İranın Azərbaycandakı casus şəbəkəsinə qarşı keçirilən əməliyyat “İnter az” telekanalı və “Salamnyus” agentliyini də əhatə edib. Əməliyyat nəticəsində 7 nəfər saxlanılıb. Bu media resurslarının İran tərəfindən maliyyələşdirildiyi və molla rejimini təbliğ etdiyi üzə çıxıb.
Hər iki media resursunun İran rejiminə bağlılığını təkcə informasiya siyasəti yox, maliyyə mənbələri də təsdiq edir.
“İnterazTv” 2002-ci ildə Moskvada təsis olunub. İlk təsisçisi və prezidenti mərhum jurnalist Saleh Xudiyevdir və yarandığı vaxt əsas hədəfi Azərbaycanın milli-mənəvi dəyərlərinin təbliği olub. Lakin məlumatlara görə, sonradan İran rejimi kanalı ələ keçirir. Kanalın “haqqımızda” bölməsində məqsəd kimi “milli-mədəni dəyərlərin təbliği” qeydi saxlanılsa da, molla rejiminin təbliğat xətti əsas istiqamət olaraq seçilir.
Kanalın saytında təbliğat gündəlik xəbərlər üzərindən həyata keçirilsə də, peyklə yayımlanan verilişlərində bu daha açıq formada əksini tapır: molla rejiminin ideoloji xəttinə uyğun dini verilişlər yayımlanır, xəbərlər həm bölgədə, həm dünyada rəsmi Tehranın mövqeyinə uyğun tirajlanıb.
Məlumatlara görə, İran rejimi kanalı ələ keçirdikdən sonra maliyyələşmə və nəzarət işini Hacı Mətləb Bağırov adlı şəxs həyata keçirir. Əslən Cəlilabad rayonundan olan Mətləb Bağırov Qumda təhsil alıb. Daha sonra Moskvada biznes qurub, əsasən Rusiyada yaşasa da, İrana intensiv səfərlər edir və bu gün belə Qum şəhərində dini mövzularda tələbələrə moizələr oxuyur. M.Bağırovun Rusiyadakı soydaşlarımızın Qumda təhsil alması və İran xüsusi xidmət orqanları ilə əlaqələr qurmasında “vasitəçi” rolu oynadığı haqda məlumatlar var. Kanalın Bakı ofisindəki əsas nəzarətçi (eyni zamanda, “salamnyus” agentliyində də) Mətləb Bağırovun dostu, İslam Partiyasının üzvü olmuş Rəşad Dadaşov adlı şəxs olub. 2016-cı ildə kanalda əməkdaşların əmək haqları ilə bağlı problem yarananda da M.Bağırovun adından kollektivlə görüşən şəxsin R.Dadaşov olduğu haqda məlumatlar mediada yayılıb.
Çox güman ki, İranın mediaya sızdırdığı agentura şəbəkəsi bununla bitmir. Maraqlıdır, İran mediada qurduğu casus şəbəkəsinə daha hansı işləri icra etdirə bilər?
Media məsələri üzrə ekspert Azər Həsrət “Bakı-Xəbər”ə açıqlamasında bildirdi ki, İrana bağlı olan media qurumlarının Azərbaycandakı fəaliyyəti yeni xəbər deyil: “Onlar uzun illərdi fəaliyyət göstərirlər. Söhbət yalnız “interaz” və “salamnyus”dan getmir. Azərbaycan dövləti zaman-zaman onlarla bağlı gərəkli tədbirləri görüb. Təəssüflər olsun ki, Azərbaycan dövlətinin təhlükəsizlik baxımından atdığı bu addımları diskreditasiyaya uğratmağa çalışıblar. Özəlliklə də, Azərbaycan müxalifətinin önündə gedənlər İranla bağlı görülən tədbirləri gözdən salmağa başlayıblar. Dəfələrlə həmin şəxslərin beynəlxalq platformalarda ABŞ səviyyəsində müdafiə edildiyinin şahidi olmuşam. Etirazımı bildirmişəm və ABŞ kimi ölkənin niyə bu cür adamları müdafiə etdiyinin izahatını da istəmişəm. Bizim Qərbə meylli olan dairələrimiz həmin adamları insan haqlarını qoruyan fəallar kimi təqdim ediblər. Güya Azərbaycan hakimiyyəti insan haqlarını qoruyan jurnalistləri həbsə atıb kimi izahlar verirdilər. İzah etmişik ki, əslində isə onlar dünyəvi dövləti devirib, yerində fars-molla rejimi qurmağa çalışırlar. Əməliyyatın həyata keçirildiyi iki media qurumuna baxdıqda, zahirən özlərini belə göstərirlər ki, güya bizim yanımızdadırlar, haqq işimizə dəstək verirlər. Nisbətən alt qata baxanda bəlli olur ki, onlar sırf ideoloji ekspansiya ilə məşğul olublar. Dövlət bunun fərqinə vardığı üçün məhz bu addımları atıb. Azərbaycanda fəaliyyət göstərən media quruluşları niyə İran kimi ölkənin təbliğatını aparmalıdır? Belə şəbəkələrin tam deşifrə edilməsi və orada təmsil olunanların məsuliyyətə cəlb edilməsi lazımdır. Bunların ən başlıca məqsədləri dünyəvi dövlət modelimizi dəyişib, yerində orta əsrlərdə ilişib qalmış bir dövlət modeli qurmaq olub. Mediadakı agentura şəbəkəsi də məhz bu yöndə olan tapşırıqları icra edib. İrana indiyə kimi rəğbət bəsləmiş fəallar, jurnalistlər bu yanlış yoldan dönməlidirlər”.
Məhəmmədəli QƏRİBLİ
