Bütün dünyanın diqqətinin Ukraynada baş verənlərə yönəldiyi bir dövrdə ABŞ Konqresindəki ermənipərəst konqresmenlər erməni separatizminə haqq qazandırmaq üçün yenidən fəallaşıblar. Sumqayıt hadisələrinin 34-cü ildönümü fonunda ermənipərəst konqresmenlər yenidən buynuz göstərməyə başlayıblar. Uydururlar ki, Vətən müharibəsi və ondan sonrakı proseslər guya etnik ermənilərin yox edilməsinin davamıdır.
Bu arada Konqresdəki ermənipərəst konqresmenlər bəyanatla çıxış ediblər. Bəyanatda iddia ediblər ki, guya Azərbaycan dövlət himayəsi altında Ermənistan və “Artsaxa” qarşı zorakılıq siyasətini davam etdirir: “Erməni əsgərləri qanunsuz olaraq həbs və işgəncələrə məruz qalmaqda davam edir, minlərlə dinc sakin təhlükə altındadır. Erməni mənəvi və mədəniyyət abidələri Azərbaycanın nəzarətinə keçib və daim təhlükə altındadır. Biz qalan erməni hərbi əsirlərin və əsir götürülmüş mülki şəxslərin qeyd-şərtsiz azad edilməsinə çağırış etməyi dayandırmamalı, ABŞ-ın mövcud rejimə yardımını dayandırması və azad, müstəqil “Artsax”da demokratiyanı dəstəkləmək üçün daha çox işlər görməliyik”.
Bununla onlar separatizmi açıq formada dəstəkləməklə yanaşı, qarşıdurmanı yenidən alovlandırmaq məqsədi güdürlər. Bütün bunlar isə onu göstərir ki, sözügedən konqresmenlər Qarabağ tənzimləməsinin dinc yolla həyata keçirilməsində, regionda kommunikasiya xətlərinin açılmasında maraqlı deyillər.
“Ölkəmizin Cənubi Qafqazda və ümumiyyətlə regionda önəmi böyükdür”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, indiki məqamda ermənipərəst konqresmenlərin qızışdırıcı mövqedən çıxış etmələri yaranmış vəziyyətdən yararlanmaq cəhdidir: “Məsələ ondadır ki, bütün dünyanın diqqəti Rusiyanın Ukraynaya təcavüzünə yönəlib. Məqsəd odur ki, genişlənən təcavüzün və onun yaratdığı fəlakətlərin qarşısı alınsın. O üzdən, Konqresin bütün diqqəti buna yönəlməlidir. Ancaq biz görürük ki, erməni lobbisindən bəslənən konqresmenlər bunda maraqlı deyillər. Ona görə ki, zaman-zaman onlar belə mənasız çağırışlar etməklə erməni lobbisindən müəyyən vəsaitlər qoparırlar. Ancaq hesab edirəm ki, ermənipərəst konqresmenlərin sözügedən fəaliyyətinin hansısa səmərəsi olmayacaq. Çünki bunun bir perspektivi yoxdur. Sadəcə, həmin şəxslər öz varlıqlarını göstərməkdən ötrü Qarabağla bağlı pozucu çağırışlar edirlər. Ermənilərə göstərmək istəyirlər ki, onlardan asılı olan nə varsa onu edirlər. Konqresmenlərin nə deməsindən asılı olmayaraq, Dağlıq Qarabağ məsələsi Azərbaycanın gücü hesabına həll edilib. Hesab edirəm ki, lazım gələrsə, Azərbaycan dövləti yaranmış situasiyadan yararlanıb Xankəndidə antiterror əməliyyatı keçirməlidir. Ona görə ki, bir də separatçılar baş qaldıra bilməsin. Konqresmenlər nə qədər cəhd etsələr də, Birləşmiş Ştatlar Azərbaycanla bağlı prioritetlərini dəyişməyəcək. Çünki ölkəmizin Cənubi Qafqazda və ümumiyyətlə regionda önəmi böyükdür”.
Bu baxımdan partiya sədri hesab edir ki, erməni lobbisi öz çirkin məqsədlərini həyata keçirə bilməyəcək.
Vidadi ORDAHALLI
