Rusiya Ukraynanın sabiq dövlət başçısı Viktor Yanukoviçi prezident elan etmək istəyir. Bu barədə “Ukrainskaya Pravda” kəşfiyyat xidmətindəki mənbəyə istinadən məlumat yayıb. Xəbərə görə, Ukraynaya qayıtması üçün onun adından Ukrayna xalqına müraciət ünvanlanması və ya hər hansı informasiya əməliyyatının keçirilməsi mümkündür.
Rusiyanın bu planı reallaşa bilərmi?
Ukraynanın devrilərək ölkədən Rusiyaya qaçan prezidenti Viktor Yanukoviç vətənə xəyanətdə təqsirli bilinərək 13 il müddətinə azadlıqdan məhrum edilib. Yəni o, faktiki olaraq Ukraynada axtarışdadır. Yanukoviç kimdir? O, bugünə qədər iki dəfə ölkənin baş naziri seçilib. Ukraynanın əsas siyasi partiyalarından biri olan Regionlar Partiyasının sədri olub. 2004-cü ildə prezident seçkilərinə qatılıb və ən çox səs yığan ikinci şəxs olub. 2006-cı ilin avqustunda baş nazir olub. Yanukoçiv 2010-cu ilin yanvarında prezident seçkilərində 35% səs yığıb və ikinci tura keçib. Fevralın 7-də 49% səs toplayaraq prezident seçilib. Viktor Yanukoviç 1950-ci il iyulun 7-də Ukraynanın Yenakiyev şəhərində doğulub. Ölkənin ən varlı oliqarxlarından sayılıb. Onun zamanında Ukraynada rüşvət və korrupsiyanın daha da çicəkləndiyi bildirilir.
2004-cü ildən Ukraynanı ayağa qaldıran “Narıncı inqilab” dünya ictimaiyyətinin diqqətini bu ölkəyə yönəltdi. Azadlıq meydanında etirazlar 2004-cü il noyabrın 22-dən başlamışdı. Eyni zamanda müxalifyönlü jurnalist Georgi Qanqadzenin öldürülməsi də hadisələrin daha da gərginləşməsinə səbəb oldu. Belə ki, etirazçılar onun ölümündə prezident Leonid Kuçmanı təqsirkar bildilər. Aylarla davam edən etiraz aksiyalarından sonra 2005-ci il yanvarın 19-da Leonid Kuçma istefa verdi. Yanvarın 23-də Viktor Yuşşenko Ukraynanın rəsmi prezidenti elan edildi. 2004-cü il noyabrın 21-də prezident seçkiləri keçirildi. Seçkilərin nəticələrinə görə, Viktor Yanukoviç Viktor Yuşşenkodan 3% çox səs toplayaraq qalib gəldi. Lakin Ali Məhkəmə seçkilərin obyektiv nəticəsini müəyyən edə bilmədiyinə görə yenidən seçki keçirildi. Dekabrın 26-da baş tutan seçkilərdə 8% səs üstünlüyü ilə Viktor Yuşşenko qalib gəldi. Bu, Ukrayna tarixinə “Narıncı inqilab” kimi düşdü. Viktor Yuşşenko və Yuliya Timoşenkonun liderlik etdiyi inqilabın narıncı adlanmasına səbəb Viktor Yuşşenkonun narıncı bayraq qaldırmağı oldu. Ukrayna növbəti dəfə 2013-cü ilin sonlarında dünya ictimaiyyətinin diqqətini özünə cəlb etdi. Belə ki, 2013-cü il noyabrın 22-dən başlayaraq ukraynalılar prezident Viktor Yanukoviçin Avropa Birliyi ilə assosiativ sazişi imzalamaqdan imtina etməsinə etiraz edərək “Maydan”a toplaşdılar. Günlərlə davam edən aksiyalara sonradan sabiq daxili işlər naziri Yuri Lutsenko və UDAR partiyasının sədri Vitali Kliçko da dəstək oldu. Yanukoviç aksiyalara başçılıq edən müxalif liderlərlə görüşüb onlara hakimiyyət təklif etsə də, nə Lutsenko, nə də Kliçko bununla razılaşmadı. Aksiyalar səngimədən davam etdi və Maydandakı aksiyalarda baş verən qarşıdurmalar 100-ə yaxın etriazçının həyatına son qoydu.
Nəhayət, Yanukoviç hakimiyyətdən devrildi. O, Rusiyaya qaçaraq Moskvanın himayəsinə sığındı. Ölkədə növbədənkənar prezident seçkilərinin keçirilməsi ilə bağlı qərar verildi. Elə həmin vaxtdan da Yanukoviç Rusiyada yaşayır.
Politoloq Rəşad Bayramov qəzetimizə açıqlamasında bildirdi ki, Yanukoviç ssenarisinin reallaşması mümkün görünmür: “Çünki faktiki olaraq xalqda Rusiyaya nifrət var. Şəhərlərin bombalandığı, dinc əhalinin öldüyü bir zamanda Rusiyanın adamına Ukrayna xalqında necə rəğbət ola bilər? Axı müharibəni onlarla edən Rusiyadır. Əksinə, son proseslər göstərir ki, Zelenskinin xalqın arasında olan hörməti daha da artıb. Çünki o, mərdliklə müharibənin önündə dayanıb. Biz görürük ki, Rusiya qoşunlarının daxil olduğu Ukraynanın şəhərlərində əhali yalın əllə onların üzərinə hücum edir. Belə olan təqdirdə Yanukoviçin necə qəbul ediləcəyini özünüz təsəvvür edin. Rusiya bəzi əraziləri ələ keçirsə də, Ukrayna xalqının iradəsini özünə tabe edə bilməyəcək. Bu baxımdan da, Rusiyanın Yanukoviç ssenarisini bəri başdan fiasko kimi qəbul etmək olar”.
Məhəmmədəli QƏRİBLİ
