“Yaxın keçmişdə aşkarlanan böyük yaşıl enerji potensialı da Azərbaycanın önəmini daha da artırır”. Bunu Prezident İlham Əliyev Budapeştdə Macarıstanın Baş naziri Viktor Orban ilə birgə mətbuata bəyanatında deyib.
Ölkə başçısının sözlərinə görə, yaşıl enerji ilə bağlı olan və artıq icra olunan layihələr bizi Avropa üçün daha da yaxın edəcək: “Keçən ay imzalanmış sazişə əsasən, Azərbaycan yaşıl enerjisini Avropaya çatdıracaq və bu gün bu məsələlər bir daha müzakirə edildi. Bir neçə gündən sonra Bakıda keçiriləcək birinci rəhbər komitədə bu layihədə cəmləşən ölkələr – Azərbaycan, Gürcüstan, Macarıstan və Rumıniya bir araya gələrək gələcək fəaliyyətin konsepsiyası üzərində işləməyə başlayacaqlar. Bu, çox böyük sərmayə tələb edən layihədir. Burada həm yaşıl enerjinin istehsalı, ötürülməsi, bazarlara çatdırılması, eyni zamanda, Qara dənizin dibi ilə kabelin çəkilməsi - bütün bu layihələr böyük maliyyə mənbəyi tələb edir, eyni zamanda, çox ciddi koordinasiyanı tələb edir. Ona görə biz Bakıda fevralın 3-də keçiriləcək toplantıda ilkin addımı atacağıq və beləliklə, Avropa qitəsinin enerji təhlükəsizliyi daha dolğun və əhatəli şəkildə təmin ediləcəkdir”.
“Bütün bunlar Azərbaycanın geosiyasi mövqeyini daha da gücləndirəcək”
Məsələyə münasibət bildirən millət vəkili Vüqar Bayramovun fikrincə, Azərbaycan yalnız ənənəvi enerji istehsalı deyil, eyni zamanda alternativ mənbələrdən əldə edilən enerji potensialına görə də fərqlənən ölkələrdəndir: “Artıq Azərbaycan Avropa İttifaqına alternativ mənbələrindən əldə etdiyi enerjini ixrac etmək niyyətindədir. Bununla bağlı ötən il Rumuniyada anlaşma imzalanıb. Azərbaycanın yaşıl enerjisindən yalnız Rumıniya deyil, eyni zamanda Macarısta və gələcəkdə bir sıra digər Avropa ölkələri faydalanacaq. İlkin qiymətləndirmələr göstərir ki, yalnız son illər cəlb edilən investisiyalar hesabına Azərbaycan ilərzində alternativ mənbələrdən 14 min meqavat elektrik enerjisi istehsal edə biləcək. İlkin olaraq Qara Dənizin dibindən Rumuniyaya çəkilən xətt vasitəsi ilə Azərbaycan Avropaya 4 min meqavat elektrik enerjisi ixrac etmək niyyətindədir. Təbii ki, bu da Azərbaycanın Avropaya həm də alternativ enerji mənbələrindən elektrik enerjisi ixrac etməsinə imkan verəcək. Bu, bir tərəfdən enerji ixracatımızın divertifikasiyasına imkan verəcək. Yəni, təkcə neft-qaz ixrac etməyəcəyik. Artıq yaşıl enerjinin həm istehsalına, həm də onun ixracına şərait yaranacaq. Digər tərəfdən bütün bunlar Azərbaycanın geosiyasi mövqeyini daha da gücləndirəcək. Çünki praktiki olaraq Azərbaycan regionun enerji təhlükəsizliyinə töhvə verən ölkədir. Bu, həm də Azərbaycan üçün məhz bu konteksdən yeni imkanlar deməkdir. O baxımdan, son anlaşmalar və Macarıstanla müzakirələr göstərir ki, Azərbaycanla Avropa arasında münasibətlərin inkişaf etməsi fonunda, ölkəmiz artıq inovativ və alternativ mənbələrdən əldə edilən məhsullarla, xüsusən də yaşıl enerji ilə Avropa bazarına çıxmaq niyyətindədir. Gözlənilir ki, fevralın 3-də bununla bağlı Bakıda mühüm qərarlar qəbul olunacaq. Praktiki addımların atılması sürətləndiriləcək”.
Vidadi ORDAHALLI
