“Azərbaycan sülh müqaviləsi üçün Ermənistana daha genişlənmiş elementləri təqdim edib”. Bunu Bişkekdə azərbaycanlı jurnalistlərə açıqlamasında xarici işlər naziri Ceyhun Bayramov deyib. Azərbaycan ilkin olaraq 5 baza prinsipi ilə Ermənistana təkliflər vermişdi.
Bu yaxınlarda isə həmin baza əsasında yeni detallar İrəvana təqdim edilib. Ceyhun Bayramov bildirib ki, Ermənistan təqdim edilmiş detallarla bağlı vaxt istəyib: “Bizdə dəqiq məlumat yoxdur ki, növbəti görüşlər zamanı Ermənistan bizim təqdim etdiyimiz elementlərə hansı reaksiya verəcək, yoxsa onlara əlavə vaxt lazımdır. Ancaq bir neçə istiqamətlər var ki, onların irəli aparılması bizim üçün önəmlidir”.
Nazir onu da qeyd edib ki, ikitərəfli əsasda olan sülh müqaviləsi, kommunikasiyaların açılması və delimitasiya məsələləri görüşlər əsasında müzakirə olunur: “Azərbaycan görüşlərdə öz məlum prinsiplərini çatdırır və bu istiqamətdə işləri irəli aparır. Oktyabrda delimitasiyaya dair komissiyaların iclası Brüsseldə keçiriləcək”.
Daha genişlənmiş elementlər deyəndə, 5 təklifdən əlavə nə nəzərdə tutula bilər?
“Ancaq hər halda, bu təkliflər Azərbaycanın ərazi bütövlüyünə və suverenliyinə qarşı deyil”
Məsələyə münasibət bildirən AMİP funksioneri Əli Orucovun fikrincə, yeni təkliflər bir sıra məsələləri əhatə edə bilər: “Əvvəla, Ermənistan zaman-zaman danışıqları uzatmaq üçün müxtəlif bəhanələrdən istifadə edib. Hesab edirəm ki, Azərbaycan 5 təkliflə çıxış etsə də, Ermənistan bəzi məqamlarla bağlı yeni əlavələr etməyə cəhd edib. Ola bilsin ki, sülh müqaviləsinin mətni ümumi prinsipləri əhatə etdiyi üçün İrəvan müəyyən detalları aydınlaşdırmaq istəyib. Azərbaycan da prosesi sürətləndirmək üçün 5 baza prinsipi əsasında yeni məqamları qarşı tərəfə təqdim edib. Konkret bunların nədən ibarət olduğunu demək çətindir. Çünki danışıqların məzmunu qaydalara görə məxfi olur. Ancaq hər halda bu təkliflər Azərbaycanın ərazi bütövlüyünə və suverenliyinə qarşı deyil. Çünki nəzərə almaq lazımdır ki, Azərbaycan qalib tərəfdir. Azərbaycan üçün əsas məsələ bu sənəddə Ermənistanın ölkəmizə qarşı ərazi iddialarının olmamasıdır. Yəni Azərbaycanın ərazi bütövlüyünə, suverenliyinə qarşı hərbi, siyasi və digər təhdidlərə yol verməyəcəyi ilə bağlı hüquqi öhdəlik yaradan müddəaların əks etdirilməsidir. Düzdür, Ermənistan rəsmiləri bəyan edir ki, Azərbaycanın ərazi bütövlüyünü tanımağa hazırdılar. Ancaq Qarabağın da bura daxil olması ilə bağlı konkret heç nə demirlər. Əsas odur ki, ərazi bütövlüyü məsələsində qarşı tərəfin Qarabağa hansısa iddiası olmasın”.
Partiya funksioneri onu da əlavə etdi ki, Azərbaycan ərazi bütövlüyünə təhdid yaradan istənilən elementi yaxın buraxmamalıdır.
Vidadi ORDAHALLI
