“Azərbaycanla sülh sazişinin bağlanması üçün danışıqlara başlamaq məsələsi gündəmdədir”. Bunu Ermənistanın baş naziri Nikol Paşinyan diplomat günü və Ermənistanın BMT-yə üzv olmasının 30 illiyinə həsr olunmuş tədbirdə deyib.
Paşinyan ölkənin xarici siyasət vəzifələrinə toxunaraq qeyd edib ki, gündəlikdə bir sıra məsələlər var: “Xüsusi nümayəndələr səviyyəsində Ermənistan-Türkiyə dialoqu başlayıb, regional kommunikasiyaların açılması, Ermənistan-Azərbaycan sərhədinin demarkasiyası və delimitasiyası, Azərbaycanla sülh sazişi üzrə danışıqlara başlanması məsələsi gündəmdədir”.
Bundan əvvəl də Paşinyan bənzər açıqlamalar verib, amma praktiki addımlar atmayıb. Lakin dünyada dəyişən geosiyasi reallıqlar fonunda belə ehtimallar var ki, Ermənistan rəhbərliyi bəzi məsələlərin həllini tezləşdirməkdə maraqlıdır.
O baxımdan Paşinyanın son bəyanatını ekspertlər necə dəyərləndirir?
“Ukraynada baş verənlər onların bir sıra gözləntilərini pozdu”
Məsələyə münasibət bildirən AMİP sədri Arzuxan Əlizadənin fikrincə, Ermənistan tərəfinin sülh mesajlarına aldanmaq olmaz: “Əvvəla ona görə ki, bundan əvvəl də bənzər fikirlər səslənib, amma əməli addımlar atılmayıb. Azərbaycan həmişə bəyan edib ki, Ermənistan Azərbaycanın ərazi bütövlüyünü tanıdıqdan sonra sülh danışıqlarına başlaya bilər. Qarşı tərəf isə məsələyə fərqli yanaşır. Ermənistan bəyan edir ki, Qarabağ məsələsinin buna dəxli yoxdur. Yəni o ayrı, bu ayrı. Bax, məsələnin bu tərəfinə biz xüsusi diqqət etməliyik. Paşinyan vədlər versə də, praktiki addımlar atmaqdan yayınır. Paşinyan həm sülh bağlanması, həm sərhədlərin delimitasiyası, həm də yolların, eləcə də kommunikasiya vasitələrinin açılması istiqamətində tez-tez fikirlər səsləndirir. Əsas odur ki, bununla bağlı praktiki addımlar ortada olsun. Biz görürük ki, Ermənistan delimitasiya məsələlərindən yayınır. Hansı ki, bu yöndə işləri sürətləndirmək olar. Digər tərəfdən, Paşinyan Ukraynada proseslərin uzanmasından narahatdır. Ona görə də sözügedən məsələni ön plana çəkir. Azərbaycan Ermənistanla sülh sazişinin imzalanmasını istəyir. Çünki Azərbaycan tərəfi onsuz da öz ərazi bütövlüyünü bərpa edib. Ancaq təkcə bizim istəyimiz yetərli deyil. Erməni tərəfi də gərək sülh üçün üzərinə düşən şərtləri yerinə yetirsin. Söhbət əməli addımlardan gedir. Paşinyan isə daha çox manevr edir. Gözləyir ki, onlar üçün daha əlverişli zəmin yaransın. Ancaq Ukraynada baş verənlər onların bir sıra gözləntilərini pozdu. Bu səbəbdən Paşinyan narahatdır”.
Partiya sədri onu da qeyd etdi ki, bir sıra geosiyasi proseslər sülhlə bağlı proseslərə öz təsirini göstərə bilər.
Vidadi ORDAHALLI
