Məlum olduğu kimi, Qərbin Rusiyaya qarşı tətbiq etdiyi sanksiyalar əsasən yüksək texnologiyalar, energetika və maliyyə sahələri də daxil olmaqla, Rusiya iqtisadiyyatının vacib sektorlarına şamil edilib. Sanksiyalar Qərbin əsas biznes strukturlarına Rusiya şirkətləri ilə əməkdaşlığı qadağan edir.
Bu arada Ermənistanın iqtisadiyyat naziri Vahan Gerobyan bəyan edib ki, Rusiya-Ukrayna müharibəsi və Qərbin sanksiyalarına görə bir çox Rusiya şirkətləri öz bizneslərini Ermənistana köçürmək istəyir. Nazirin sözlərinə görə, Ermənistana gəlmək istəyən müəssisələrin əksəriyyəti yüksək texnologiyalar sahəsinə aiddir və onlar, əsasən, Qərb bazarları ilə işləyən şirkətlərdir. O qeyd edib ki, artıq 10-a yaxın şirkət köçüb, digər bir neçəsi də yoldadır: “Bu şirkətlər əsasən Qərb bazarları ilə işləyən şirkətlərdir. Əslində bizə çox sayda, hətta yüzlərlə şirkət müraciət edib”.
Erməni mediası yazır ki, Ermənistanın Yüksək Texnologiyalar Nazirliyi artıq xarici şirkətlərin Ermənistana köçməsi və yeni biznes qurulmasi ilə məşğul olacaq xüsusi işçi qrup da yaradıb. Bütün bunlar əsasən onunla əlaqələndirilir ki, Ermənistanda şirkət qurmaq üçün qeydiyyat qaydaları olduqca sadədir və hansısa maneə yoxdur.
Maraqlıdır, Qərb Ermənistanın Rusiya şirkətlərinə qucaq açmasına dözəcəkmi?
“Rusiya şirkətləri Ermənistan ərazisində milliləşsə belə, onlara qarşı sanksiya tətbiq oluna bilər”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimov hesab edir ki, daha çox şirkət Ermənistana üz tutsa, o zaman Qərb buna susmaya bilər: “Burada müəyyən hüquqi məsələlər var ki, gərək onlar dəqiqləşsin. Məlum sanksiyalar fonunda, təbii ki, Rusiya sahibkarları çalışacaq şirkətlərini başqa ölkələrə köçürsün. Bununla bağlı onlar alternativ ərazilər axtaracaqlar. O cümlədən, MDB dövlətlərinə və Ermənistana üstünlük verəcəklər. Ancaq bunun hüquq müstəvisi var. Bəli, rus şirkəti Rusiya şirkəti olaraq Ermənistan ərazisində fəaliyyət göstərəcəksə, təbii ki, Qərb buna səssiz yanaşmayacaq. Ancaq hüquqi baxımdan bir sıra çətinliklər olacaq. Çünki həmin şirkətlər başqa ölkədə yerli qanunvericiliyin tələblərinə uyğun olaraq işini quracaq. Bu nöqteyi-nəzərdən ola bilsin ki, sanksiyalar birtərəfli şəkildə tətbiq olunmasın. Bir şeyi nəzərə almaq lazımdır ki, İkinci Dünya müharibəsindən sonra bu səviyyədə böyük sanksiyalar qəbul olunmayıb. Ona görə də Rusiya şirkətləri Ermənistan ərazisində milliləşsə belə, onlara qarşı sanksiya tətbiq oluna bilər. Düzdür, bu, ola bilsin hüquqi baxımdan doğru olmasın, amma yenə də tətbiq oluna bilər. Çünki Qərb Rusiya iqtisadiyyatını çökdürmək istəyir. Ona görə ki, tərəflər arasında ciddi qarşıdurma var”.
Ekspert onu da əlavə etdi ki, Ukrayna böhranı uzanacaqsa, Rusiya şirkətləri harda olsalar da sanksiyalardan yayına bilməyəcəklər.
Vidadi ORDAHALLI
