Ötən həftə Azərbaycanın İrandakı səfirliyinə terror hücumu olub. “Kalaşnikov” avtomatı ilə silahlanan İran vətəndaşı Yasin Hüseynzadə səfirlik binasına daxil olaraq mühafizə xidmətinin rəisini öldürüb, 2 əməkdaşı isə yaralayıb. Hadisədən bir qədər sonra terrorçu saxlanılıb. Maraqlı məqam isə bundan sonra baş verib.
Belə ki, terrorçu İran telekanallarına müsahibə verib. Bunu əks etdirən görüntülər də yayılıb. Qeyd edək ki, dünyanın heç bir yerində belə bir şey görünməyib. Terror təşkil edən adamı polisə apararlar, sorğu-sual edərlər. Sonra məhkəmədə söz verərlər ki, danışsın. Niyə kamera qarşısına keçirilib müsahibə alınmalıdır?
Terroçu əli qandallı dəmir barmaqlıqlar arxasında olmalı olduğu halda rahatlıqla müsahibə verməsi birmənalı qarşılanmayıb və etirazlara səbəb olub.
“İran rejimi məlum hadisə ilə bağlı özünü müdafiə etmək üçün terrorçunun dilindən sübut toplamağa çalışır, bu iş rejimin cılızlığından, acizliyindən xəbər verir”
Siyasi və Hüquqi Strateji Araşdırmalar Mərkəzinin rəhbəri Xəyal Bəşirov “Bakı-Xəbər”ə açıqlamasında qeyd etdi ki, İranın dövlət siyasəti terror təşkilatları vasitəsilə terror törətməkdir. Terror törədilməsi İran rejimi üçün adi haldır: “Terrorçular da İranın hazırkı rejiminin mühafizəsi altındadır. “Kalaşnikov” avtomatı ilə silahlanan İran vətəndaşının hazırda həbsdə olub-olmaması da müəmmalıdır. Terrorçunun rahat şəkildə müsahibə verməsi həm mənəvi, həm də hüquqi baxımdan düzgün deyil. İstənilən cinayətkar, xüsusilə də terrorçunun dərhal müsahibə verməsi və bunu sübut kimi cəmiyyətə təqdim etmələri ondan xəbər verir ki, bu cinayətin istintaqının hansı istiqamətdə araşdırılacağı artıq bəllidir. Hesab edirəm ki, İran rejimi məlum hadisə ilə bağlı özünü müdafiə etmək üçün terrorçunun dilindən sübut toplamağa çalışır. Bu isə rejimin cılızlığından, acizliyindən xəbər verir. Zənnimcə, terrorçunun verdiyi müsahibəyə inam və etimad olmamalıdır. Əlində silahla diplomatik korpusun nümayəndələrini öldürməyə çalışan şəxsin sözünə etimad etmək olmaz. Onu da deyim ki, İranın terrorçudan fəxri qonaq kimi rahat şəkildə müsahibə alması digər terrorçular üçün stimul olacaq. İran bununla ayrı-ayrı terrorçulara mesaj verir ki, siz narahat olmayın, gələcəkdə sizinlə bağlı istənilən addım nəzarətimizdədir və baş verəcək hansısa terror hadisəsindən sonra sizə də eyni münasibət olacaq”.
Həmsöhbətimiz onu da əlavə etdi ki, məlum hadisədən dərhal sonra İran tərəfi bəyanat verdi. Bəyanatda hadisənin terror deyil, məişət zəminində baş verdiyi deyilir. Sanki bu bəyanat əvvəlcədən hazır idi ki, hadisə baş verən kimi yayımlasınlar.
X.Bəşirovun sözlərinə görə, məlum hadisədən sonra Azərbaycanın İrandakı səfirliyinin fəaliyyəti dayandırılıb. Azərbaycan tərəfi səfirliyin fəaliyyətinin tam dayandırılması ilə bağlı mövqe bildirməsə də, bu gözləmə deməkdir: “Yəni biz İranın bundan sonra atacağı addımlarla bağlı növbəti münasibətlərimizin müqəddəratını düşünürük. Məlum hadisə ilə bağlı İranın atdığı yeganə addım onun terror hadisəsini məişət zəmini ilə əlaqələndirməsidir. Bu isə o deməkdir ki, İran terror cinayətinin araşdırılmasını şəffaf və ədalətli şəkildə aparmayacaq. İranın bundan sonra atacağı addımlar həmin cinayətin şəffaf, ədalətli şəkildə araşdırılması olmalıdır. Bu isə o halda mümkün ola bilər ki, həmin işdə Azərbaycandan olan nümayəndələr də iştirak etsin. Əksi olarsa, o deməkdir ki, İran rejimi bəzi mətləblərin üstünün açılmaması üçün azərbaycanlıların iştirakını təmin etmir. Bu isə o deməkdir ki, İran həmin terror hadisəsi ilə birbaşa əlaqəlidir”.
Günel CƏLİLOVA
