Xəbər verildiyi kimi, Azərbaycan Prezidenti İlham Əliyev və Ermənistanın baş naziri Nikol Paşinyan, Fransa Respublikasının Prezidenti Emauel Makron və Avropa İttifaqı Şurasının sədri Şarl Mişel 2022-ci il oktyabrın 6-da Praqada görüş keçiriblər.
Görüşdən sonra tərəflərin yaydığı bəyanatda deyilir:
“Ermənistan və Azərbaycan BMT Nizamnaməsinə və 1991-ci il Alma-Ata Bəyannaməsinə sadiq olduqlarını bir daha təsdiq etdilər, bu bəyannamə vasitəsilə hər iki tərəf bir-birinin ərazi bütövlüyünü və suverenliyini tanıyır”.
Bunu Ermənistan əvvəl də deyirdi. Azərbaycan razılaşmırdı ki, əsas işğal faktı 1991-dən sonra başlayıb. Ərazi bütövlüyünün bu şəkildə tanınması Azərbaycanı qane edə bilərmi?
Abutalıb Səmədov: “Bu bəyanatı imzalamaqla Ermənistan rəsmi şəkildə əvvəlki statusundan imtina edir”
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, qəbul olunmuş bəyənatda tərəflərin bir-birinin ərazi bütövlüyünü və suverenliyini tanıması irəliyə doğru atılmış ciddi bir addımdır: “Çünki erməni cəmiyyəti bunu qətiyyən qəbul etmək istəmir. Paşinyan hər dəfə bu mövqeni müxtəlif şəxslərin adından bəyan etmək məcburiyyətində qalır. Öz adından deməyə cəsarət etmir. Gah özündən əvvəlkiləri günahlandırır ki, siz artıq ərazi bütövlüyünü tanımırsız, gah da Qərbdə olan dostlarının adından çıxış edirdi. Ancaq təbiidir ki, bu bizim mubarizəmizin hələ bitməyi deyil. Paşinyan bu addımı atmazdan əvvəl Araik Arutinyanla birlikdə bu məsələni müzakirə ediblər və birlikdə razılığa gəliblər ki, Qarabağ məsələsi sülh sazişi ilə ayrı olmalıdır. Amma ümidlərini itirməyiblər. Bunun da bir səbəbi var. 2010-cu il 22 iyul BMT Beynəlxalq Məhkəməsinin qərarı var. Bu qərar onlara ümid verir ki, güya gələcəkdə hətta Qarabağın müstəqillik məsələsinə də nail ola bilərlər. Çünki məhkəmənin rəyində göstərilir ki, dövlətlərin ərazi bütövlüyü yalnız xaricdən pozula bilər. Ermənilər də yaxşı başa düşürlər ki, artıq müstəqillik xəyallarından əl çəkmək lazımdır. Deyirlər ki, biz Azərbaycanın tərkibində yaşamaq istəmirik. Yəni bu bəyanatı imzalamaqla Ermənistan rəsmi şəkildə əvvəlki statusundan imtina edir. Bundan sonra artıq Ermənistan ortada yoxdur. Azərbaycan prezidenti də açıq şəkildə dedi ki, Qarabağ məsələsi, Qarabağ ermənilərinin hüquqlarının təmin olunması Azərbaycanın daxili işidir və müəyyən danışıqlar artıq gedir. Qarabağ məsələsini gündəlikdən çıxartmaq istiqamətində mübarizə davam edir. Dünən imzalanmış bəyanat da bunun üçün çox böyük bir addımdır. Ancaq əsas mübarizə qabaqdadır. Ermənilər Qərbin dəstəyilə Qarabağa ən yüksək statusu almağa çalışacaqlar. Bu da müstəqilliyə bərabərdir. İndiyə qədər Azərbaycana təklif olunan bütün variantlar Qarabağın müstəqilliyi demək idi. 1997-ci ilin iyununda təqdim olunan “Paket variantı”ndan tutmuş, “Madrid Prinsipləri”nə qədər. İlk təkliflərdə Azərbaycanın ərazi bütövlüyü gözlənilsə də, faktiki olaraq Qarabağa müstəqilik istənilirdi. Özünün “parlamenti”, özünün “höküməti”, özünün “konstitusiyası”nın olması istənilirdi. Qarabağda yalnız Azərbaycanın o qanunları işləyə bilərdi ki, Qarabağ qanunlarına uyğun olsun. Qarabağ hakimiyyət orqanlarının icazəsi olmadan Azərbaycan polisi, hərbçisi o əraziyə keçə bilməzdi. Demək olar ki, Qarabağ tam müstəqil dövlət qurumu kimi fəaliyyət göstərəcəkdi. Ona görə də, Qarabağ erməniləri hələ də ümidlərini üzməyiblər və bu istiqamətdə cəhdlər davam edəcək. Bizim bundan sonra birlikdə hərəkət etməyimizə, birlikdə Azərbaycan hakimiyyətinə dəstək verməyimizə çox ciddi ehtiyac var”.
Məhəmmədəli QƏRİBLİ
