Avropa Parlamentinin Azərbaycan üzrə daimi məruzəçisi Jelyana Zovko bəyanat yayaraq, rəsmi Bakını Laçın dəhlizinin “blokada”sına dərhal son qoymaq üçün bütün lazımi tədbirləri görməyə çağırıb.
Məruzəçi bunu belə əsaslandırıb: “Dağlıq Qarabağı Ermənistanla birləşdirən Laçın dəhlizindən ciddi narahatam, bu dəhliz artıq dörd həftədir ki, (Azərbaycan tərəfindən) bağlanıb və bu, ərzaq və digər zəruri mallara, eləcə də xidmətlərə çıxışa mane olur. Sülh prosesi üçün hər hansı humanitar nəticələrin və digər geri dönməz mənfi nəticələrin qarşısını almaq üçün blokada gecikmədən götürülməlidir. Ona görə də mən Azərbaycan hökumətinə müraciət edirəm: 9 noyabr 2020-ci il tarixli üçtərəfli atəşkəs bəyanatı ilə götürülmüş öhdəliklərə öz səlahiyyətləri daxilində əməl etsin, dəhliz boyu sərbəst hərəkətin bərpası üçün zəruri olan bütün tədbirləri həyata keçirsin və humanitar yardımın çatdırılmasını təmin etsin. Bu səbəbdən yerli əhali - ərzaq, dərman və digər əsas tələbat mallarının çatışmazlığı ilə üzləşib”.
Bu qədər ədalətsiz, yalan, qərəzli yanaşma olar? Axı Laçın yolu boyu ərzaq və digər məsulların keçidi üçün hər cür şərait yaradılır. O zaman belə qeyri-obyektiv çağırışdan sonra biz belə məruzəçiyə necə inanaq və ondan niyə imtina etməyək?
“Deputat Jelyana Zovkovun Azərbaycanla bağlı bu cür bəyanat verməsinin arxasında erməni diasporunun pulları dayanır”
Məsələyə münasibət bildirən siyasi şərhçi Azər Həsrətin fikrincə, istər Avropa Parlamentinin məruzəçisi olsun, istərsə də başqa beynəlxalq qurumun təmsilçisi olsun, onların Azərbaycana qarşı qeyri-obyektiv çıxışlarının tək bir mənbəyi var: “O da erməni təbliğatıdır. Yəni erməni təbliğatı gecə-gündüz durmadan işləyir. Kimi gəldi, harda gəldi tutub ona anti-Azərbaycan təbliğatı tətbiq edirlər. Biz nəzərə almalıyıq ki, dünyanın bir sıra yerlərində insanlar bölgəmizlə bağlı çox da məlumatlı deyillər. Özlərinə əziyyət verib gerçəkləri arşaşdırmağa da meyilli deyillər. Belə bir şəraitdən ermənilər vicdansızcasına sui-istifadə edirlər. Əlbəttə ki, təbliğatın qurbanı olanları şirnikləndirmək üçün pul kisəsinin ağzını da açırlar. Yəni buna görə bol-bol vəsaitlər xərclənir. Bütün bunları da xaricdəki erməni diasporu həyata keçirir. Məsələ ondadır ki, onlar bir an belə boş oturmurlar və Avropa Parlamentinin deputatlarını öz tərəflərinə çəkirlər. O baxımdan deputat Jelyana Zovkovun Azərbaycanla bağlı bu cür bəyanat verməsinin arxasında məhz erməni diasporunun pulları dayanır. Belə bir məruzəçi heç vaxt obyektiv ola bilməz. Ancaq bizim milyaderlər nə edir? Harda hansı siyasətçini Azərbaycanın xeyrinə obyektivliyə dəvət edirlər? Demək olar, heç yerdə. Görsək də, belə hallar həddən artıq azdır. Yəni problem bundadır. Ancaq bütün bunlara bərabər sevindiricidir ki, Prezident İlham Əliyev, eləcə də onun komandasında bu işləri yaxşı bilən bir sıra dövlət xadimləri boş oturmurlar. Onlar, xüsusilə dipıomatik kanallarla xarici işlər sistemi vasitəsilə öz şəxsi əlaqələri vasitəsilə bu cür qeyri-obyektiv çıxışlara, münasibətlərə öz reaksiyalarını verirlər. Ancaq bu da yetərli deyil. O üzdən hesab edirəm ki, biz tam səfərbər olmalıyıq. Diasporumuz da bu cür məsələlərdə hərəkətə keçməlidir. Oturub gözləməməlidilər ki, Bakıdan tapşırıq gələcək və onlar da hərəkətə keçəcək. Hər kəs özü müstəqil şəkildə bu məsələlərlə məşğul olmalıdır”.
Siyasi şərhçi hesab edir ki, yalnız bu yolla erməni yalanlarını ifşa etmək olar.
Vidadi ORDAHALLI
