Elşən Manafov: "Ermənistanda Rusiyapərəst siyasi qüvvələr xeyli aktivləşib"
"Ermənistan-Rusiya müttəfiqlik münasibətləri bərpa edilməli, digər regional və qlobal oyunçularla münasibətlər ümumi maraqlar əsasında qurulmalıdır". Bunu Ermənistanın həbsdə olan müxalifət nümayəndəsi Armen Aşotyan deyib.
Aşotyanın sözlərinə görə, Nikol Paşinyan Ermənistanın siyasi kapitalını o qədər israf edib ki, geosiyasi mübarizədə ölkənin dəyəri kiçilib: "Ermənistan kimi bir dövlətdə xarici siyasət ilk növbədə ölkənin təhlükəsizliyinin möhkəmləndirilməsinə xidmət etməlidir. Ancaq Nikol Paşinyanın uğursuz diplomatiyası və pis xarici siyasəti təhlükəsizlik vəziyyətinin kəskin pisləşməsinə gətirib çıxarıb. Təbii ki, müttəfiqlərin sayının çox olması hər bir ölkə üçün üstünlükdür. Təəssüf ki, Ermənistanın xarici siyasi vəziyyəti legitim müttəfiqlər tapmağa imkan vermir. Ona görə də Ermənistan-Rusiya müttəfiqlik münasibətlərini bərpa etmək, eyni zamanda digər regional və qlobal aktorlarla ümumi maraqlar əsasında münasibətlər qurmaq lazımdır".
Erməni professor Artur Xaçikyan da Avropa İttifaqını hədəf alıb. O qeyd edib ki, guya Qarabağda etnik ermənilər soyqırıma məruz qalanda Avropa İttifaqı müşahidə missiyası buna seyrçi qalıb və s. Xaçikyan bütün tənqidləri Aİ-yə ünvanlayıb və bununla bağlı bir sıra uydurma arqumentlərlə çıxış edib.
Göründüyü kimi, erməni elitasında Rusiya ilə müttəfiqliyi bərpa çağırışları və Avropa Birliyinin müşahidə missiyasına qarşı bəyanatlar var. Bütün bunlar nədir? Hesab etmək olarmı Rusiyanın Ermənistanda "minaları" hərəkətə gətirilir?
"Onlar Paşinyana yönəlik tənqidləri daha da sərtləşdirsələr də, bu qüvvələrin cəmiyyətdə tərəfdarları hələ ki, çox deyil"
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov buna bir neçə aspektdən yanaşdı: "Ermənistan hakimiyyətinə müxalifətdə olan Armen Aşotyan və Artur Xaçikyan bu ölkədə iqtidarda olan siyasi istibleşmentə müxalif mövqe ilə məşhur olan siyasi, elmi xadimlərdir. Aşotyan Serj Sarkisyanın prezidentliyi dövründə Ermənistanda elm və təhsil naziri, Tibb Universitetinin rektoru kimi məsul vəzifələrdə çalişib. Moskva Beynəlxalq Munasibətlər İnstitutunun məzunu olduğundan, habelə Ermənistan-Rusiya əlaqələrinin inkişafi və möhkəmləndirilməsi sahəsində xidmətlərinə görə Slavyan Universitetinin ordeni ilə təltif olunub. Bu səbəblərdən Paşinyan hakimiyyəti tərəfindən Rusiyanın adamı kimi qəbul olunub. Aşotyan korrupsiyada ittiham olunduğu üçün həbs olunub. Müxalifət onu siyasi məhbus hesab edir. Aşotyan Ermənistan siyasi elitasında praqmatikliyi ilə seçilən, Paşinyanın anti-Rusiya siyasətinin Ermənistan üçün acı nəticələr doğura biləcəyini söyləyən siyasətçilərdəndir. Qərbin Paşinyan rejimi vasitəsilə Rusiyanın Cənubi Qafqazdan sıxışdırılıb çıxarılmasına xidmət edən siyasətinin Ermənistan dövlətçiliyi üçün perspektivdə acı nəticələr dogura biləcəyini bəyan edir. Aşotyan hesab edir ki, Avropa İttifaqı müşahidə missiyasının tərkibinin genişləndirilməsi Ermənistanın təhlükəsizlik maraqları üçün məqbul deyil. Gürcüstan və Ukraynanı misal gətirərək Qərbin şirin vədlərinə uymamağı tövsiyə edir. O, Rusiya ilə yaxınlaşmanı vacib hesab edir. Siyasi elmlər doktoru olan Armen Xaçikyan da Paşinyanın Qərbyönümlü siyasətinin ardıcıl tənqidçilərindən olduğundan eyni fikirləri bölüşür. Bütün bunların fonunda, Ermənistanda Rusiyapərəst siyasi qüvvələr xeyli aktivləşib. Onlar gedən proseslərlə əlaqədar Paşinyana yönəlik tənqidləri daha da sərtləşdiriblər. Ancaq bu qüvvələrin cəmiyyətdə tərəfdarları hələ ki, çox deyil".
Vidadi ORDAHALLI
