Azərbaycan ərazilərinə gəlmə olsalar da, buranı özlərinin "tarixi torpağı" adlandırmaqdan çəkinməyən haylar özlərini "yerli əhali" kimi "təsdiqləmək hər cür saxtakarlığa yol verirlər.
Ən çox istifadə etdikləri saxtakarlıq üsulu isə qondarma "arxeoloji materiallar" üzə çıxarmadı. Azad edilmiş ərazilərin elə bir bucağı yoxdur ki, orada erməni saxtakarlığının izi olmasın. Bu gün isə hay arxeoloqlarının Rusiya sülhməramlılarının müvəqqəti yerləşdikləri ərazilərimizdə "arxeoloji qazıntılar" apardığına dair məlumatlar yayılır. Xüsüsən də qədim xristian - alban abidələrinin başına oyunlar açmağa davam edirlər. Hay alimləri Kəlbəcər rayonunun ayrı-ayrı yerlərində bu cür saxtakarlıq həyata keçirib. Hazırda erməni keşişlərinin Kəlbəcərdə yerləşən Xudavəng monastırında olması, "ibadət" adı ilə orada öz mövcudluqlarını saxlaması bir sıra problemlərin yaranmasına səbəb olur. Çunki onlar orada sadəcə dini rituallar həyata keçirmir, böyük saxtalaşdırma işləri aparırlar. Dindən pərdə kimi istifadə edib hay arxeoloqları ilə birgə gizli şəkildə qanunsuz qazıntı işləri aparırlar.
Moderator.az-ın yaydığı məlumata görə, sosial şəbəkələrin erməni seqmentində saxta "arxeoloji qazıntılar" haqda yanlış informasiyalar yayılır. Yayılmış məlumatlara görə, erməni arxeoloqlar Kəlbəcər rayonunun Kolətək kəndində xaçkarlar - xaç daşları “aşkar ediblər”. Erməni arxeoloqları iddia ediblər ki, guya "XIII əsrə aid xaçkarlar tapılıb, onlar torpağa basdırılıb. Onların üzərində milli erməni rəmzləri - xaç, günəş, nar və əbədiyyət rəmzləri təsvir edilib”. Sözsüz ki, bu saxtakarlıqdır və heç onların Kəlbəcərdə hər hansı bir qazıntı işləri apardığı inandırıcı görünmür də. Bəlkə də bu saxta məlumatı bizi qıcıqlandırmaq, dünyanı aldatmaq üçün veriblər. Hələ ki, erməni keşişləri Xudavəngdədir və nə qədər ki onlar Xudavəngdə oturacaqlar, biz daha çox bu cür təxribatların şahidi olacağıq. Təsəvvür edin ki, ermənilər belə təsəvvür yaratmaq istəyirlər ki, guya Kəlbəcərdə hansısa "arxeoloji qazıntılar" aparıblar və sair. Amma keşişlərin bu kimi saxta əməllərə yol verməsi inandırıcı görünür.
“Xudavəngdə oturan keşişlər burada təxribatla, saxtalaşdırma işləri ilə məşğul olurlar”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, ermənilər son dövrlər daha çox yalan danışmaq yolunu tutublar. Q.Hacıyev hesab edir ki, 44 günlük Vətən müharibəsindəki məğlubiyyətdən sonra ermənilər hər cür hiyləyə əl atır, yalan-yanlış informasiyalar yaymaqda davam edirlər. “Yadınızdadırsa, ermənilərin Kəlbəcərdən köçüb getmələri üçün konkret vaxt verilmişdi, sonra xahiş-minnətlə müddəti bir az da uzatmaq istədilər, Azərbaycan da humanistlik göstərib müddətin uzadılmasına razılıq verdi ki, onlar yığışıb normal şəkildə getsinlər. Ermənilərə qarşı onların bizə etdiyi kimi hərəkətlər, vəhşiliklər törədilmədi. Azərbaycan dövlətinin etdiyi yaxşılığın əvəzində ermənilər nə etdilər? Ermənilərin Kəlbəcərdən çıxmaq üçün müddəti bir neçə günlük uzatmaları səbəbsiz deyildi. Orada torpağa yenə də hansısa qondarma, saxta daşlar basdırdılar. Onlar o qədər saxta “qədim daşlar”, xaçkarlar, baş daşları isteshal ediblər ki, heç olmayan kimi. Həmin daşları da torpağa basdırıblar. Sizin yadınıza gələr, Kəlbəcərdən ermənilər köçüb getdikdən sonra bizimkilər orada bir neçə sex aşkarlamışdılar, həmin xaçkarlar, “qədim daşlar” həmin o sexdə düzəldilirdi, kimyəvi maddələrlə boyadılıb rəngi köhnələşdirilirdi, sonra həmin “erməni xaçlarını” müxtəlif yerlərə basırırdılar. Kəlbəcərdə erməni arxeoloqları nə qazıntı aparasıdır ki? Dediyim kimi, özlərinin basdırdıqları saxta xaçkarları, daşları indi üzə çıxarırlar ki, guya Kəlbəcər ərazisindən tapılıb. Mən indiyə qədər hələ ermənilərin arasında bir nəfər də olsun doğru-dürüst tarixçi, arxeoloq görməmişəm, tanımıram. Onların elə bir arxeoloqu yoxdur ki, ciddi tarixi, arxeoloji təhsil alıb tədiqiqatlarla məşğul olsun. Arxeoloji işlərlə məşğul olanları isə cəfəngiyyatı yaxşı bacaran, Azərbaycan tarixçilərinin, arxeoloqlarının yazdıqlarının üzünü köçürüb saxtalşdıran təsadüfi insanlardır. Keçən dəfəki söhbətlərimizdə də sizə demişdim ki, ermənilərin yazdıqlarının hamsısı yalandır, öz dedikləri yalanları sanki öz qulaqları eşitmir. Kimi aldadırlar? Kəlbəcərdən xaç daşları “tapılması” məsələsinin də yalandan başqa bir şey olmadığı məlumdur. Onlar orada nə vaxt “tədqiqat” aparıb ki, bu “materialları” tapıblar? Bunlar hamısı saxtakarlıqdır. Ermənilərin oğru, yalançı olduğu bütün dünyaya məlumdur, biz də onları sübutlarla məqalələrimizdə, kitablarımızda yazmışıq. Əgər ermənilər utanmadan, məsuliyyət daşımadan alban məbədlərinin üzərindən alban xaçlarını söküb onun yerinə erməni xaçkarları qoyurlarsa, onlardan hər cür saxtakarlıq gözləmək olar. Ümumiyyətlə, 30 illik işğal dövründə ermənilər bu daşları, “erməni xaçkarlarını” hər yerdə basdırıblar. Təsəvvün edin ki, alban xristian məbədlərinin üzərində, görünən yerlərinə gizli şəkildə “erməni xaçları” yerləşdiriblər”.
Q.Hacıyevin sözlərinə görə, hələ Sovet dövründə ermənilər Azərbaycanın müxtəlif yerlərində “xaç daşları”, “erməni xaçları” basdırmaqla məşğul olublar. Qarabağda, Şəmkirdə və başqa ərazilərimizdə qədim alban məbədlərinin ətrafına, üzərinə həmin saxta daşları yerləşdiriblər. Q.Hacıyev deyir ki, onların əsas məqsədi məbədlərin xarici görnüşünü dəyişdirib onları erməniləşdirib, saxtalaşdırmaq olub. Q.Hacıyev bildirdi ki, ermənilər Kəlbəcərdəki Xudavəng, Qarabağdakı başqa kilsələrə gəlməyə cəhd edəndə onların yaxşı niyyətlə gəlmədiyini demişik: “Yadınıza gəlirsə, ermənilər kütləvi şəkildə Xudavəngə “ziyarətə” gəlməyə cəhd edirdilər ki, gedirik “müqəddəslərimizi ziyarət etməyə”. Biz o zaman deyirdik ki, ermənilərin Xudavəngə “ziyarətə gəlməsi” təsadüfi deyil və bu səfərin arxasında onların çirkin niyyətləri dayanır. Çünki qışın çox soyuq vaxtlarında, hər kəs evində olanda, səngərlərdə yalnız əsgərlər keçik çəkəndə, yəni belə bir vaxtda onlar “ziyarətə gəlməyə” cəhd edirdilər. O saat məlum olur ki, burada onların məkrli məqsədi var. Bu gün Xudavəngdə hansısa erməni “din xadimləri”, keşişlər var, bəzilərini də kənardan yığıb gətirirlər. Erməni keşişlərinin Xudavəngdə nə işi var, niyə çıxıb getmirlər? Xudavəngdə oturan keşişlər burada təxribatla, saxtalaşdırma işləri ilə məşğul olurlar. Əlbəttə, qalmaqda məqsədləri odur ki, bütün aləmə “bura bizim ata-babalarımızın yurdlarıdır, bu abidələr bizimkidir” deyib car çəksinlər. Ona görə Xudavəngdən getmirlər. Amma nə keçmiş tarixşünaslıq, nə də indiki tarix o ərazilərin ermənilərə aid olduğunu göstərir, bütün mənbələr buranın Azərbaycan-türk xalqına aid olduğunu deyir. “Xaç daşlara”, nişan daşlara gəlincə, bunlar dəfələrlə tədqiq olunub. Bizim alimlər dəfələrlə deyiblər ki, ermənilər xaçın təsvirini düzgün vermir. Azərbaycan alimləri göstəriblər ki, xaç yerin, göyün, bir də təbiətn, ətraf mühitin yaranışına aid olan bir simvoldur. Yəni göylə yer və ətraf mühit çoxdan bizim tarixi ədəbiyyatda yer alıb. Bunlar da indi durub cəfəngiyyatlar səsləndirirlər”- deyə Q.Hacıyev vurğuladı.
İradə SARIYEVA
