Avropa Parlamenti Azərbaycana qarşı yenə qərəzli mövqedən əl çəkə bilmədiyini nümayiş etdirdi. Qurumun ölkəmizə qarşı qəbul etdiyi növbəti qətnamə bir daha açıq-aşkar ikiüzlülük və ikili standartları nümayiş etdirir. Avropa Parlamentindən beynəlxalq hüquqa zidd olan addımlar bu quruma olan zəif etimadı birdəfəlik alt-üst etdi.
Qeyd edək ki, Avropa Parlamenti Avropa məkanında anti-Azərbaycan təbliğatı ilə məşğul olan təşkilata çevrilib. Dəfələrlə heç bir fakta əsaslanmayan iftiralarla dolu qətnamələri qəbul etsə də, indiyə kimi həmin sənədlərin Azərbaycana hər hansı bir zərəri olmayıb. Ümumiyyətlə, Avropa Parlamentinin qətnamələrinin tövsiyə xarakteri daşıdığı hər kəsə məlumdur və heç bir çəkindirici qüvvəyə malik deyil. Əsas məqam budur ki, Avropa Parlamentinin Azərbaycana qarşı qəbul etdiyi qətnamə erməni lobbisi ilə sıx əlaqədə olan korrupsiyalaşmış qurumun nümayiş etdirdiyi növbəti qərəzdir. Məhz elə bundan irəli gəlir ki, Avropa Parlamenti sonuncu qətnaməsində Azərbaycana qarşı etnik və dini əsasda ayrıseçkiliyini davam etdirərək, ölkəmizin daxili işlərinə qarışıb, ərazi bütövlüyünə və suverenliyinə qəsd edən yanaşma sərgiləyib. Burada xatırladaq ki, ötən ilin dekabrında polisin həyata keçirdiyi əməliyyat nəticəsində Avropa Parlamentinin sədr müavini Eva Kayli rüşvət və korrupsiya ittihamı ilə həbs edilib. Korrupsiya şəbəkəsi quran Eva Kayli bu işə vətəndaş sevgilisi Françesko Corcia və atası Pyer Antonio Panserini də qatıb. O və F.Corcia əvvəlcə “Ədalətsiz sülh olmaz” adlı qeyri-hökumət təşkilatı yaradaraq, guya hüquq müdafiəsi ilə məşğul olmağa başlayıblar. Lakin bu təşkilatın əsas işi müxtəlif dövlətlərdən pul alıb E.Kayliyə ötürmək və bu pulun müqabilində həmin dövlətlərin maraqlarını müdafiə edən qərarların Avropa Parlamentində çıxarılmasına nail olmaqdan ibarət idi. Polisin apardığı axtarışlar zamanı Eva Kaylinin evindən 600 min avro, iş otağından isə 20 min avroya yaxın nağd pul tapılıb. Təbii ki, nə E.Kayli, nə onun sevgilisi, nə də İtaliya ərazisində alınan rüşvəti çantada Belçikaya daşıyan atası Panseri bu pulların mənbəyini izah edə bilməyiblər. Bu, Eva Kaylinın adının hallandığı ilk rüşvət və korrupsiya qalmaqalı deyil. Avropa Parlamentinə Yunanıstandan seçilmiş Kayli Avropada fəaliyyət göstərən erməni lobbi qrupları ilə də sıx əməkdaşlıq edib. Bu qruplardan qanunsuz yollarla əldə etdiyi vəsaitlər mövzusunda media gündəminə düşüb.
Bu ilin aprelində isə Belçika polisi və alman müstəntiqləri Almaniyada başladılan istintaq çərçivəsində sağ mərkəzçi Avropa Xalq Partiyasının Brüsseldəki qərargahına basqın ediblər. Avropa Xalq Partiyası Avropa Parlamentində ən böyük fraksiyadır və üzvləri ən çox yerə sahibdirlər. İstintaqla bağlı əlavə məlumat verilməsə də, “Thueringer Allgemeine” qəzeti mənbələrə istinadən bildirib ki, basqın Almaniya Xristian Demokratlar Partiyasının lideri Mario Foyqtun 2019-cu il Avropa seçkilərində seçki kampaniyasındakı korrupsiya qalmaqalı ilə əlaqədar olub. İstintaq Foyqtun kampaniya zamanı müqavilə bağladığı bir internet şirkətindən mükafat aldığını müəyyən edib. Daha əvvəl isə Avropa Parlamentinin bir çox üzvü, davranış kodeksinin əksinə olaraq, böyük miqdarda ödənilən pullar hesabına iri şirkətlərin maraqlarına uyğun qanunların qəbul olunması üçün lobbiçilik fəaliyyəti ilə məşğul olub. Avropa Parlamentinin bir sıra deputatları hələ 2011-ci ilin martında etiraf ediblər ki, böyük qonorarlar hesabına maliyyə sektoru üçün bank idarəçiliyi haqda qanunun qəbul edilməsinə kömək ediblər. Bundan sonra tezliklə deputatların yeni davranış kodeksi qəbul olunub və bura lobbistlər üçün şəffaflıq reyestri də daxil edilib. Lakin bu kodeks yalnız kağız üzərində qalıb. Bunlar Avropa Parıamentində sadəcə çoxsaylı korrupsiya faktlarından bəziləridir. Belə fonda bəllidir ki, xeyli müddətdir, Avropa Parlamentinin bir sıra üzvləri erməni diasporunun korrupsiyasından istifadə edərək Azərbaycana qarşı qərəzli mövqe formalaşdırır. Avropa Parlamentində təmsil olunan “Ermənistanla dostluq qrupu” bu məsələdə xüsusilə seçilir. Avropa Komissiyasının məmurlarından fərqli olaraq, Avropa Parlamentinin deputatlarından lobbiçilərlə görüşlər barədə hesabat tələb olunmur. “Ermənistanla dostluq qrupu”na üçlü vətəndaşlığa (Yunanıstan, Lüksemburq və Ermənistan) malik olan “Ədalət və Demokratiya uğrunda Avropa Erməni Federasiyası”nın rəhbəri Kaspar Karampetyanın federasiyası sponsorluq edir. Karampetyan Afrikanın münaqişə bölgələrindən Belçikaya müxtəlif rəngli almazların qaçaqmalçılığı ilə məşğul olmaqla məşhurlaşıb. Belçikada zərgər butiklərini satın alan Karampetyan almaz ticarətinin geniş qanlı şəbəkəsini yaradıb. O, Afrikanın münaqişə bölgələrindən rəngli uzunsov brilyantları qaçaqmalçılıq yolu ilə Belçikaya keçirərək, burada onları cilalayır. Sonra bu brilyantlar müfəssəl şəkildə tərtib edilmiş korrupsiya sxeminə uyğun olaraq sertifikatlaşdırılır və Avropada marka butiklərə göndərilir. Qaçaqmalçılıqdan pul qazanan Kasparın yaratdığı “Ədalət və Demokratiya uğrunda Avropa Erməni Federasiyası” Ermənistanın xarici kəşfiyyatı ilə birgə uzun illər Avropa parlamentarilərini işğal altında olmuş Azərbaycanın ərazilərinə cəlb edib. Amma Vətən müharibəsindən sonra buna son qoyulub. Nəticədə Azərbaycan Baş Prokurorluğu Kaspar Karampetyanı İnterpol xətti ilə axtarışa verib. O, 2014-2018-ci illərdə mütəşəkkil dəstənin tərkibində dəfələrlə Ermənistan ərazisindən keçməklə Azərbaycanın dövlət sərhədini qəsdən və qanunsuz keçərək Xankəndiyə və digər yaşayış məntəqələrinə səfərlər edib, Azərbaycanın suverenliyi və ərazi bütövlüyü əleyhinə açıq çağırışlar səsləndirib. İndi belə bir təşkilatın Azərbaycana qarşı qərəzli mövqeyini izah etməyə ehtiyac qalmır. Halbuki, hazırda Avropanın Azərbaycana indiyədək heç vaxt olmadığı qədər ehtiyacı var. Enerji böhranı yaşayan qitə Azərbaycanın təbii qazından enerji təhlükəsizliyini təmin etmək üçün yararlanmaq istəyir. Bu təhlükəsizliyin təmin edilməsi üçün böyük potensiala və imkana malik Azərbaycan hər dəfə olduğu kimi etibarlı tərəfdaş olduğunu nümayiş etdirir. Təsadüfi deyil ki, 2022-ci ilin iyulunda Avropa Komissiyasının rəhbəri Ursula Fon der Lyayen Bakıya səfər edərək Azərbaycanla Avropa İttifaqı arasında strateji tərəfdaşlığa dair Anlaşma Memorandumunu imzalayıb. Lobbi təşkilatlarının təsiri ilə Azərbaycana qarşı qərəzli qərarlar və qətnamələrin hüquqi əsası olmadığı kimi, mənəvi dəyəri də olmur. Bunu Avropa Parlamentində qərəzli dairələr də qəbul etməlidir. Azərbaycan belə hüquqi qüvvəsi olmayan sənədlərlə yolundan dönən deyil.
Tahir TAĞIYEV
