BMT-nin Beynəlxalq Ədalət Məhkəməsinin iclasında Ermənistanın beynəlxalq hüquqi məsələlər üzrə nümayəndəsi Yeqişe Kirakosyan bəyan edib ki, Ermənistan BƏM-dən Azərbaycana qarşı bir sıra qərarların qəbul olunmasını, tədbirlərin görülməsini xahiş edir:
“Birincisi, Azərbaycan Laçın dəhlizi ilə hər iki istiqamətdə sərbəst hərəkəti pozan etiraz aksiyalarının təşkilinə və onlara şərait yaratmasına son qoymalıdır. İkincisi, Azərbaycan hər iki istiqamətdə bütün insanların, malların və nəqliyyat vasitələrinin maneəsiz hərəkətinə zəmanət verməlidir. Üçüncüsü, Azərbaycan təbii qazın verilişini dərhal və tamamilə bərpa etməli, Dağlıq Qarabağa digər məhsulların göndərilməsini əngəlləməkdən çəkinməlidir”.
Daha sonra Y.Kirokasyan onu da əlavə edib ki, BMT Qarabağ erməniləri üçün son çarədir.
BMT məhkəməsinin Ermənistanın qaldırdığı iddia ilə bağlı necə qərar qəbul edəcəyi bəlli deyil. Ancaq BMT məhkəməsi hətta Ermənistanın tələblərini qəbul etsə belə, bunun Azərbaycan üçün hər hansı hüquqi kəsəri olacaqmı? Nəzərə alsaq ki, 30 il BMT Təhlükəsizlik Şurasının qətnamələri icra olunmadığı halda Beynəlxalq Ədalət Məhkəməsinin hətta belə bir qərar çıxaracağı halda Azərbaycanın onu icra etməsi mümkündürmü?
“Ona görə ki, ərazi hüquqi baxımdan Azərbaycana məxsusdur”
Sözügedən məsələyə aydınlıq gətirən Aydınlar Partiyasının sədri, hüquqşünas Qulamhüseyn Əlibəylinin fikrincə, BMT-nin müvafiq məhkəməsi ermənilərin xeyrinə qərar çıxarsa belə, bunun Azərbaycan üçün hansısa hüquqi kəsəri olmayacaq: “Ona görə ki, ərazi hüquqi baxımdan Azərbaycana məxsusdur. Qarabağdakı etnik ermənilərin blokadaya salınması ilə bağlı deyilənlər reallığı əks etdirmir. Çünki həm ora ərzaq daşınır, həm də digər zəruri vasitələr. Əslində, ötən 30 il ərzində Azərbaycan işğal olunmuş ərazilərlə bağlı iddia qaldırmalı idi. Əfsuslar olsun ki, müəyyən səbəblərdən bunu etməmişik. Danışıqlar prosesinə zərər gəlməsin deyə, bunun üzərinə getməmişik. Ona görə də erməni həyasızlığını nəzərə alsaq, onlardan nə desən gözləmək olar. Ancaq onların qaldırdığı iddiaların Azərbaycan üçün heç bir hüquqi məsuliyyət yükü yoxdur. Azərbaycan öz ərazisində müəyyən tədbirləri həyata keçirir. Bizim vətəndaşlar öz ərazimizdə etiraz aksiyaları keçirir və tələblərimiz də ortadadır. Kimsə həbs olunanda o dəqiqə müəyyən beynəlxalq təşkilatlar hay-küy qaldırır. Neçə müddətdir Qarabağda sərvətlərimiz qanunsuz olaraq istismar olunur, ekologiyamıza zərər vurulur, bəs bütün bunlara görə niyə etiraz etmirlər? Axı Qarabağın Azərbaycana məxsusluğunu BMT qəbul edib. Laçın yolunda QHT-lər etiraz aksiyası keçirir. Belə olan halda beynəlxalq təşkilatlar hansı əsasla Azərbaycan dövlətinə qarşı tələblərlə çıxış edirlər? Bütün bunlara rəğmən, Azərbaycan işğal olunmuş ərazilərdə törədilən vandalizm aktları ilə bağlı beynəlxalq məhkəmələrdə səylərini gücləndirməlidir. Hesab edirəm ki, biz bununla bağlı bütün vasitələri işə salmalıyıq”.
Vidadi ORDAHALLI
