Hakim “Vətəndaş müqaviləsi” partiyasının deputatı Vigen Xaçatryan Qarabağda cəmi 40 min erməninin yaşadığını bəyan edib və separatçılarla Bakı arasında dialoqun zəruriliyini qeyd edib:
“Gərginlik Rusiya və Azərbaycanın maraqlarından irəli gəlir. Biz Xankəndi ilə Bakı arasında birbaşa dialoqa keçməliyik. Qarabağda yaşayan 40 min qəzəbli sakin Ermənistana gələrək hakimiyyətin dəyişdirilməsini tələb etsə, Rusiya Federasiyası üçün yaxşı olar. Qarabağ Azərbaycanla birbaşa dialoq aparmalıdır”.
Burada diqqəti çəkən məqam odur ki, ilk dəfə rəsmi səviyyədə Qarabağdakı ermənilərin həqiqi sayı etiraf olunur. Halbuki, son vaxtlara qədər Qarabağda 120 min erməninin yaşadığı deyilirdi. Hər vasitə ilə inandırmağa çalışırdılar ki, guya Qarabağda ermənilərin sayı çoxdur. Ancaq hakim partiyanı təmsil edən deputatın açıqlaması göstərdi ki, bugünə qədər Qarabağ ermənilərinin sayı şişirdilib.
“Paşinyan əsas opponentlərinə bununla qurşaqdan aşağı zərbə endirməyi planlaşdırır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Ermənistanda iqtidar partiyası təmsilçisinin açıqlamasında diqqəti çəkən məqam həm də Azərbaycanı Qarabağdakı seperatçı rejimlə danışıqlara cəlb etmək istəyidir. Rəsmi İrəvan bununla əlaqədar qarşısına qoyduğu bir neçə problemin realizə olunmasına ümid edir. Əvvəla, Qarabağla bağlı problemin həllini oradakı separatçı rejimə həvalə etməklə bununla əlaqədar məsuliyyətdən kənarda durmağa çaləşır. Zira bu halda danışıqlardakı uğursuzluğa görə ittiham obyekti Paşinyan iqtidarı deyil, onun əsas siyasi opponenti olacaq “Qarabağ klanı” və onun oradakı təmsilçiləri olacaq. İkincisi, Paşinyan Azərbaycanla qarşıdurmanın kökündə onun hökumətinin deyil, sələflərinin məsuliyyət daşıdığını qabartmaqla öz elektoratının növbəti dəfə etimadını qazanmaq istəyir. Əsas opponentlərinə bununla qurşaqdan aşağı zərbə endirməyi planlaşdırır. Üçüncüsü, Azərbaycanı Qarabağdakı rejimlə danışıqlara sövq etməklə o, vaxt qazanmaq, əlbəttə Moskva razılaşmasının şərtlərini yerinə yetirməkdən yayınmaq istəyir. Bu da hakimiyyətin korporativ maraqları baxımindan anlaşılandir. Zira Moskva razılaşmasının şərtlərinin yerinə yetirilməsi ölkə daxilində onun olan-qalan imicinə sarsıdıcı zərbə olacaq. Bu halda müxalifət və millətçi kəsim onu dövlət və xalq maraqlarına xəyanətdə suçlayacaq. Nəhayət, seperatçə rejimin danışıqlar masası arxasına gətirilməsi rəsmi İrəvanın mövqeyinə təsir edən, onu yönəldən bəlli, qlobal maliyyə mərkəzlərinin bölgədə müstəqil siyasət yeridən rəsmi Bakının mövqelərinə təhdid imkanlarının saxlanılması baxımından da maraqlıdır. Bütün bunlarin fonunda rəsmi Bakının seperatçılarla danışıqlar masası arxasında oturmayacağı da bəllidir. Ona görə ki, bu bizim daxili işimizdir. Digər tərəfdən, dunyada heç bir dövlət terror və separatçı mövqe sərgiləyən quvvələrlə danışıqlara getmir. Bu halda isə Paşinyan rəsmi Bakının sülh prosesinə aparan yoldan kənarda durduğunu, onun deyil, məhz rəsmi Bakının bölgədə sülh və əməkdaşlıq üçün təhlukə təşkil etməsi ilə bağlı cəfəng fikirləri yayımlayaraq informasiya müharibəsini öz hakimiyyətinin maraqlarına cavab verə biləcək müstəviyə keçirməyə çalişacaq. Qarabağda 120 deyil, cəmi 40 min erməninin yaşaması barədə faktı qabartmaqla hakim partiya təmsilçisi “Qarabağ klanı”nın burada elə də böyük gücə malik olmaması ilə bağlı məsələni gundəmə gətirmiş olub”.
Vidadi ORDAHALLI
