Hüseyn İbrahimov: “Ölkəmizin üzv olması, xüsusən iqtisadi nöqteyi-nəzərdən Rusiyanın çox işinə yarayacaq”
Rusiya baş nazirinin müavini Aleksey Overçuk Tehranda keçirilən Üçüncü Xəzər İqtisadi Forumunda çıxışı zamanı Xəzər beşliyi ölkələrinə Avrasiya İqtisadi İttifaqı ilə yaxınlaşmanın faydalarını nəzərdən keçirməyi təklif edib:
“Regionda iqtisadi əlaqələrin möhkəmlənməsinə İranın Aİİ-yə müşahidəçi dövlət kimi daxil olması şərait yaradır. Mən “Xəzər beşliyinin” digər iştirakçılarını Aİİ ilə yaxınlaşmanın faydaları barədə düşünməyə dəvət edirəm”.
Maraqlıdır, Overçuk bununla nə demək istəyir? Xəzəryanı ölkələrdən Qazaxıstan Aİİ-nin üzvüdür, Türkmənistan neytral siyasət yeridir və hansısa iqtisadi qurumda, hərbi təşkilatda təmsil olunmaq istəmir. İran isə Aİİ-də müşahidəçi statusundadır. Yəni perspektivdə İranın quruma üzv olma ehtimalı böyükdür. Əcaba, Overçuk bununla Azərbaycanamı işarə edir və ölkəmizi Aİİ-də görmək istəyir?
“Hətta Ermənistanla sülh sazişi imzalansa belə, Azərbaycanın Aİİ-yə qoşulacağını düşünmürəm”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov bunu istisna etmədi: “Rusiya çoxdandır ki, Azərbaycanı Aİİ-də görmək istəyir. Prinsipcə, Rusiyanın belə bir istəklə çıxış etməsi yeni bir şey deyil. Zaman-zaman Rusiyanın bir sıra ekspertləri müxtəlif formalarda Azərbaycanın Aİİ-yə qoşulması ilə bağlı çağırışlar ediblər. Xüsusən də ərazilərimiz işğal altında olan dövrlərdə bu məsələni daha çox gündəmə gətirirdilər. Halbuki, həmin qurumda Ermənistan təmsil olunduğu üçün bu mümkün deyildi. Çünki bütün üzv dövlətlərin razılığı olmalıdır. Digər tərəfdən, Aİİ-yə üzv olmaq müstəqil iqtisadi siyasətlə bağlı müəyyən məhdudiyyətlər deməkdir. Bir neçə dəfə Azərbaycan rəsmi səviyyədə bəyan edib ki, Aİİ-yə qoşulmaq niyyətində deyil. Hətta Ermənistanla sülh sazişi imzalansa belə, Azərbaycanın Aİİ-yə qoşulacağını düşünmürəm. Çünki bizim buna iqtisadi nöqteyi-nəzərdən ehtiyacımız yoxdur. Ancaq Rusiya çox maraqlıdır ki, Azərbaycan bu birliyə qoşulsun. Çünki Azərbaycan çox önəmli coğrafi mövqedə yerləşir. Azərbaycanın Aİİ-yə qoşulması Rusiyanın İranla daha rahat ticarət əlaqələri qurmasına zəmin yaradacaq. Sülh sazişi olarsa, bu, Rusiyanın Ermənistanla daha sərfəli ticarət əlaqələri qurması deməkdir. Ona görə ki, Aİİ yarandığı gündən Ermənistan onun üzvü olsa da, bu ölkənin üzv dövlətlərlə quru sərhədi yoxdur. Ona görə də Overçuk diplomatik tərzdə belə canfəşanlıq edir. Çünki Azərbaycanın üzv olması, xüsusən də iqtisadi nöqteyi-nəzərdən, Rusiyanın çox işinə yarayacaq. Bu səbəbdən müxtəlif stimullaşdırıcı təkliflərlə çıxış edirlər ki, digər dövlətlər də Aİİ-yə qoşulsun”.
Vidadi ORDAHALLI
