Ukrayna prezidenti Vladimir Zelenski NATO üzvlərinin Ukraynanın təhlükəsizliyi üçün hüquqi təminat hazırlamalı olduğunu deyib.
Prezident br daha israrla beynəlxalq birliyi ölkəsinə dəstək göstərməyə çağırıb və Ukrayna dövləti üzərində uçuşa qadağan olunan zonanın yaradılmasının vacibliyini vurğulayıb:
“Burada söhbət NATO ölkələrinin müharibəyə cəlb olunmasından getmir. Həqiqət bundan ibarətdir ki, Alyans artıq Rusiya ilə müharibəyə daxildir. İndi tammiqyaslı savaş gedir”.
Ukrayna prezidenti Moskva ilə də bağlı şərtini açıqlayıb. Deyib ki, tamhüquqlu danışıqların mümkün olması üçün Rusiya Ukrayna şəhərlərini atəşə tutmağı dayandırmalıdır: “Heç olmasa, insanlara atəş açmağı dayandırmaq, sadəcə atəşi dayandırmaq və sonra danışıqlar masasına oturmaq lazımdır”,
Eyni zamanda, Zelenski Rusiya ilə gələcək danışıqların perspektivləri ilə bağlı suala birmənalı cavab verməyib. O, jurnalistin Rusiya tərəfinin danışıqlara hazır olub-olmaması və bu görüşlərin məhsuldar olub-olmayacağı ilə bağlı sualını “Baxarıq” - deyə cavablandırıb.
Prezidentin sözlərinə görə, Moskva qoşunlarını 6 gün əvvəl tutduqları mövqelərə çəkməyə razılıq versə, bu, Rusiyanın sülhə hazırlığına işarə olacaq: “Əks halda bu, vaxt itkisidir”.
Zelenskinin həm NATO-nu, həm də Rusiyanı fakt qarşısında qoyması barədə ekspertlər nə düşünür?
Politoloq Əhəd Məmmədli “Bakı-Xəbər”ə açıqlamasında bildirdi ki, Zelenskinin iradları və təklifləri haqlıdır: “NATO ərazisində münaqişə olan ölkələri üzvlüyə daxil etmir. Belə olacağı halda NATO avtomatik olaraq Rusiya ilə tam açıq müstəvidə üz-üzə gəlmiş olar. İndiki məqamda NATO bunu istəmir. Üzvlük həm də NATO-nun müəyyənləşdirdiyi standartlara uyğun həyata keçirilir. İstənilən halda, NATO Ukraynanı lazımınca müdafiə etmir. Buna görə də, Zelenski heç olmasa təhlükəsizliyə qarantla bağlı dəstək almaq istəyir ki, Rusiyaya qarşı dayana bilsin. NATO silah verə, sanksiyaların qoyulmasına dəstək ola bilər, amma açıq şəkildə Rusiya ilə qarşıdurmaya gedən deyil. Üzvlüklə yanaşı, NATO Ukraynanın təhlükəsizliyinə də açıq təminat verə bilmir. NATO pərdə arxasında qalıb oynamağı sevir. Rusiyanın hərbi amili çox ciddidir. Bundan həm də ehtiyat edirlər. Görünən budur ki, Ukraynadan bir platsdarm kimi Rusiyaya qarşı istifadə edirlər. Özləri isə kənardan müşahidəçi gözü ilə baxırlar. Zelenskinin Rusiya qarşısında qoyduğu tələb haqlıdır, ancaq Putin ona əməl edən deyil”.
Məhəmmədəli QƏRİBLİ
