Rusiyanın Ukraynaya müdaxiləsi və bunun ətrafında qarşıdurmanın dərinləşməsi erməniləri narahat etməyə başlayıb. Erməni tərəfini əsas narahat edən məqam odur ki, qarşıdurma fonunda ATƏT-in Minsk Qrupunun sıradan çıxması sürətlənəcək. Münasibətlər kəskin məcrada olduğu üçün Rusiya Minsk Qrupu çərçivəsində ABŞ və Fransa ilə əməkdaşlıq etməkdə maraqlı olmayacaq. Hansı ki, müharibədən sonra ermənilərin əsas ümidi Minsk Qrupuna idi. Bütün resurslarını səfərbər etmişdilər ki, Minsk Qrupu yenidən təşəbbüsü ələ alsın.
Erməni mətbuatı yazır ki, Minsk Qrupu fəaliyyətə başlasa belə, bundan sonra əvvəlki formatda hər üç həmsədrin eyni mövqedən çıxış etməsi real deyil: “Aydındır ki, Qərb-Rusiya gərginliyindən bizə heç bir xeyir gəlməyəcək. Ermənistanın xarici siyasəti üçün manevr sahəsi kəskin şəkildə daralacaq. Rusiyanın mövqeyi zəifləsə, o zaman Cənubi Qafqazda bəziləri düşünə bilər ki, bölgədə Rusiyaya qarşı ikinci cəbhənin açılmasının doğru vaxtı çatıb. Bu geosiyasi toqquşmada ikisi Qərbi, digəri Rusiyanı təmsil edən ATƏT-in Minsk Qrupunun həmsədrləri keçmişdə Qarabağ məsələsində konsensusa gəliblər. Yaranmış eskalasiya fonunda o sağ qalacaqmı? Çətin ki, əvvəlki konsensus bərpa olunsun”.
Görünən odur ki, Ukraynada baş verənlər fonunda ermənilərin Minsk Qrupu ilə bağlı məyusluğu artır.
“Ermənilər məhz bu səbəbdən məyusdur”
Məsələyə münasibət bildirən Dirçəliş və Tərəqqi Partiyasının sədri Ramil Hüseynovun sözlərinə görə, müşahidələr göstərir ki, Ermənistan tərəfinin Minsk Qrupu ilə bağlı gözləntiləri fiaskoya uğrayır: “Düzdür, Azərbaycan bütün vasitələrlə Minsk Qrupunun əvvəlki formatda fəaliyyətinə qarşı çıxır və müharibədən sonra buna imkan vermir. Ancaq nəzərə almalıyıq ki, Azərbaycan rəsmi şəkildə birtərəfli Minsk Qrupu formatından imtina etmir. Bu da başadüşüləndir. Ona görə ki, belə olan halda böyük dövlətlərin, beynəlxalq təşkilatların ciddi təzyiqinə məruz qala bilərik. Ermənistan təbliğat baxımından bundan bizim əleyhimizə istifadə edəcək. Bu səbəbdən Azərbaycan daha ehtiyatlı siyasət yurüdür. Bəyan edir ki, Minsk Qrupu ən yaxşı halda humanitar xarakterli məsələlərin həllində hansısa rol oynaya bilər. Buna rəğmən, Ermənistan və onları himayə edən bütün dairələr Minsk Qrupu formatını bərpa etməkdən ötrü davamlı səylər göstərirlər. Qərb ölkələrinin səfirlərindən tutmuş, ən yüksək ranqlı məmurları belə Minsk Qrupunun bərpası ilə bağlı çağırışlar edirlər. Həmsədrlərin yenidən təşəbbüsü ələ almaları ilə bağlı istəklərini bəyan edirlər. Sözügedən tendensiyaları görməzdən gəlmək doğru olmaz. Ancaq Ukrayna ətrafında baş verən hadisələrin kəskinləşməsi Minsk Qrupuna olan ümidləri demək olar məhv etdi. Ermənilər məhz bu səbəbdən məyusdular. Çünki Rusiya-Qərb qarşıdurması fonunda Minsk Qrupunun dirilməsi mümkünsüzdür. Ən azından ona görə ki, bir həftə əvvəl belə bir dramatik qarşıdurmanın baş verəcəyi heç kəsin, o cümlədən ermənilərin təsəvvürünə gəlməzdi. Ancaq bu baş verdi”.
Bu səbəbdən partiya sədri hesab edir ki, Minsk Qrupu “gorbagor” oldu.
Vidadi ORDAHALLI
