Qərbin bəzi kütləvi informasiya vasitələrində Azərbaycana qarşı qərəzli informasiyalar tirajlanmaqdadır. “Azadlıq radiosu” yenə də Azərbaycanın ərazi bütövlüyünə qarşı təxribatını davam etdirir. Növbəti reportajlarından birində “Azadlıq radiosu” Azərbaycana qarşı növbəti qərəzə yol verib.
Radionun erməni xidməti növbəti dəfə Azərbaycanın ərazi suverenliyinin əleyhinə qərəzli reportaj hazırlayıb. Reportajda bildirilir ki, ermənilərin Qarabağda səngər qazmasının, hərbi obyektlər salmasının qarşısını almaq məqsədilə Azərbaycan səsgücləndiricilər vasitəsilə onlara müraciət edib və bu, onlarda qorxu yaradıb. Eyni zamanda, Azərbaycan torpaqlarında azan oxunması ermənilərdə narahatlıq yaradıb.
“Ermənilər azan səsindən narahat olmamalıdır, separatçıların cinayət əməllərindən narahat olmalıdırlar”
Siyasi ekspert Rövşən Rəsulov “Bakı-Xəbər”ə bildirdi ki, “Azadlıq radiosu” öz əzəli anti-Azərbaycan mövqeyindən əl çəkmək istəmir. “Qərb mətbuatında bu kimi qərəzlərdən, ikili standartlardan çıxış edən yazıları görərkən onlardan təəccüblənməyə dəyməz. Çünki biz dəfələrlə Azərbaycana qarşı qərəzli münasibətin şahidi olmuşuq. Yəni bu ilk hal deyil. Nəinki Qərb mətbuatı, eləcə də bir sıra Qərb təşkilatları, onların tabeliyində olan qurumlar Azərbaycana qarşı hədsiz dərəcədə qərəzlər nümayiş etdiriblər. Təbii ki, bu yolverilməzdir. Lakin bu gün "Azadlıq Radiosu" nun faktiki olaraq Azərbaycanın əleyhinə, separatçıların xeyrinə olan bir reportaj hazırlaması, qərəzli şərhlər verməsi bir daha sübut edir ki, Azərbaycan tərəfi bu kimi məsələlərdə qəti şəkildə birmənalı olaraq əks fikirlərini çatdırmalıdır. Eyni zamanda, bu gün "Azadlıq radiosu" separatçı ermənilərin, quldurların Azərbaycanın azan səsindən narahat olduqlarını yazırsa, bu zaman 30 il işğal altında qalmış ərazilərimizdə dağıdılmış məscidlərimiz, dini ocaqlarımız haqqında niyə bir kəlmə də olsun fikirlər bildirmir? Ermənilər azan səsindən narahat olmamalıdır, separatçıların cinayət əməllərindən narahat olmalıdırlar. Bu radio separatizmi təbliğ etməkdən çəkinməlidir.
O da məlumdur ki, torpaqlarımız işğaldan azad olunduqdan sonra kifayət qədər xarici mətbuat nümayəndələri Azərbaycana gəliblər. Elə mətbuat nümayəndələri olub ki, onlar zamanda Azərbaycana qarşı qərəzli mövqe göstəriblər və gəlib hər şeyi gözləri ilə gördükdən sonra nə qədər yanıldıqlarının fərqinə varıblar. Ağdamda, Füzulidə, Xocavənddə, Zəngilanda və digər ərazilərdə dağıdılan məscidlərimizi, pirlərimizi, qəbiristanlıqlarımızı və s gördükdən sonra anlayıblar ki, əsl vandal kimdi, hansı xalqdı, hansı dövlətdir. Bu gün "Azadlıq radiosu" özündən siyasi şəbihlər çıxarmaq əvəzinə obyektiv yanaşma ortaya qoysun, yaxşı olardı təmsilçilərini xarici media nümayəndələrinin tərkibində Azərbaycana göndərsin. "Azadlıq radiosu" gəlib görsün ki, ermənilər bizim abidələrimizi, məscidlərimizi nə günə qoyublar. Azan səsindən narahat olmağa dəyməz. Çünki bu torpaqlar Azərbaycanındır və Azərbaycan torpağında azan səsinin yüksəlməsi təbiidir. Ümid edirik ki, hazırda Rusiya sülhməramlılarının nəzarəti altında olan ərazilərimiz də separatçılardan təmizlənəcək və azan səsi orada bərpa ediləcək məscidlərimizdən yayılacaq. Oradakı ermənilər isə narahat olmasınlar. Əgər onlar Azərbaycan vətəndaşları olmaq istəyirlərsə, rəsmi Bakının buna heç bir tərəddüdü, etirazı yoxdur. Onlar istədikləri vaxt Azərbaycan vətəndaşlığını qəbul edib bu ölkədə yaşaya bilərlər. Düzdür, bu indiki zamanda elə də inandırıcı görünmür, amma zaman keçdikcə onlar anlayacaqlar ki, hansı siyasi dairələrin, hansı siyasi manqurtların qurbanına çeviriliblər”.
R.Rəsulov bildirdi ki, “Azadlıq radiosu” gəlib Bakının mərkəzindəki erməni kilsəsindən yazsın, Azərbaycanda fəaliyyət göstərən onlarla kilsəni, sinaqoqu təbliğ etsin, Azərbaycanın necə tolerant, multikultural dövlət olduğunu göstərsin. “O ki qaldı Azərbaycanın separatçılara xəbərdarlıq etməsinə, əlbəttə, bizim suveren ərazilərimizdə kimlərsə müharibəyə hazırlaşır, səngərlər, dayaq nöqtələri qazırlarsa, buna qarşı layqli cavablarını alacaqlar. Bu, Azərbaycanın suveren hüquqlarıdır. Əslində “Azadlıq radiosu” həmin torpaqlara qayıdacaqları günü gözləyən azərbaycanlıların azad hüquqları haqqında yazmalıdır, onların hüquqlarından bəhs etməlidir. 5-10 nəfər separatçının işğalçı mövqeyini “ədalətli” mövqe kimi təqdim etməməlidir. “Azadlıq radiosu”nun bugünə qədər Azərbaycan haqqında bir dəfə də olsun müsbət fikir səsləndirməməsi artıq mətbu orqanın hansı məzhəbə qulluq etdiyini açıq şəkildə göstərir. Ona görə də, bu radionun hər hansı bir qərəzli fikir səsləndirməsindən təəccüblənməyə dəyməz”-deyə R.Rəsulov qeyd etdi.
İradə SARIYEVA
