Ermənistanın birinci prezidenti Levon Ter-Petrosyan 80-ə yaxın erməni ziyalının ölkə hakimiyyətinə və ATƏT-in Minsk Qrupunun həmsədrlərinə Qarabağ münaqişəsinin nizamlanması üzrə danışıqlar prosesini bərpa etməyə çağıran müraciətinə münasibət bildirib və onları qınayıb.
Ter-Petrosyanın fikrincə, müraciət müəllifləri vaxtilə münaqişənin qarşılıqlı güzəştlər əsasında həllini açıq şəkildə tələb etməyə cəsarət etməli idilər. Belə olan halda, o əmindir ki, erməni xalqı bu gün belə acınacaqlı vəziyyətdə olmazdı. Ermənistan dövlətinin keçmiş başçısı bildirib ki, vaxtında münaqişə kompromislər yolu ilə həll olunsaydı, sonradan erməni xalqının başına gələn bir çox fəlakətlər də olmayacaqdı: “Mən əminəm ki, bu müraciəti imzalayan ziyalılar vaxtında Qarabağ məsələsinin kompromislər əsasında həll edilməsi xahişi ilə Ermənistan hakimiyyətinə açıq müraciət etməyə cəsarət etsəydi, xalqımız heç vaxt bugünkü acınacaqlı vəziyyətə düşməzdi”.
Ter-Petrosyanın məlum fikirləri reallığı əks etdirir. 1988-ci ildə erməni separatizmi başlayandan erməni ziyalıları bunu hər vasitə ilə alovlandırmaq yolunu tutdular. 1994-cü ildə atəşkəs imzalandı. Üstünlük Ermənistanın tərəfində idi. Ancaq buna baxmayaraq, ondan sonrakı dövrdə qarşılıqlı kompromislərlə bağlı bir dəfə olsun hansısa çağırışla, müraciətlə çıxış etmədilər. İndi utanmadan Minsk Qrupundan mədət umurlar.
“Öz missiyasını yerinə yetirə bilməyən bir qurum artıq mövcud ola bilməz”
Məsələyə münasibət bildirən AMİP-in sədr müavini Afsəddin Nəbiyev hesab edir ki, bütün bunlar erməni cəmiyyətinin xəstə təfəkkürə malik olmasının əyani sübutudur: “Görünən odur ki, erməni cəmiyyəti Azərbaycan dövlətinin 44 günlük Vətən savaşında yaratdığı yeni reallıqları dərk etmək bacarığına malik deyil. Niyə? Çünki bunlar xəstə təfəkkürə malikdilər. Həmin bu erməni “ziyalıları” daim Ermənistanı uçuruma yuvarlayan bir təbəqədir. Rasional düşüncəni qəbul etməyən, yalançı erməni təbliğatı ilə silahlanmış, tamamilə reallıq hissindən məhrum olmuş bu təbəqə Ermənistanı hər zaman münaqişəyə cəlb etməklə xarici havadarlarının sifarişlərini yerinə yetirir. Bu siyasətin erməni xalqına heç bir faydası olmayacaq. Bir tərəfdən revanşist qüvvələr, digər tərəfdən “ziyalı” zümrəsi Ermənistanı fəlakətə sürükləyir. Ermənistanın birinci prezidenti Levon Ter-Petrosyan bu məsələdə ağıl və vicdan pəncərəsindən baxmağı bacaran keçmiş siyasətçidir. Onun fikirlərində həqiqət payı var. ATƏT-in Minsk Qrupu bu münaqişəni sülh yolu həll etməyi bacarsaydı, müharibə olmayacaqdı. Öz missiyasını yerinə yetirə bilməyən bir qurum artıq mövcud ola bilməz. Eyni halı Rusiya-Ukrayna münasibətlərində də görmək mümkündür. Orada ATƏT-in Minsk Qrupu vardı, nə oldu? İndi ATƏT bu müharibəni seyr etməklə məşğuldur. Çox acı sonluqdur, elə deyilmi? Azərbaycan xalqı olaraq biz də bu acını yaşamışıq. Erməni ziyalıları mötədil düşüncəyə sahib olsaydılar, Ermənistan Birinci Qarabağ müharibəsində döyüşdə qalib olan vaxt kompromis çağırışı ilə çıxış edərdilər”.
Bu baxımdan sədr müavini hesab edir ki, xəstə erməni cəmiyyətini təmsil edən belə “ziyalılardan” mötədil mövqe gözləmək mənasızdır.
Vidadi ORDAHALLI
