İranın Azərbaycana qarşı qərəzli siyasəti, Tehran rejiminin ölkəmizdə qarışıqlıq yaratmaq üçün müxtəlif vasitələrə əl atmaq cəhdi, bu məqsədlə casus şəbəkəsi yaratması heç kimə sirr deyil. Elə vaxtaşırı ifşa edilən İran casus şəbəkəsi də bunun təsdiqidir.
Qeyd edək ki, ötən ilin noyabrında Dövlət Təhlükəsizliyi Xidməti (DTX) İrana bağlı böyük bir casus şəbəkəsini ifşa etmişdi. İran İslam Respublikası xüsusi xidmət orqanları nümayəndələrinin Azərbaycana qarşı həyata keçirdiyi kəşfiyyat-pozuculuq fəaliyyətinin qarşısının alınması, yaradılmış casus şəbəkəsinin ifşa olunması istiqamətində DTX tərəfindən kompleks əməliyyat-istintaq tədbirləri öz mühüm nəticəsini vermişdi. Həyata keçirilən tədbirlər nəticəsində müəyyən edilmişdi ki, Xəzər Dəniz Neft Donanmasında gəmi kapitanı vəzifəsində işləyən Əsgərov Zahir Fəxrəddin oğlu, Rəsulov Elnur Akif oğlu, Ağazadə Bəxtiyar Rafiq oğlu vi digərlərindən ibarət böyük bir şəbəkə ifşa olunmuşdu. Araşdırmalar zamanı onların İran xüsusi xidmət orqanının tapşırığı əsasında fəaliyyət göstərdiyi də üzə çıxmışdı. Amma bu hal da İranın Azərbaycana qarşı məkrli fəaliyyətinin sona çatmasi ilə nəticələnmədi. İrana bağlı yeni casus şəbəkəsinin ifşası da bunun göstəricisidir. Qeyd edək ki, yanvarın son günündə Bakıda İranın casus şəbəkəsinə qarşı xüsusi əməliyyat keçirilib. Bu dəfə Daxili İşlər Nazirliyi tərəfindən əməliyyat keçirilən məkanlar arasında “SalamNews” informasiya agentliyi və “İnter Az” da olub. Daxili İşlər Nazirliyinin əməkdaşları tərəfindən həyata keçirilən xüsusi əməliyyat tədbirləri nəticəsində Bakıda və respublikanın digər bölgələrində 7 nəfər – A.T.Kərimov, E.A.Rəhimov, İ.Ə.Ələkbərov, M.N.Cəfərov, H.H.Cabbarlı, F.S.Əbdülov və A.Ə.Cümşüdov şübhəli şəxs qismində tutulub. Xatırladaq ki, “İnterAz” telekanalı 2002-ci ildə yaradılıb və 2007-ci ildə Rusiya Federal Vergi Xidmətinin Rayonlararası müfəttişliyində qeydiyyata alınıb. Əvvəllər baş ofisi Moskvada yerləşən kanalın təsisçisi jurnalist Saleh Xudiyev olub. 2016-cı ildə telekanalı İranın Qum şəhərində və Suriyada dini təhsil almış “Hacı Mətləb” kimi tanınan Mətləb Bağırov alıb. Hazırda kanalın baş ofisi Türkiyəyə keçirilib və “Türksat” peyki üzərindən yayımı təşkil olunub. Telekanalda İranın rəsmi şəxslərinin açıqlamaları, bu ölkənin maraqlarına xidmət edən məlumatlar çoxluq təşkil edir. Əvvəlki dövrdə telekanalda hazırda “Nardaran hadisələri”nə görə həbsdə olan Hacı Taleh Bağırzadə, Hacı Zülfüqar Mikayılzadə və İranla yaxınlığı ilə seçilən digər dindarlar geniş reklam olunub. Kanalın sahibi Mətləb Bağırov əslən Cəlilabad rayonundandır. Onun hətta İran, Rusiya və Azərbaycanda biznes obyektlərinin olduğu bildirilir.
“SalamNews” informasiya agentliyi fəaliyyətə 2010-cu ilin mart ayının 1-dən başlayıb. İnformasiya Agentliyinin təsisçisi “İnterAz” TV-nin sahibi Hacı Mətləb Bağırovdur. Agentliyin Bakı ofisi “İnterAz” TV-nin Bakı nümayəndəliyi ilə eyni ünvanda, Yasamal rayonu ərazisində yerləşir. “SalamNews” agentliyinin 2017-ci ildə farsdilli versiyası hazırlansa da, sonradan bu layihə qeyri-müəyyən səbəblərdən təxirə salınıb. Hazırda sayt Azərbaycan və rus dillərində fəaliyyət göstərir. “SalamNews” agentliyi əvvəlki dövrdə geniş İranyönümlü dini təbliğat aparsa da, hazırda İranın rəsmi şəxslərinin, dindarlarının müxtəlif açıqlamalarını yayımlayır, dini maarifləndirmə xarakterli materiallar verir. Tehran rejimi bu media vasitələrindən Azərbaycan əleyhinə siyasətində istifadə edib. Halbuki, Azərbaycan qonşulara həmişə mehriban, dost münasibət bəsləyib. Ötən əsrdə ikinci dəfə müstəqilliyimizi bərpa etdikdən sonra İranın qısqanc siyasətinə baxmayaraq, Azərbaycan Arazın o tayındakı hökumətlə qarşılıqlı hörmətə əsaslanan əməkdaşlıq əlaqələri qurmağa çalışıb. Hətta Birinci Qarabağ müharibəsində destruktiv fəaliyyətinə baxmayaraq, Azərbaycan sonrakı illərdə də İranla qonşuluq münasibətlərinin inkişafına önəm verib, rəsmi Tehranı regional aktor kimi qəbul edib. Lakin İkinci Qarabağ müharibəsində qələbə qazanmağımız İrandakı teokratik rejimin ciddi narahatlığına səbəb olub və bunu artıq açıq şəkildə də nümayiş etdirir. Elə İran casus şəbəkələri də bunun əyani təsdqilərindən biridir. Ümumiyyətlə, İranın anti-Azərbaycan mövqeyi artıq dayanıqlı xarakter almağa başlayıb və bu mövqenin daha da genişləndirilməsi üçün müxtəlif adımlar atılıb. Bu müstəvidə İran Azərbaycana qarşı ermənipərəst siyasətini daha intensiv hala gətirib. Ermənistanın sərhədlərini öz qırmızı xətti elan edən İran bu ölkəni indi də yeni silahlarla təchiz etmək istəyini davam etdirir. İslam dövləti olmasına baxmayaraq, faşist xislətli erməni terrorçularını dəstəkləməsi İranın dini dəyərlərə hörmətsizliyi kimi qiymətləndirilir. Azərbaycana qarşı atılan addımlar artıq İranın özü üçün bumeranq effekti verir. Onun casus şəbəkələrinin ölkəmizdə ifşası isə İranın daha zəif duruma düşməsini şərtləndirir.
Tahir TAĞIYEV
