Fransa prezidenti Emmanuel Makronun Azərbaycanla bağlı xoşagəlməz bəyanatına Azərbaycan Prezidenti İlham Əliyev Astanada MDB Dövlət Başçıları Şurasının iclasında çıxışı zamanı gərəkli cavabı verib. Prezident bildirib: "Azərbaycanın Parisdəki səfirliyinə iki dəfə basqın edildi. Özü də birinci hücumdan sonra Fransa Prezidenti telefonda mənə vəd verdi ki, bunun təkrarlanmaması məqsədilə tədbir görüləcək. Lakin bunun, yumşaq desək, doğru olmadığı ortaya çıxdı". Prezident bununla ermənipərəst Makronun yalanlarını, ikiüzlülüyünü ifşa edib. Eyni zamanda, Azərbaycan Prezidenti Makronun leksikonunu tənqid edərək deyib:"... Küçə leksikonundan istifadə etməyin nə dərəcədə siyasi nəzakətə uyğun olmasını, qoy, Fransa ictimaiyyəti müəyyən etsin” Makronun Azərbaycana qarşı verdiyi bəyanatdan sonra Prezidentin sərt reaksiyası ona birinci cavab və birinci zərbə kimi dəyərləndirilə bilər. Amma ardınca nə edilməlidir? Əməli olaraq Azərbaycanda Fransaya qarşı hansı addımlar atılmalıdır? Onların Azərbaycandakı investisiyalarının rədd edilməsi, şirkətlərinin bağlanması, onların Azərbaycandan çıxarılması kimi məsələlərə baxılmalıdırmı? Fransa ilə münasibətlərdə hansı məhdudiyyətlər tətbiq oluna bilər?
"Azərbaycan tərəfindən Fransa şirkətləri beynəlxalq məhkəmələrə verilməlidir, onlardan təzminat tələb olunmalıdır, bütün fransız şirkətləri Azərbaycanı tərk etməlidir"
Liberal İqtisadçılar Mərkəzinin rəhbəri Akif Nəsirlinin fikrincə, Fransaya qarşı iqtisadi cəhətdən məhdudiyyət tətbiq edilməlidir ki, o bundan dərs götürsün. "Hesab edirəm ki, Azərbaycan dövləti Fransaya qarşı çoxdan tədbirlər görməli idi. Deyərdim ki, hətta bu məsələdə bir az gecikmişik. Bu ölkə mütəmadi olaraq anti-Azərbaycan siyasəti həyata keçirib. Bilirik ki, torpaqlarımız işğalda olduğu dövrdə Vejnəli qızıl yataqlarında Fransa şirkətləri qanunsuz olaraq qızıl hasil edirdi, eyni zamanda nadir ağaclarımızı qıraraq çox yüksək keyfiyyətli mebellər hazırlayır və dünya bazarında müxtəlif adlar altında satırdılar. Yəni Fransa Azərbaycana qarşı 30 il müddətində iqtisadi, mədəni terror həyata keçirib. A.Nəsirli vurğuladı ki, bunların ardınca Fransa və onun prezidenti indi də Azərbaycana qarşı siyasi terrorla, yalan danışmaqla məşğuldur. "Məsələn, Makron belə bir yalan ifadə işlədib ki, Rusiya guya Azərbaycanın xeyrinə Qafqazda münaqişəni qızışdırıb. Halbuki, 30 il Azərbaycanın 20 faiz ərazisi işğal altında olub. Desəydi ki, Rusiya münaqişəni qızışdırıb, bununla razılaşmaq olardı, amma ardınca "Azərbaycanın xeyirinə" ifadəsini işlətməsi onu göstərir ki, bu qəsdən verilmiş açıqlamadır, Azərbaycana qarşı siyasi terrordur. Ona görə də hesab edirəm ki, Azərbaycan dövləti Fransa ilə bütün siyasi əlaqələri kəsməsə də, iqtisadi əlaqələr məsələsini nəzərdən keçirməlidir. İqtisadi baxımdan Fransa şirkətlərinin, Fransa brendlərinin, məhsullarının Azərbaycandan çıxarılmasının vaxtı çoxdan çatıb. Fransa şirkətləri Azərbaycandan çıxarılmalıdır". A.Nəsirlinin sözlərinə görə, iki il bundan əvvəl Azərbaycan ərazilərini işğaldan azad etdikdən sonra Fransa özünün məkrli simasını daha qabarıq şəkildə göstərdi. A.Nəsirli hesab edir ki, işğal altından azad edildikdən sonra torpaqlarımızda Fransa şirkətlərinin izləri üzə çıxan kimi biz o tədbirləri görməli idik :"Fransa anti-Azərbaycan mövqeyini hər zaman göstərib. Bu baxımdan hesab edirəm ki, Fransa ilə münasibətlərdə iqtisadi sahədə məhdudlaşdırmalar olmalıdır. Onu da qeyd edim ki, Azərbaycanın işğaldan azad edilmiş ərazilərində vaxtilə qanunsuz fəaliyyətlə məşğul olan Azərbaycan tərəfindən Fransa şirkətləri beynəlxalq məhkəmələrə verilməlidir, onlardan təzminat tələb olunmalıdır, bütün fransız şirkətləri Azərbaycanı tərk etməlidir".
İradə SARIYEVA
