Rusiyanın Ukraynaya hərbi müdaxiləsi fonunda, Kremlin tərəfdaş adlandırdığı ölkələr də artıq ondan qaçmağa başlayıblar. Artıq elə bir vəziyyət yaranıb ki, həmin dövlətlər seçim qarşısında qalıblar.
Məsələn, Rusiya ümid edirdi ki, Avropada dostları olan Macarıstan, Yunanıstan və Kipr Yunan Respublikası Avropa İttifaqının Rusiya əleyhinə yekdil qərar qəbuluna mane olacaqlar. Ancaq bununla bağlı gözləntilər tam əksinə oldu. Sözügedən ölkələr Rusiyanın SWİFT-dən çıxarılmasına səs verdilər. Halbuki, ötən il Macarıstan Ukraynadan yan keçən boru kəmərindən Rusiya qazı almaq barədə qərar verdi və bu, Kiyevin narazılığına səbəb oldu. Rusiyaya bir zərbə də tərəfdaşı Hindistandan gəlib. Baxmayaraq ki, bugünlərdə Rusiyanın işğalçı siyasətinə qarşı BMT-də səsvermə keçirilərkən Hindistan Rusiya əleyhinə səs vermədi. Ancaq artıq rəsmi Dehli də öz seçimini edir. Çünki Hindistanın ən böyük bankı olan “State Bank of India” Rusiya şirkətləri ilə əməkdaşlıqdan imtina edib. Hindistan bankı yazılı açıqlamasında bildirib ki, sanksiya altında olan heç bir Rusiya şirkətinə xidmət göstərilməyəcək.
Belə görünür ki, bu gedişlə Rusiya ən yaxın tərəfdaşlarını da sürətlə itirəcək. Nəticədə Rusiyanın yanında tərəfdaş ölkə qalmayacaq.
“Ancaq təəssüf ki, Rusiya bu tələbləri qulaqardına vurur, əksinə, daha da aqressivləşir”
Sözügedən məsələni “Bakı-Xəbər”ə şərh edən “Səs” Media Qrupunun rəhbəri, politoloq Bəhruz Quliyev bunu istisna etmədi. Onun fikrincə, Rusiyanın Ukraynaya qarşı hərbi anneksiyası fonunda sanksiyalar daha da qətiləşdiriləcək: “Rusiyanın Ukraynaya hərbi müdaxiləsinin ardınca Kremlin öz tərəfdaşlarını itirməsi prosesi ilə qarşı-qarşıya qalacağı gözlənilən idi. Rusiya yalnız Avropadakı partnyorları tərəfindən təcrid olunmur, həmçinin əməkdaşlıq imkanlarına doğru hərəkət edən digər ölkələr də həmin məqsədlərindən kənara çəkilmək qərarını veriblər. Misal üçün, əgər Macarıstan, Yunanıstan və Kipr Yunan Respublikası Rusiya ilə sıx təmaslarda olubsa və bu gün həmin təmaslardan geri çəkilibsə, Şərqi Avropa ölkələrində də həmin tendensiyalar yaranmağa başlayıb. Biz bu ölkələr sırasına Sloveniyanı, Çernoqoriyanı, Bolqarıstanı və s.ölkələri də əlavə edə bilərik. Bugünkü situasiya dünyanın siyasi-iqtisadi vəziyyətinə yenidən baxmaq tələblərini ortaya çıxarıb və eyni zamanda, bir sıra dövlətlər öz maraqları kontekstindən çıxış etməklə vəziyyətin hansı istiqamətə doğru inkişaf edəcəyini gözləyir”.
Politoloq hesab edir ki, cərəyan edən proseslər Rusiyanın əleyhinə doğru getməkdədir: “Hətta Rusiya ilə sıx əməkdaşlıq edən ölkələr belə BMT və s. qurumlar tərəfindən qəbul edilən sanksiyalara qoşulurlar. Əgər bu gün Hindistanın mərkəzi bank sistemi də həmin sanksiyalara qoşulursa, təsəvvür edin ki, digər ölkələr Rusiyaya qarşı hansı sərt qərarlara imzalarını atacaqlar. Lakin düşünmürəm ki, Rusiya təbiq edilən sanksiyalar qarşısında geri çəkilsin. Kremlin ambisiyaları göz önündədir. Yəni bu gün Ukrayna şəhərlərinin, dinc əhalisinin raket zərbələrinə məruz qoyulması, eləcə də mülki obyektlərin, yaşayış evlərinin, sosial infrastrukturlarının dağıdılması – bütün bunlar dünyanın gözləri qarşısında baş verir. Baş verənlərə görə dünya dövlətləri, təşkilatlar və çoxsaylı qurumlar öz tələblərini irəli sürür. Ancaq təəssüf ki, Rusiya bu tələbləri qulaqardına vurur, əksinə, daha da aqressivləşir. Belə olan vəziyyətdə proseslərin get-gedə daha da aktivləşməsini proqnoz edə bilərik. Bu proseslər əsasən Rusiyanın Ukraynaya qarşı tətbiq etdiyi hərbi anneksiyası, yaxud ilhaqı fonunda daha da qətiləşdiriləcək, sərtləşdiriləcək”.
Politoloqun fikrincə, ümid var ki, məhz bu sanksiyalar öz nəticəsini versin və nəhayət, Ukrayna torpaqlarına sülh gəlsin.
Vidadi ORDAHALLI
