Əli Mustafayev: “Ukrayna müharibəsindən ən çox qazanan Ermənistandır”
“Rusiya ilə münasibətlərə görə sanksiyalara məruz qalmağa razı ola bilmərik”. Bunu Ermənistanın baş naziri Nikol Paşinyan mətbuat konfransında deyib.
Daha sonra Paşinyan bunları qeyd edib: “Ermənistan sanksiyalara məruz qalmamaq çərçivəsində Rusiya ilə əməkdaşlıq edir. Ermənistanla Rusiya arasında tərəfdaşlıq strateji xarakter daşıyır, lakin İrəvan Qərbin sanksiyalarından yayınmağa imkan verən çərçivədən kənara çıxmayacaq. Amma eyni zamanda, Ermənistan sanksiyalar altında qalmağa tab gətirə bilməz. Ermənistan Avrasiya İqtisadi Birliyinin üzvüdür. Rusiya ilə də münasibətlərimiz strateji tərəfdaşlıq səviyyəsindədir, lakin eyni zamanda, razı ola bilmərik ki, Ermənistan sanksiyalara məruz qalsın. Buna görə də Rusiya ilə sanksiyalar altına düşməməyə imkan verəcək çərçivədə əməkdaşlıq edəcəyik”.
Bütün bunları Paşinyanın Rusiyaya yönəlik güc nümayişi saymaq olarmı? Ümumən, ekspertlər bunu necə dəyərləndirir?
- “Qərbin sanksiyalarla bağlı təzyiqlərini bir formada yumşaltmağa çalışırlar və bunun üçün alibi axtarırlar”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafayev buna bir neçə aspektdən yanaşdı: “Əslində, o belə danışmaqla tipik erməniliyin mahiyyətini ortaya qoyur. Çünki həm Qərbin yanında olmaq istəyir, həm də Rusiyanı incitmək istəmir. Həm bir formada Ermənistanın Rusiya ilə əməkdaşlığına haqq qazandırmaq istəyir, həm də bununla paralel Qərbin sanksiyaları altına düşmək istəmir. Bununla əslində ermənilərin əsl niyyətlərinin mahiyyəti açılır. Erməni rəzilliyini, riyakarlığını artıq bütün dünya görür. Elə böyük siyasi hadisələr baş verir ki, nəticədə maskalar bir-bir yırtılır. Ermənistan bir tərəfdən Rusiyanı incitmək istəmir və Moskvanın imkanlarından maksimum faydalanmağa çalışır. Yəni Rusiya tam zəifləyənə qədər ondan faydalanmaq istəyirlər. Nəzərə almaq lazımdır ki, Ukrayna müharibəsindən ən çox qazanan Ermənistandır. Rusiyanın İT şirkətləri Ermənistanda fəaliyyət göstərir və yüz milyonlarla dollar ölkə iqtisadiyyatına fayda verirlər. Üstəlik, digər rus şirkətləri də fəaliyyətini sanksiyalar səbəbindən orada qurub. Digər tərəfdən də, Qərbin sanksiyalarla bağlı təzyiqlərini bir formada yumşaltmağa çalışırlar. Bunun üçün də, bir növ, alibi axtarırlar. Ermənistan Rusiyaya görə sanksiyalara məruz qalmaq istəmir. Paşinyan deyir ki, Rusiya ilə strateji tərəfdaşıq, amma sanksiyalara da məruz qalmaq istəmirik. Bu o deməkdir ki, sanksiyalardan kənara çıxaq, amma elə olsun bu, bizə qarşı təhdidə çevrilməsin. Ermənilər elə xarakterə malikdilər ki, hər situasiyadan faydalanmağa çalışırlar. Rusiyanın düşdüyü ağır vəziyyətdən istifadə etməyə çalışırlar. Əgər Rusiya Ukrayna müharibəsində qalib gəlsə, o zaman mövqelərini 180 dərəcə dəyişəcəklər. Proseslərin əksi baş verərsə, o zaman Ermənistan Rusiyadan üz çevirən ölkələrin önündə gələcək. Ona görə də Ermənistanın apardığı siyasəti birmənalı qiymətləndirmək çətindir”.
Vidadi ORDAHALLI
