BMT azad olunmuş ərazilərdə qiymətləndirmə aparmaq üçün Azərbaycana missiya göndərir və qurum burada qiymətləndirmə missiyası həyata keçirəcək.
Mətbuatda yayılan məlumata görə, BMT-nin Azərbaycandakı rezident-əlaqələndiricisi Vladanka Andreeva bildirib ki, onlar Azərbaycan hökuməti ilə birlikdə azad olunmuş ərazilərdə qiymətləndirmə aparacaq. Onun sözlərinə görə, məqsəd bu ərazilərin yenidən bərpası və minalardan təmizlənməsinə dair ən yaxşı planın nədən ibarət olduğunu öyrənməkdir: “Azərbaycana 10 ekspert səfər edəcək. Onların BMT, Dünya Bankı və Avropa İttifaqından nümayəndələri olacaq. Onlar martın 7-dən 17-ə kimi Azərbaycanda olacaq”.
BMT-nin azad olunmuş ərazilərdə qiymətləndirmə aparmaq üçün Azərbaycana missiya göndərməsinin arxasında hansı məqsədlər dayanır?
“Burada artıq saxtakarlığa, yaxud da ki, ikili yanaşmaya, harasa yozmağa yer qalmır”
Siyasi şərhçi Azər Həsrət bizimlə söhbətində bildirdi ki, hələ torpaqlarımız işğal altında olduğu dövrdən Azərbaycan dövləti beynəlxalq qurumların, o cümlədən də BMT-nin Qarabağa missiya göndərməsində maraqlı idi. “Hələ o dövrdə Azərbaycan dövləti maraqlı idi ki, beynəlxalq qurumlar, o cümlədən də BMT və onun struktur vahidləri əraziyə missiyalar göndərsin, araşdırma aparsın, vəziyyəti öyrənsin və gerçəklikləri dünyaya təqdim etsin. Lakin ərazilərimiz Ermənistanın işğalında olduğu dövrdə o torpaqlara missiyalar göndərilmədi, dünya görməzdən gəldi. Yəni başa düşürdülər ki, gələcəkləri təqdirdə görəcəkləri nə olacaq və o reallıqları göstərmək onlar üçün asan olmayacaq. Ona görə də, həmin torpaqlar 30 ilə yaxın bir müddətdə işğal altında gözdən-könüldən iraq tutuldu, ermənilər də orada terrorçular yetişdirdilər, narkotiklər becərdilər, hər cür cinayətkarları oralarda gizlətdilər, öz bəd əməllərini heç bir cəza olmadan həyata keçirdilər. İndi isə torpaqlarımız azad olunub. Torpaqlarımız azad olunan kimi də Azərbaycan Prezidenti, dövlətimiz bütün dünyaya bəyan etdi ki, biz hər kəsin gəlib bu torpaqları görməsini istəyirik. Yəni o ərazilərdə nələrin baş verdiyinə şahidlik etsin. Düzdür, böyük-böyük təşkilatlar, bir çox ölkələrin diplomatları, istimai-siyasi xadimlər, media, QHT təmsilçiləri bu torpaqlara çoxlu sayda səfərlər etdilər. Bu səfərlərdən hesabatlar hazırlanıb yayımlandı. Yəni bir növ tarix üçün şahidlik etmiş oldular”.
A.Həsrətin sözlərinə görə, lakin elə təşkilatlar, elə dövlətlər də var ki, o ərazilərə öz təmsilçilərini göndərmir, yaxud da müxtəlif bəhanələrlə göndərməkdən yayınırlar. “O baxımdan BMT-nin azad olunmuş ərazilərimizə missiya göndərməsi təqdirəlayiqdir. Çünki BMT dünyanın bir nömrəli təşkilatıdır. BMT kimi təşkilatın belə bir məsələdə kənarda qalması, əlbəttə, bizim zərərimizə ola bilərdi. Düşünürəm ki, BMT azad olunmuş ərazilərə bu missiyanı göndərməklə, istəsə də, istəməsə də, kimlərsə təsir etsə belə, orada gördüklərini öz hesabatlarına salmalı olacaq. Bu hesabat da dünyaya bəyan ediləcək. Eyni zamanda tarixin arxivlərində toplanılacaq. Yəni Azərbaycan hazırkı vəziyyətdə bu ərazilərə bu missiyanın təşkil edilməsini arzu edən tərəfdir, bunun üçün hər cür şəraiti yaratmağa həmişə hazır olub. İndi də hazırdır. BMT-nin də bu missiyasının gəlməsi, istənilən halda, Azərbaycanın xeyrinədir. Ona görə ki, dediyim kimi, gəlib nə olduğunu öz gözləri ilə görəcəklər. Burada artıq saxtakarlığa, yaxud da ki, ikili yanaşmaya, harasa yozmağa yer qalmır”.
A.Həsrətin sözlərinə görə, BMT-nin bu missiyasının tezliklə gəlməsinin əhəmiyyəti böyükdür.
İradə SARIYEVA
