Praqa görüşlərindən dərhal sonra İrəvana üz tutan separatçıbaşı Arayik Arutyunyanı xəyal qırıqlığına uğradan hadisə baş verib. Paşinyan Araiki qəbul etməyib və onu iki gün gözləməyə məcbur edib.
“Arayik Arutyunyan iki gün oteldə oturub və Paşinyanın onu qəbul etməsini gözləyib”. Bunu “Ermənistan” fraksiyasının deputatı Aqnessa Xamoyan erməni mediasına mühasibəsində deyib.
O, hakimiyyətin son zamanlar həyata keçirilən siyasətindən danışıb:“2018-ci ildə Qarabağla bağlı qərar nə olursa olsun, ilk növbədə bu barədə xalqa məlumat verəcəyini bildirən, Qarabağın Ermənistanla bərabər danışıqlar masasına oturmasından danışan, Xankəndi meydanında “Qarabağ Ermənistandır və nöqtə” deyən şəxs indi baxış bucağını 180 dərəcə dəyişib. O, hətta barmağını silkələyib Qarabağ və Ermənistan vətəndaşlarına deyir ki, əllərində olanlarla kifayətlənsinlər, bundan artığını gözləməsinlər”.
Paşinyan Araiki niyə iki gün qəbul etməyib, onu qapı ağzında saxlayıb? Nə baş verir ki, separatçıbaşı bu halla qarşılaşıb?
“Araik Arutyunyana eyham vurulub ki, o və ətrafı özləri öz tale və müqəddəratlarını həll etsinlər”
“SƏS” qəzetinin baş redaktoru, siyasi ekspert Bəhruz Quliyev mövzu ilə bağlı şərhində qeyd etdi ki, Araik Arutyunyan Nikol Paşinyan üçün heç bir məna kəsb etmir: “Araik Arutyunyan indi öz taleyini düşünür və o yaxşı bilir ki, Nikol Paşinyan da artıq Qarabağ faktorundan əlini üzüb. Artıq Araik Arutyunyan Nikol Paşinyan üçün heç nə kəsb etmir”. Onun sözlərinə görə, Paşinyanın Araiki gözlətməyinin də mənası o deməkdir ki, Qarabağ separatçılarının rəhbəri getsin və özü öz problemlərini həll etsin: “Ola bilər ki, bu iki şəxsin görüşü media üçün hər hansı bir görüntü xarakteri daşısın, amma reallığa qalanda separatçıların başçısının məqsədi təxminən belə olub: o, görüş zamanı Ermənistanın baş nazirindən bundan sonrakı addımlarının nədən ibarət olması ilə bağlı planlarını öyrənmək istəyib. Məsələn, bir müddət sonra Ermənistan hökuməti parlamentdə ölkə büdcəsini qəbul edəcək və Arutyunyan öyrənməyə çalışıb ki, Paşinyan bu dəfə də separatçılar üçün maliyyə ayıracaqmı? Həmçinin, minimum olaraq noyabr ayında, maksimum isə ilin sonuna qədər sülh müqaviləsinin imzalanacağı gözlənilir və həmin imzalanma reallaşdıqdan sonra Qarabağdakı separatçıların aqibəti necə olacaq. Mümkündür ki, belə bir qısa müddətdə separatçılar iki seçim arasında qalıblar. Yəni onlar cinayətkar olduqlarını yaxşı anlayırlar və bilirlər ki, Azərbaycanda barələrində cinayət işləri açılıb, ona görə də ya Ermənistana, ya da xarici ölkələrin birinə qaçaraq sığınacaq almağa çalışacaqlar. Bunun üçün isə uzun illər boyu erməni xalqından çapıb-taladıqları vəsaitlərini necə müəyyənləşdirəcəkləri istiqamətində baş sındırırlar. Çox yəqin ki, bu görüşün görünməyən tərəfi də məhz həmin mövzular ətrafında olub”.
Məsələnin ikinci tərəfinə gəlincə, B.Quliyev “Nikol Paşinyanın iflasa uğradılmış “Qarabağ Ermənistandır və nöqtə” kimi sərsəm fikri Ermənistanda istehza obyektinə çevrilib”, deyə bildirdi. Siyasi ekspert hesab edir ki, bu baxımdan, zaman-zaman onun müharibədən qabaq irəli sürdüyü fikirləri üzünə vurulur və eyni zamanda, uğursuz diplomatiyası da erməni baş nazirinin real vəziyyətini ortaya çıxarıb: “Ümumilikdə isə, Paşinyan Arutyunyanı gözlətməklə demək istəyib ki, onlar artıq öz çarələrini özləri tapmalıdırlar və Ermənistanın edə biləcəyi heç nə qalmayıb, çünki Qarabağ Azərbaycandır. Daha dəqiq desək, əgər əvvəllər danışıqlar zamanı “Qarabağın statusu”, “xalqların öz müqəddəratlarını təyin etmə hüquqları” tipli məsələlər önə sürülürdüsə, indi həmin məsələlər ümumiyyətlə aradan qaldırılıb və mövcud deyil. Beləliklə, Araik Arutyunyana eyham vurulub ki, o və ətrafı özləri öz tale və müqəddəratlarını həll etsinlər”, deyə Bəhruz Quliyev mövzu ilə bağlı açıqlamasının sonunda bildirib.
İradə SARIYEVA
