Məlum olduğu kimi, “Azərbaycan” qəzetində Prezident İlham Əliyevin hakimiyyətə gəlməsinin 19-cu ildönümü ilə bağlı müxtəlif millət vəkillərinin, dövlət adamlarının imzası ilə yazılar dərc olunub. Sözügedən məqalələrlə bağlı Konkret.az-ın Analitik qrupu araşdırma aparıb və bu yazıların əksəriyyətinin müxtəlif media orqanlarından “copy paste” olduğunu müəyyən edib.
Sözügedən saytın əməkdaşı apardığı təhlildən sonra fikrini “Azərbaycan dövlətinə belə qəzet lazımdırmı” sualı ilə tamamlayıb. Doğrudan da, müəllif o qədər tutarlı faktlar gətirir ki, bununla mübahisə etmək mümkünsüzdür. Yolverilməz bir haldır ki, söhbət Prezident movzusu olanda onun fəaliyyəti ilə bağlı yazılar “copy paste” edilib qəzetdən-qəzetə, saytdan-sayta yol açır. Bütün hallarda bu, xoş bir görüntü deyil. Çünki Prezidentin fəaliyyəti o qədər çoxşaxəlidir ki, hər dəfə yeni mövzu üçün ideya tapmaq mümkündür. Amma təəssüf ki, belə bir üsul seçilib. Ancaq “Azərbaycan” qəzeti dövlət qəzeti olaraq böyük ənənələrə malik olan bir qəzetdir. Bu sual “Azərbaycan dövlətinə belə qəzet lazımdırmı” kimi yox, “Azərbaycan” qəzetinə belə baş redaktor lazımdırmı” kimi qoyulsaydı, onu başa düşmək olardı. Amma bütünlüklə “Azərbaycan” qəzetinin inkar olunması məsələsini bir qədər başa düşmək olmur. “Azərbaycan” qəzetinin dövlət qəzeti olaraq böyük ənənəsi var. Əgər səhvlər varsa, bu qəzetin özünün təbiətindən gəlmir ki... Bu onu idarə edənlərin səhvidir. İdarə edənləri dəyişməklə bunları aradan qaldırmaq olar. Ona görə də “Azərbaycan” qəzetinin şanlı dövlətçilik ənənələrini qoruyub saxlamaq şərtilə yerdə qalan məsələləri həll etmək olar. Qəzetin baş redaktorunun, qəzetin başında duranların səhv buraxması hələ qəzetin səhv olması demək deyil. Qəzeti inkar etmək ayrı şeydir, redaktoru inkar və təftiş etmək ayrı şeydir. Bunlar bir-birindən fərqlidir. Bu səhvlər heç də böyük dövlətçilik ənənələri olan “Azərbaycan” qəzetinin gözdən salınmasına yol aça bilməz. Amma o yazını yazan da çox böyük faktlara söykənib, çox düzgün yazıb, yazını inandırıcı işləyib, yaxşı yazıdır. Bunlar öz yerində. Sadəcə olaraq, qəzeti idarə edən şəxslərin səhvlərini bütün qəzeti vurmaq üçün bir əsasa çevirmək olmaz. Qəzet şanlı dövlətçilik ənənələrinə malikdir, yaşamalıdır, fəaliyyətini davam etdirməlidir. Baş redaktorun buraxdığı səhvə görə müvafiq qərarın verilməsi bəlli orqanların işidir. Amma”Azərbaycan” qəzeti başqa məsələdir, baş redaktorun, onun başında duran şəxslərin buraxdığı səhvlər tamam başqa şeydir. Bunları eyniləşdirmək olmaz.
“Hansısa redaktorun, jurnalistin səhvinə görə bu cür ənənəsi olan qəzeti bağlamaq olmaz”
Azərbaycan Mətbuat Şurası İdarə Heyətinin üzvü Azər Həsrət “Bakı-Xəbər”ə bildirdi ki, sözügedən araşdırma ilə tanışdır və onu çox böyük təəssüf hissilə oxuyub. A.Həsrət qeyd etdi ki, mötəbər bir nəşrdə bu cür yanlışlıqların baş verməsi narahatlıq doğurur: “Əlbəttə, üzücü bir olaydı. O araşdırmanı mən də oxudum və çox təəssüfləndim ki, həqiqətən də Cumhuriyyətimizin yadigarı olan “Azərbaycan” qəzetində belə bir səhvə yol verilib. Təbiidir ki, burda Cumhuriyyətimizin yaşıdı olan “Azərbaycan” qəzetinin özünü hədəfə almaq düzgün deyil, yaxud “dövlətə belə bir qəzet lazımdırmı”, “onu bağlamaq lazımdırmı”, “Milli Məclisin niyə qəzeti olmalıdır” kimi suallar qoyulmamalıdır. “Azərbaycan” qəzeti əlbəttə lazımdır, əlbəttə yaşamalıdır, əlbəttə Milli Məclisin orqanı olaraq fəaliyyətini davam etdirməlidir. Bu birmənalıdır. Hansısa redaktorun, jurnalistin səhvinə görə götürüb bu cür ənənəsi olan qəzeti bağlamaq olmaz”.
A.Həsrətin sözlərinə görə, burada problem başqadır və bu problem də birbaşa “Azərbaycan” qəzeti ilə bağlı deyil. A.Həsrətin qeyd etdiyinə görə, parlamentdə oturan əksər deputatlar yazı yaza bilmir. “Şəxsən məndə məlumat var ki, hətta bir çox deputatlar qəzetlərə, saytlara verdikləri açıqlamaları belə yazdırırlar. Bu bilirsiz nə deməkdir? O deməkdir ki, adamların, deputatların böyük əksəriyyəti normal yazı belə yaza bilmirlər. Normal yazı yaza bilməyən adamlar parlamentdə niyə hələ də otururlar? Sual budur. İndi qəzetə məqalələr hardansa gəlib, onlar da baxıb görüblər ki, filan deputatın məqaləsidir, götürüb veriblər. Ağıllarına gəlməyib ki, bu deputat bunu hardansa
köçürər, yaxud da köçürtdürər. Problem ondadır. İstəyirəm, mənim özümün də başıma gələn bir olayı sizə danışım. İllər öncə ABŞ-da insan haqlarının durumu ilə bağlı dinləmələrə dəvət edilmişdik. Səfəri o vaxtkı QHT Şurası təşkil etmişdi. Məndən xahiş etdilər ki, bir məruzə hazırlayım. Mən də qəşəng araşdırma apardım. ABŞ zatən gündəlik məşğul olduğum ölkə olduğu üçün yaxşı informasiyalar topladım və geniş bir araşdırma hazırlayıb təqdim etdim. Bu araşdırmanı “Azərbaycan” qəzeti də, “Xalq qəzeti” də, “İki sahil”də, “Bakı-Xəbər” də, başqa qəzetlər də tam şəkildə dərc etdilər. Aradan bir neçə ay keçdikdən sonra yenə də ABŞ-da insan haqları ilə bağlı dinləmələr keçirildi, məni ora sadəcə iştirakçı kimi dəvət etdilər, ovaxtkı deputatlardan birinə də məruzə üçün mövzu tapşırnışdılar, o məruzə edirdi. Şoka düşdüm ki, həmin deputat mənim qəzetlərdə dərc edilən həmin hesabatımı cümləbəcümlə oxudu, öz adına təqdim etdi. Problem bundadır. Ona görə də, qəzetin üzərinə hücumları dayandırmaq lazımdır. Sadəcə olaraq, səhvin haradan qaynaqlandığını da göstərdim. Onun üzərinə getmək lazımdır. Normal deputatlar seçmək lazımdır parlamentə və onlar lazım gələndə bu cür məqalələrlə çıxış etməyi bacarmalıdırlar. Bacarmırsansa sənin nə işinə qalıb ki, ona-buna yazdırırsan, o da ordan-burdan köçürür gətirib səni də, qəzeti də pis vəziyyətə qoyur, ictimaiyyəti də narahat edir. Yeri gəlmişkən deyim ki, məqalə köçürüb pulla satmaq bir adət halını alıb. Biz tez-tez belə hallara rast gəlirik. İşbazlar var, deputatlara, müəllimlərə, kimə gəldi məqalə satırlar. Pulunu alır, “narahat olma mən sənə məqalə yazacağam” deyir. Gedib köçürür, hətta bəzən bir başqa adamın məqaləsini tam olaraq köçürüb altından da imza qoyub gətirib verirlər ki, sənin üçün məqalə yazdım. Əslində yazmırlar, köçürürlər. Yəni deputatlar da aldanmasınlar. Əgər o deputat belə bir məsələdə aldanırsa sabah beynəlxalq platformalarda Azərbaycanı necə təmsil edəcək?”- deyə A.Həsrət vurğuladı.
İradə SARIYEVA
