Elxan Şıxəliyev: "Bizim NATO ilə bağlı gözləntilərimizi açıq ifadə etməyimiz Risiyada qıcıq yaratmış olur"
NATO-nun Baş katibi Yens Stoltenberq Azərbaycana rəsmi səfərə gəlib. Stoltenberq Prezident İlham Əliyevlə keçirdiyi birgə mətbuat konfransında deyib ki, Azərbaycan NATO-nun uzunmüddətli tərəfdaşıdır:
"Biz uzun illərdir bir yerdə çalışırıq. Biz Kosovoda KFOR qüvvələrimizə verdiyiniz dəstəyi çox yüksək dəyərləndiririk, o cümlədən, təbii ki, Prezident olduğunuz dövrdə Əfqanıstanda missiyamıza uzun illər verdiyiniz töhfə çox vacib idi. Siz tam haqlısınız. Əfqanıstanı tərk edən ən sonuncu qüvvələrdən biri Azərbaycan hərbçiləri olub. Çünki Siz hava limanının mühafizəsinə görə cavabdeh idiniz və bu, NATO qüvvələrinin Əfqanıstandan təxliyəsində əsas məsələ idi".
Azərbaycanla Qərbin bəzi strukturları arasında gərginliyin olduğu bir zamanda NATO Baş katibinin Azərbaycana səfəri, İlham Əliyevlə görüşü və ölkəmizin NATO üçün nə qədər önəm daşıdığı ilə bağlı səsləndirdiyi fikirlər nədən xəbər verir?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Azərbaycanın NATO ilə əməkdaşlığının tarixi 30 ildən çoxdur davam edir: "Ancaq NATO-nun baş katibinin Azərbaycana səfəri ilk dəfədir reallaşır. Belə bir məqamda bu səfırin baş tutması olduqca mühüm məqamlardan xəbər verir. Hazırkı geosiyasi reallıqlar fonunda yeni təhdid və təhlükələrin mövcudluğu danılmazdır. Rüsiya-Ukrayna müharibəsinin fonunda Cənubi Qafqazın önəmi daha da artıb. Azərbaycan Avropanın enerji təhlükəsizliyində mühüm rola sahibdir. NATO-ya üzv olan 6 ölkə ilə bu yöndə yaxından əməkdaşlıq edirik. Baş katibin bizim ölkə başçısı ilə keçirdiyi birgə mətbuat konfransında hiss olundu ki, NATO-nun Azərbaycandan gözləntiləri, bizim da onlardan istədiklərimiz var. Hətta Baş katib Azərbaycana müxtəlif ölkələrdə yaratdığı sülhyaratma missiyasındakı iştirakına görə təşəkkürünü bildirdi. Düşünürəm ki, NATO ilə Azərbaycanın münasibətləri qənaətbəxşdir. Keçmiş SSRİ-dən yeganə Azərbaycandır ki, NATO ilə 1994-cü ildə qəbul olunmuş Sülh Naminə Tərəfdaşlıq Proqramı çərçivəsində onlarla eyniləşdirməyə gedib. Bu yöndə bizim NATO ölkəsi olan Türkiyə ilə də yaxın əməkdaşlığımız mövcuddur. Artıq bizim ordu tam olaraq NATO standartlarına keçmiş vəziyyətdədir. Amma bütün bunlara baxmayaraq, biz NATO-nun üzvlüyünü dilə gətirmirik. Bunu da görürük ki, belə niyyətlərini açıq bəyan edən postsovet ölkələri: Gürcüstan, Ukrayna, Moldova və son mərhələdə Ermənistan necə qıcıq yaratmış olub. Hətta Rusiya buna görə müharibə etməkdən belə çəkinmədi. Rusiya deyir ki, NATO-nun Şərqə doğru genişlənməsi onun üçün "qırmızı xətt" hesab edilir. Buna görə də, bizim neytral yanaşmamız çox məntiqlidir. Bizim təhlükəsizlik konsepsiyamız və müdafiə doktrinamızda Avroatlantik məkana inteqrasiya bizim "yol xəritəmiz"dir. NATO həm də karbohidrogen ehtiyatlarının təhlükəsiz şəkildə nəqlində maraqlıdır. Avropa üçün nəfəslik sayılan bu məsələdə NATO Cənubi Qafqazı bütöv görür. Hətta gələcək üçün bu çoğrafiyaya öz nüfuz dairəsi kimi baxır. Baş katib iki Qafqaz ölkəsinin sülh imzalamasında maraqlı olduğunu bildirdi. Düşünürlər ki, Cənubi Qafqazda sülh tərəfdaşlığına keçsələr və Rusiyanın da hərbi gücü zəifləyərsə, o zaman bu çoğrafiyadakı ölkələrlə bağlı yeni reallıqlar yarana bilər. Bizim NATO ilə bağlı gözləntilərimizi açıq ifadə etməyimiz Risiyada qıcıq yaratmış olur".
Məhəmmədəli QƏRİBLİ
