Türkiyədə düz ay yarımdır İmralı həbsxanasında saxlanılan terrorbaşı Öcalandan Baxçalının təşəbbüsü ilə edilmiş müraciətə cavab gözlənilir.
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Hələ 2013-cü ildə baş vermiş 1-ci dalğa "kürd açılımı" 2014-cü ildə iflasa uğramışdı. Bu il isə MHP başqanı Baxçalı "Öcalan gəlib Böyük Millət Məclisində PKK-çılara silahı buraxın çağırışı etsin" deyə bir təşəbbüs etdi. İmralı həbsxanasına 3-4 dəfə elçilər göndərildi. Düzdür, bu dəfə yalnız kürd partiyasının təmsilçiləri - deputatlar Pərvin Buldan, Əhməd Türk və digərləri irəli verildi. Halbuki 2013-cü il açılımında Hakan Fidan, Abdulla Gül, Bülənd Arınc kimi AKP yetkililəri də cəlb edilmişdilər. Məncə bu proses iflasa uğradı, o mənada ki, udan yalnız PKK-nın siyasi qanadı oldu, hərbi qanad isə "dağlarda döyüşü" davam etdirdi...
10 il sonra hazırkı 2-ci kürd açılımı prosesində hələlik Apo-dan PKK-ya çağırış gözlənilir. Çox adamlar Apo-nun fevralın 15-dək terrorçulara "silahı buraxın və dağlardan enin" deyə müraciət edəcəyini gözləyir. Öcalan düz ay yarımdır "otar-suvar" edir, müraciət yoxdur.
Mən elə o zaman fikrimi dedim ki, bir sıra ciddi arqumentlərə Öcalanın belə müraciət edəcəyinə inanmıram...
Deyəsən haqlı çıxacam.
Öcalana yaxın DEM partiyasının bir qadın səlahiyyətlisi bu gün məlumat verdi ki, Öcalan fevralın 15-dək müraciətini göndərməyə bilər, gecikə bilər və müraciət olsa, bu şəkildə olacaq ki, "kürd açılımı hərbi və siyasi qanadın iştirakı ilə aparılsın"... Yəni bunun mənası odur ki, danışıqlarda Qəndil dağlarından enib gəlmiş Murad Qarailan kimi şəxslər də qatılsın. Bunun nə dərəcədə mümkün olacağı isə çox qeyri- müəyyəndir.
Onu da nəzərə alaq ki, Öcalandan cavab gözləndiyi bir vaxtda İstanbulda və bir çox başqa bələdiyyələrdə PKK ilə əməkdaşlıq ittihamı altında kütləvi həbslər və əməliyyatlar keçirilir. Həm "kürd açılımı", həm də örgüt üzvləri olmaq şübhəsi ilə eyni vaxtda kütləvi həbslər...
Nəsə ağıl bir şey kəsmir....
Tahir TAĞIYEV
