Dağıstanlılar Ukrayna ilə müharibədə iştirakdan imtina edir. Yerli mətbuatda yayılan məlumatlara görə, bunu Rusiyanın “Memorial” hüquq müdafiəsi mərkəzinin vəkili Mariya Aqaltsova öz Feysbuk səhifəsində yazıb.
O bu məlumatı etibarlı şəxslərə istinadən verdiyini bildirib: “Dağıstandan etibarlı şəxslər bildirdilər ki, Buynaksk və Kaspiyskdən olan yüzə yaxın dağıstanlı gənc Ukrayna ilə müharibədə iştirak etməkdən imtina edib. Onlar xidməti müqaviləyə xitam verərək vətənə qayıdıblar. Sevinirəm ki, ruslara lazım olmayan müharibədə qardaş xalqa qarşı döyüşməkdən imtina edənlər var”.
Qeyd edək ki, bundan əvvəl Dağıstandan, Çeçenistandan olan bəzi gənclər sosial şəbəkələrdə, Teleqram kanallarında videomüraciətlər yayaraq müharibədə iştirak etməkdən imtina etdiklərini bildiriblər. Çeçenistanlı gənclər adından videomüraciət yayan gənclərdən biri isə bildirirdi ki, bu müharibədə çeçen xalqı yox, Kadırovun dəstəsi iştirak edir. Həmin gənc həmçinin öz ərazilərini Rusiya işğalından qorumaq, dövlət müstəqilliklərini müdafiə etmək üçün döyüşən ukraynalılara dəstək nümayiş etdirib...
"Dağıstandan olan hərbçilər Ukraynada döyüşməkdən imtina edirlərsə..."
Siyasi ekspert Rövşən Rəsulov "Bakı-Xəbər"ə bildirdi ki, Rusiya-Ukrayna müharibəsi amilində dünyanın iki qütbə bölündüyünü deyə bilərik. "Lakin həqiqət budur ki, bu qütblərdə Ukraynanın haqlı, ədalətli mövqeyini daha çox dəstəkləyənlər mövcuddur. Diqqət yetirsək görərik ki, Şərqi Avropada Rusiyanın müttəfiqi olan Belarus, həmçinin Serbiya açıq-aşkar Rusiyanın cinahında dayanıblar. O cümlədən, Cənubi Amerikada bir sıra ölkələr – Nikaraqua, Salvador, Venesuela, Kolumbiya kimi ölkələr də Rusiyanın Ukraynaya hərbi müdaxiləsini dəstəkləyir. Əbəs deyil ki, bu ölkələrdən bəziləri hətta Gürcüstanın işğal altındakı bölgələri olan Abxaziya və Cənubi Osetiyanı da separatçı olmalarına rəğmən, tanıyırlar. Rusiyanın Krımı ilhaq etməsindən sonra Donetsk və Luqans kimi separatçı qurumlar da Rusiyadan sonra sözügedən dövlətlər tərəfindən dərhal tanındı. Bu o deməkdir ki, dünya iki qütbə bölünüb və bu qütbləşmə əslində get-gedə daha da dərinləşir, eyni zamanda da təhlükəli vəziyyət yaratmağa başlayır".
Bütün bunlara baxmayaraq, bu gün Rusiyanın özündə belə parçalanmalara start verildiyini qeyd edən R.Rəsulovun sözlərinə görə, Kremlin Kiyevə müharibə elan etməsi milyonlarla rusun savaşa qarşı çıxması ilə müşahidə olunur. "Əgər bu gün Moskvada, Sankt-Peterburqda və Rusiyanın digər iri meqapolislərində, vilayətlərində müharibəyə qarşı etirazların miqyası böyüyürsə, həmin hal Belarusda da eyni şəkil almağa başlayır. Yəni burada məsələ dövlətin qəbl etdiyi qərar deyil, daha çox mənəvi baxış prizmaları nəzərə alına bilər. Xalq etirazı, xalq itaətsizliyi isə dövlətin qəbul etdiyi hər hansı bir qərarı dəyişə bilər, o cümlədən, Rusiyanın Ukraynaya qarşı davam etdirdiyi müharibə konteksti də həmin faktorlara söykənir.
Baxın, Dağıstanda formalaşmış hərbi birliklər Rusiya Federasiyasının silahlı qüvvələri tərkibində yer alsalar da, onların müharibədə iştirak etməkdən boyun qaçırmaları artıq Ukraynanın ədalət prinsiplərinin daha üstün olduğunu göstərir. Bu insanlar yaxşı bilirlər ki, nahaq yerə qan tökmək, günahsız insanları hədəfə çevirmək böyük cinayətdir. Nəzərə alsaq ki, Dağıstandakı hərbi birliklərdə hərbi xidmət aparan insanlar həm də İslam dininin ehkamlarına dərindən uyan insanlardır, bu zaman həmin məsələnin daha dərin köklərə əsaslandığını da qeyd edə bilərik. Çünki İslam dinində nahaq yerə qan tökmək, müharibə aparmaq, qeyri-müsəlmanın səfində döyüşmək haram buyrulub. Əslində bu çox incə bir məsələdir.
Düzdür, bu gün Çeçenistandakı Kadırov silahlıları da Rusiyanın cinahında yer alırlar, hətta mülki ukraynalılara qarşı silah qaldırırlar, işğalda açıq-aşkar dəstək göstərirlər. Amma gəlin görək, Avropada Zakayevin rəhbərliyi altındakı İçkeriya quruluşunun bu müharibəyə baxışı necədir? Bildiyimiz kimi, Zakayev Belçikadan müraciət edərək, Avropada 300 minə qədər mühacir çeçenin yaşadığını bildirib və istənilən anda Ukraynanın ədalətli müharibəsinə dəstək göstərə biləcəklərini bildirib. Yəni fakt budur ki, Rusiyada yaşayan çeçenlərlə Avropadakı çeçenlər arasında da böyük fərqlər mövcuddur, o cümlədən, inanmıram ki, Çeçenistandakı sadə çeçenlər də müharibənin tərəfdarı olsunlar. Bu, sadəcə Kadırovun Kremlə yarınması üçün öz döyüşçülərini boş yerə qurban verməsi anlamını daşıya bilər. Ona görə də əgər Dağıstandan olan hərbçilər Ukraynada döyüşməkdən imtina edirlərsə, bunu sadəcə alıqışlamaq olar.
Beləliklə, biz o nəticəyə də gələ bilərik ki, Rusiyanın aqressivləşməsi ona çox baha başa gəlməkdədir və burada bir daha haqq nazilər, üzülməz atalar misalı yada düşür. Bu gün Ukraynanın dinc şəhərlərinə çoxsaylı raketlər, artilleriya mərmiləri, Cenevrə Konvensiyası tərəfindən qadağan olunmuş bombalar atılsa belə, ukraynalılar öz mücadilələrini davam etdirəcəklər. Artıq 5 gündən artıqdır davam edən sınmayan müqavimət də bunu deməyə kifayət qədər zəmin yaradır. İnanırıq ki, savaş tezliklə ədalətli müstəvidə başa çatacaq və Ukraynanın ərazi bütövlüyü qorunacaq, təmin və bərpa olunacaq"-deyə R. Rəsulov qeyd etdi.
İradə SARIYEVA
