Erməni mediası Azərbaycanın Qarabağ iqtisadi zonasına sığınaraq, öz varidatını Qərbin sanksiyalarından qorumağa çalışan rusiyalı milyarder Ruben Vardanyanın Xankəndidən qaçacağı barədə məlumat yayıb.
Ruben Vardanyanın yaxın vaxtlarda separatçıların “dövlət naziri” vəzifəsindən azad ediləcəyi yazılıb. İddiaya görə, buna səbəb Vardanyanın son qalmaqallı açıqlamalarıdır.
Vardanyanın “qalmaqallı açıqlamaları” dedikdə isə onunla Ermənistan Baş naziri Nikol Paşinyan arasındakı konflikt göstərilir. R.Vardanyan hər fürsətdə Paşinyanı tənqid edir, ən sonuncu çıxışında isə “Ermənistan hakimiyyəti bizə heç bir kömək etməyəcəyini bildirdi” deməklə, Paşinyanı hədəfə çıxarmışdı.
Vardanyanın öz hiyləsi öz başında çatlayandan – ekoloji terroruna qarşı azərbaycanlı ekofəalların aksiyası başlayandan sonra isə ona münasibət də dəyişdi. Artıq hər kəs anladı ki, Vardanyan yalnız sərvətini qorumaq və artırmaq üçün Qarabağdakı erməni icmasından sui-istifadə edir.
Erməni mediası yazır ki, Vardanyanın Qarabağı qoyub qaçmaqdan başqa şansı qalmaylb. Bunu hətta Azərbaycanın tələbi kimi də izah edirlər. İddialar var ki, bu baş versə, Azərbaycan Xankəndi ermənilərinə təzyiqi azaldar. Məgər Azərbaycanın tələbi Vardanyanla bağlıdır?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Vardanyanın Qarabağa gəlməsindən və dırnaqarası dövlət naziri vəzifəsini tutmasından əvvəl Azərbaycanla Qarabağ erməniləri arasında danışıqlar başlamışdı: “Bu çox müsbət bir proses idi. Sonradan həm Praqada, həm Soçidə Ermənistan, Fransa və Rusiya Azərbaycanın Qarabağ üzərində suverenliyini təsdiq edən sənədə qol çəkdilər və Azərbaycanın Qarabağ üzərində suverenliyini tanıdılar. Bundan sonra bizim ekologiya fəalları dekabrın 3-də belə bir razılığa gəldilər ki, dekabrın 10-da indi ermənilərin yaşadığı ərazilərdə yerləşən mədənlərin monitorinqini keçirsinlər. Razılaşma oldu, ancaq bu razılaşmanı Vardanyan və onun ətrafına toplaşan bir qrup pozdu. Bundan əvvəl də Azərbaycan Prezidenti qəti şəkildə demişdi ki, Azərbaycan hakimiyyəti Moskvanın oyuncağı olan Vardanyanla heç bir danışıq aparmayacaq. Bu vəziyyətdə ermənilər ona ümid edirlər ki, əgər Vardanyan getsə, bəlkə bu böhrandan çıxmaq mümkün ola. Açıq şəkildə də ondan Qarabağı tərk etməsini tələb edirlər. Ancaq Azərbaycanın problemi Vardanyanla bağlı deyil. Təbiidir, bizim tələbimiz budur ki, Vardanyan Qarabağı tərk etməlidir. Azərbaycan Qarabağda öz suverenliyini təmin etməlidir ki, bunu həm Rusiya, həm Ermənistan, həm də Fransa öz imzaları ilə təsdiq ediblər. Bunun üçün monitorinq keçirilməli və Laçın dəhlizində gömrük və sərhəd xidmətinin postları yerləşdirilməlidir. Həmçinin digər addımlar atılmalıdır. Bu digər addımların atılması üçün də Qarabağ erməniləri Azərbaycanın lazım bildiyi təmsilçiləri ilə danışıqlar aparmalı, bundan sonra zəruri işlər görülməlidir. Prosesə mane olan əsas şəxs Moskvanın Qarabağda yerləşdirdiyi həmin dırnaqarası dövlət naziri Vardanyandır. Güman etmək olar ki, o yaxın vaxtlarda Qarabağı tərk etmək məcburiyyətində qalacaq. Bundan sonra yəqin ki, digər problemləri də sakit, konsruktiv şəraitdə müzakirə edib, zəruri qərarlar qəbul etmək mümkündür. Əsas məsələ, Qarabağ üzərində Azərbaycanın süverenliyi təmin olunmalıdır və Qarabağda yaşayan erməni əhalisinin təhlükəsizliyi üçün lazımi addımlar atılmalıdır. Azərbaycan buna hazır olduğunu dəfələrlə bəyan edib”.
Məhəmmədəli QƏRİBLİ
