Ermənistan parlamentinmdə “hökumət saatı” zamanı çıxış edən baş nazir Nikol Paşinyan müxalifət deputatlarının ittihamları ilə üzləşib. Müxalifət “Dağlıq Qarabağ ərazisinin 75 faizini Azərbaycana təhvil verdiniz” ittihamı ilə çıxış edib. Müxalifət deputatları “ərazilərin 75 faizi” dedikdə, keçmiş Dağlıq Qarabağ Muxtar Vilayətinin ətrafını təşkil edən və 30 ilədək işğalda saxlanılan 7 rayonu nəzərdə tutublar. Həmçinin bura Şuşa və Hadrutu da daxil ediblər.
Paşinyan müxalifətin ittihamlarını rədd edib. O deyib ki, bu rəvayət 44 günlük müharibədən sonra hakimiyyətin əleyhdarlarının çıxışlarında daim səsləndirilir. Nikol onu satqınlıqda ittiham edən revanşistləri ifşa edərək deyib ki, müxalifət qrupları Qubadlını Sanasar olaraq rəsmən erməni torpağı kimi tanıyırsa, o zaman onların liderləri dövlətə xəyanətdə mühakimə edilməlidir: “Əgər bu, Qubadlı yox, Sanasardırsa, bəs niyə sizin liderləriniz (Robert Köçəryan və Serj Sarkisyan) 20 il ərzində bu ərazilərin təhvil verilməsi ilə bağlı danışıqlar aparıblar? Və bunu açıq şəkildə ediblər. Onların da qəbul etdiyi “Madrid prinsipləri”nin birinci bəndində yazılıb ki, 7 rayon Azərbaycana qaytarılsın. İndi mənə deyin, satqınlar, niyə öz vətəninizlə “bazarlıq” edirdiniz?! Orada taxıl əkmək üçün? Qubadlı Dağlıq Qarabağdı?”.
Əslində Paşinyan bununla əvvəlki hakimiyyətin iç üzünü açdı. Çünki işğal müddəti uzandıqca, o zaman hakimiyyətdə olan Köçəryan-Sarkisyan cütlüyü nəinki Dağlıq Qarabağı, heç ətraf rayonları da geri qaytarmaq istəmirdi.
“Erməni tərəfi elə şərt irəli sürürdü ki, bunu qəbul etmək mümkün deyildi”
Məsələyə münasibət bildirən hərbi ekspert Ramil Məmmədlinin fikrincə, ermənilərin özləri tərəfindən əvvəlki hakimiyyətin ifşa olunması mühüm məqamdır: “Əvvəla, Robert Köçəryan və Serj Sarkisyan Qarabağ dalğasında hakimiyyətə gəliblər. Onların separatçı fəaliyyəti və Ermənistanın birbaşa iştirakı ilə Dağlıq Qarabağ, ətraf rayonlar 90-cı illərdə işğal edildi. Təbii ki, kənar dairələr də onları himayə edirdi. 1998-ci ildə “Qarabağ klanı” hakimiyyətə gələndən sonra Ermənistan hakimiyyəti danışıqlarda daha radikal mövqe sərgiləyirdi. Artıq 2000-ci ildən başlayaraq ətraf rayonları da Dağlıq Qarabağa birləşdirdiklərini bəyan edirdilər. Laçın və Kəlbəcər rayonlarını ümumiyyətlə qaytarmayacaqlarını deyirdilər. Düzdür, digər 5 rayonu (Ağdam, Cəbrayıl, Füzuli, Qubadlı, Zəngilan) qaytaracaqlarını vəd edirdilər. Ancaq nəyin müqabilində? Dağlıq Qarabağın “müstəqilliyi” müqabilində. Yəni referendum keçirilməsinə Azərbaycan razılaşacağı halda. Yəni erməni tərəfi elə şərt irəli sürürdü ki, bunu qəbul etmək mümkün deyildi. Ətraf rayonların həm təbii resurslarını mənimsəyirdilər, həm də kənd təsərrüfatı məqsədi ilə istifadə edirdilər. Həmin rayonlarda işğal dövründə böyük həcmdə taxıl yetişdirilirdi. Bu baxımdan Paşinyanın Qubadlı ilə bağlı dediklərində həqiqət var”.
Hərbi ekspert onu da əlavə etdi ki, 44 günlük şanlı Vətən müharibəsi düşmənin bütün planlarını alt-üst etdi.
Vidadi ORDAHALLI
