəyəsə nail olmağa ümid edirlərsə bu boş xülyadır. Bunlar mənasız çalışamalardır. Azərbaycan regionun ən güclü dövlətidir"-deyə M.Göyüşlü qeyd etdi.
Müsahibimiz bildirdi ki, əslində o qurum Azərbaycanla əməkdaşlıqda maraqlı olmalıdır, amma biz bunu uzun illərdir ki, görə bilmirik.
30 ilə yaxın Azərbaycan əraziləri işğalda qaldı, 1 milyondan çox qaçqınımız, köçkünümüz oldu. Amma Avropa Şurasının müvafiq qurumunun Azərbaycan bələdiyyələrinə hansısa qrant ayırdığını görmədik. Həmin qurum bizim məcburi köçkünlərimizə görə bələdiyyələrə bir qəpik də olsun yardım ayırmadı. Amma bu gün qaçqın olmayan ermənilərə "qaçqın" adı qoyub onlara görə Ermənistan bələdiyyələrinə qrant ayrılması Avropa Şurasının ermənipərəstliyinin əyani sübutudur. Onlar bizə həmişə ikili standartlarla yanaşıb. Belə olmasaydı, bizim keçmiş qaçqın vıə məcburi köçkünlərə görə də bələdiyyələrimizə qrantlar ayırardılar"-deyə M.Göyüşlü qeyd etdi.
İradə SARIYEVA
