Ermənistan adlanan terror dövlətinin hədəfi hər zaman dinc, mülki azərbaycanlılar olub. Tarixin hansı dövrünə baxsaq görərik ki, erməni terror təşkilatları azərbaycanlılara qarşı qətliamlar törədiblər. Sirr deyil ki, müasir Ermənistan erməni terror təşkilatlarının varisi rolunu oynayır. Belə olmasaydı, bu dövlət dünyada terrorçu dövlət adını almazdı.
İki il bundan əvvəl Ermənistanın Azərbaycanın ikinci böyük şəhəri Gəncədə törətdiyi terror aktları onun mahiyyətini açıq şəkildə ifadə edir. Bildiyimiz kimi, 2020-ci ilin oktyabrında Ermənistan Silahlı Qüvvələri tərəfindən 5 dəfə ayrı-ayrı zamanlarda Gəncə şəhəri bombalanıb və dinc əhali erməni terrorunun qurbanı olub. 44 günlük Vətən müharibəsi dövründə Ermənistan silahlı qüvvələri tərəfindən münaqişə zonasından kənarda yerləşən Gəncə şəhərinin mərkəzi qadağan olunmuş silahlardan, o cümlədən ballistik raketlərdən və kasetli bombalardan istifadə edilməklə növbəti dəfə intensiv atəşə tutulub. 17 oktyabr 2020-ci il tarixində baş vermiş terror hadisəsi zamanı insan tələfatı və külli miqdarda dağıntılarla nəticələnən cinayətlər baş verib. Xeyli sayda insan sağlamlığına və əmlakına dəyən ziyanla yanaşı, mənəvi-psixoloji sarsıntıya məruz qalmışdı. Həmin gün 4-ü qadın, 3-ü uşaq olmaqla 13 nəfər həyatını itirdi, 20-si qadın, 5-i uşaq olmaqla 48 vətəndaş ağır xəsarətlər alıb. Ümumilikdə, Gəncəyə olan dörd terror aktı nəticəsində 26 nəfər həlak olub. Onlardan 1-i körpə, 5-i uşaq, 10-u qadındır. Yaralanan 175 nəfər arasında 32-sinin uşaq, 57-sinin qadın olması birbaşa olaraq, qadın və uşaq hüquqlarının pozulması, hərbi cinayətin ən ağır nümunəsidir.
Gəncə hadisəsindən də illər əvvəl Ermənistan və erməni terror təşkilatları Azərbaycan xalqını daim hədəfə alıb və əli yalın, silahsız insanlara, yaşayış obyektlərinə hücumlar təşkil ediblər. Erməni terror təşkilatları və onların varisi olan Ermənistan dövləti keçən əsrin 80-ci illərinin sonu 90-cı illərinin əvvəllərində, o cümlədən də XX əsrin ikinci onilliyində azərbaycanlılara qarşı terror aktı törədib, onların arasında görkəmli dövlət xadimlərimiz də var. Azərbaycan Xalq Cumhuriyyətinin baş naziri Fətəli Xan Xoyski də olub. Tarixçilər qeyd edirlər ki, 1920-ci il aprelin 27-də XI Qırmızı Ordu beynəlxalq hüquq normalarını, Azərbaycan sərhədlərini pozaraq Bakıya doğru hücuma keçdi. Azərbaycanın Sovet Rusiyasının ordusu tərəfindən işğal edilməsi nəticəsində iki ilə yaxın müstəqil dövlət kimi yaşamış Azərbaycan Xalq Cümhuriyyəti süqut etdi. Aprel işğalından sonra F.Xoyski Tiflisə mühacirət etməyə məcbur oldu. İyunun 19-da isə Tiflisdə “Daşnaksutyun”un muzdlu erməni terrorçusu tərəfindən qətlə yetirildi. 1920-ci ildə erməni terrorçuları Cumhuriyyətin digər qurucularına qarşı da terror aktları törədib ki, onlardan biri də Azərbaycan Xalq Cumhuriyyəti Parlamentinin sədr müavini Həsən bəy Ağayevdir.
1980-ci illərdə Ermənistanın Azərbaycanın Qarabağ bölgəsinə qarşı qanunsuz və əsassız ərazi iddialarının ortaya çıxması ilə erməni terror təşkilatlarının fəaliyyəti Azərbaycana yönəldi. 1980-ci illərin ikinci yarısı erməni terrorçularının Azərbaycan ərazisində əsasən sərnişin avtobuslarının və metro qatarlarının partlayışları ilə müşahidə olunan terror aktları qeydə alınıb. 1980-ci illərin sonu - 1990-cı illərin əvvəllərində törədilən bu terror aktları 2000-dən çox insanın ölümünə səbəb olub. Beləliklə, 1988-1994-cü illər ərzində Ermənistan vətəndaşlarımıza qarşı 30-dan artıq terror aktı təşkil edib. Qeyd edildiyi kimi, bu terror hücumları nəticəsində 2 minə yaxın vətəndaşımız həyatını itirib.
12 dekabr 1988–ci il tarixində Azərbaycanın Xankəndi şəhəri üzərində sərnişin təyyarəsinin vurulması nəticəsində iki ekipaj üzvünün həlak olması, 16 sentyabr 1989-cu ildə Tbilisi-Bakı sərnişin avtobusunun partladılması nəticəsində 5 nəfərin həlak olması və 25 nəfərin yaralanması, 13 fevral 1990-cı ildə Şuşa-Bakı sərnişin avtobusunun partladılması nəticəsində 13 azərbaycanlının yaralanması, 11 İyul 1990-cı ildə Tərtər-Kəlbəcər sərnişin avtobusuna silahlı hücum nəticəsində 8 nəfərin həlak olması və 23 nəfərin yaralanması, 10 Avqust 1990-cı ildə Xanlarda (indiki Göy göl rayonu) sərnişin avtobusunun partladılması nəticəsində 17 nəfərin həlak olması və 16 nəfərin yaralanması, 10 avqust 1990-cı ildə Tbilisi-Ağdam sərnişin avtobusunun partladılması nəticəsində 20 nəfərin həlak olması və 30 nəfərin yaralanması, 30 noyabr 1990-cı ildə Şuşadan Xankəndiyə Azərbaycan Daxili İşlər Nazirliyinin əməkdaşlarını daşıyan sərnişin avtobusunun partladılması nəticəsində 2 nəfərin yaralanması, 14 mart 1991–ci ildə Ağdamda sərnişin avtobusunun partladılması nəticəsində 3 nəfərin həlak olması və 4 nəfərin yaralanması, 30 may 1991-ci ildə Moskva-Bakı sərnişin qatarının partladılması nəticəsində 11 nəfərin həlak olması və 22 nəfərin yaralanması, 31 iyun 1991-ci ildə Moskva-Bakı sərnişin qatarının partladılması nəticəsində 16 nəfərin həlak olması və 20 nəfərin yaralanması, 8 sentyabr 1991-ci ildə Ağdamda sərnişin avtobusunun partladılması nəticəsində 6 nəfərin həlak olması və 36 nəfərin yaralanması, 20 noyabr 1991 Azərbaycanın yüksək səviyyəli rəsmilərini, habelə Qazaxıstan və Rusiya nümayəndələrini daşıyan sərnişin vertolyotunun vurulması nəticəsində 22 nəfərin həlak olması (Xocavənd rayonu), 8 yanvar 1992-ci ildə Krasnovodsk-Bakı Dəniz bərəsinin partladılması nəticəsində 25 nəfərin həlak olması və 88 nəfərin yaralanması, 28 yanvar 1992 Azərbaycanda sərnişin vertolyotunun vurulması nəticəsində 44 nəfərin həlak olması (Şuşa), 28 fevral 1993-cü ildə Kislovodsk-Bakı sərnişin qatarının partladılması nəticəsində 11 nəfərin həlak olması və 8 nəfərin yaralanması, 1 fevral 1994-cü ildə Bakıda sərnişin qatarının partladılması nəticəsində 3 nəfərin həlak olması və 20 nəfərin yaralanması, 13 Aprel 1994–cü ildə Moskva-Bakı sərnişin qatarının partladılması nəticəsində 6 nəfərin həlak olması və 3 digər nəfərin yaralanması, 3 iyul 1994-cü ildə Bakı Metropoliteninin qatarının partladılması nəticəsində 13 nəfərin həlak olması və 42 nəfərin yaralanması, 2011-ci ildə Azərbaycanın Ağdam rayonuna uşaqlardan ibarət qrupa atəş açılması nəticəsində 9 yaşlı Azərbaycanlı uşağın həlak olması, 14 iyul 2011-ci ildə Ermənistandan Azərbaycana axan çaya partlayıcı daşıyan oyuncağın atılması nəticəsində 13 yaşlı azərbaycanlı qızın həlak olması və onun 32 yaşlı anasının ağır yaralanması (hadisə Tovuz rayonunda baş verib), 2017-ci il iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndini 80 və 102 millimetrlik minaatanlardan və dəzgahlı qumbaraatanlardan atəşə tutması və bu təcavüz nəticəsində 2 yaşlı Quliyeva Zəhra və onun 52 yaşlı nənəsi həlak olması Ermənistanın əsl mahiyyətini ortaya qoyan hadisələrdir. Bunlar da, Gəncə hadisələri də onu göstərir ki, terrorçu dövlətin hədəfi Azərbaycanın dinc əhalisidir. Gəncə hadisələrinin, yəni İkinci Qarabağ müharibəsi dövründə Gəncə şəhərinin Ermənistan Silahlı Qüvvələri tərəfindən növbəti dəfə raket hücumuna məruz qalmasından ikinci ildönümü ərəfəsində qısa da olsa ermənilərin, Ermənistanın terrorçu silahlı qüvvələrinin dinc Azərbaycan əhalisinə qarşı həyata keçirdiyi terror aktlarına nəzər saldıq. Bütün bunlar bir daha sübut edir ki, Ermənistan dinc əhalimizə qarşı hər zaman planlı şəkildə sistemli zorakılıq tətbiq edib. Ermənistanın dinc azərbaycanlılara qarşı cinayətlərinə dünya birliyi, beynəlxalq qurumlar hələ də susur. Hələ də bu terror aktlarına görə Ermənistana gözün üstə qaşın var deyən olmayıb, hələ də Gəncədə törətdiyi insanlıq əleyhinə terror cinayətinə görə bu ölkənin qulağını buran olmayıb. Ermənistanın terrorçu xislətinin Azərbaycanın dinc, mülki əhalisinə qarşı yönəldiyini dünya qəbul etmək istəmir. Amma dünya birliyi nağıllardan ayılıb gerçəklərin gözü ilə məsələyə baxa bilsə, Ermənistan terrorunun dəhşətli simasını və faciəvi nəticəsini, əsas hədəfini görə bilər. Dünya birliyi nəhayət ki, 44 günlük müharibə dövründə Ermənistan ordusunun cəbhə bölgəsindən uzaqda yerləşən dinc şəhərlərimizi hədəfə alması nəticəsində dinc sakinlərimizin, körpələrimizin, uşaqlarımızın, qadın və qocalarımızın həyatına son qoyduğunu görməlidir...
İradə SARIYEVA
