Avropa İttifaqı sanksiya siyahısına yeni fiqurantlar daxil edib. Siyahıya daha 26 fiziki şəxs və bir şirkət daxildir. Sənəd Aİ-nin rəsmi jurnalında dərc edilib, qərar qüvvəyə minib. Bu barədə Rusiya mediası məlumat yayıb.
Siyahıda digər rəsmi şəxslər və hərbçilərlə birlikdə Rusiya ordusunun Cənub Hərbi Dairəsinin komandanının müavini Rüstəm Muradov da var.
Xatırladaq ki, Rüstəm Muradov Rusiya Federasiyasının Qarabağdakı sülhməramlı qüvvələrinin komandanı kimi ötən il sentyabrın 6-da öz missiyasını başa vurub. Muradov 2020-ci ilin payızında münaqişədən sonra Rusiya sülhməramlı kontingentinin komandiri təyin edilib. 2022-ci il yanvarın 11-dən Rusiya sülhməramlı kontingentinə general-mayor Andrey Volkov rəhbərlik edir.
Belə çıxır ki, Rusiyanın bizə sülhməramlı kimi göndərdiyi generalı Avropa cani sayır?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Rüstəm Muradov sülhməramlı mahiyyətli hərbçi deyil, o əsl müharibə generalıdır: “Rusiyanın onun kimi adamı bura sülhməramlıların başçısı kimi göndərməsindən məlum oldu ki, missiyanın mahiyyəti yalnlz sözdə sülhməramlı ola bilər. Onun sonrakı fəaliyyətində biz bunu aydın gördük. 1996-cı ildə 23 yaşında olan Rüstəm Muradov Çeçenistandakı Yuxarı Tsentoroy kəndini ələ keçirmək üzrə əməliyyatda fərqlənərək “Cəsarət” ordeninə layiq görülüb.
O vaxt gənc leytenant olan Muradov Buynakskdakı 136-cı briqadanın kəşfiyyat bölüyünün komandiri idi. O, ikinci “Cəsarət” ordeniyə 2000-ci ildə Aslan Masxadovun Datoydakı qərargahını ələ keçirməyə görə təltif olunub. Bu əməliyyata general-mayor Vladimir Şamanov rəhbərlik edirdi.
Muradov Çeçenistanda xidmətini 2009-cu ilə qədər davam etdirib. O, Şali şəhərində 17-ci motoatıcı briqadanın komandiri olub, bundan sonra rotasiya ilə Zabaykalye bölgəsinə keçirilib.
Borzda yerləşən Şərqi Hərbi Dairənin 36-cı motoatıcı Lozovskaya briqadasının komandiri olaraq, general-mayor rütbəsini alıb. O, eyni ərəfədə Prezident Dmitri Medvedev tərəfindən Hərbi Xidmətə görə ordenlə təltif olunur.
Muradov 2008-ci ildə Cənubi Osetiyadakı beş günlük müharibədə iştirak etməyib. Çünki o, həmin vaxtlarda Şərqi Hərbi Dairədə briqada komandiri idi.
2014-cü ildə Ukraynanın şərqində müharibə başlayanda general Muradov Rusiya Silahlı Qüvvələri Baş Qərargahının Hərbi Akademiyasında oxuyurdu. 2016-cı ildə bölgədə aparılan aktiv döyüşlər başa çatandan sonra o, Atəşkəsə Nəzarət üzrə Birgə Rusiya-Ukrayna Mərkəzində (ANBRU) Rusiyanın nümayəndəsi olub.
2017-ci ildə Suriyada hərbi müşavir kimi xidmət edən general, Deyr əz-Zor bölgəsində yerləşən Rusiya hərbi qüvvələrinə komandanlıq edib və həmin ezamiyyətin yekunlarına görə ölkənin ən yüksək mükafatına - Rusiya Federasiyasının Qəhrəmanı adına layiq görülüb. Mükafatı ona Kremldə prezident Vladimir Putin tədqim edib.
Suriyadan qayıtdıqdan sonra general Muradov Qarabağa yerləşdirilən sülhməramlı briqadanın daxil olduğu Mərkəzi Hərbi Dairəsinin 2-ci Ümumqoşun Ordusuna komandanlıq edib.
Hazırda isə Muradov Ukrayna cəbhəsində vuruşur. Görünən budur ki, gənc yaşlarından Rusiyanın bütün müharibələrində iştirak edən Muradovun adı həmin siyahıya təsadüfən düşməyib”.
Məhəmmədəli QƏRİBLİ
