Azərbaycanın Baş prokuroru Kamran Əliyev qurumun 2021-ci ilin yekunlarına həsr olunmuş kollegiya iclasında bir sıra məqamlara toxunub. Baş prokuror kollegiya iclasında qeyd edib ki, xarici ölkələrdə olan və təqsirləndirilən şəxslərə məxsus əmlakın müsadirəsi prosesinə başlanılıb.
K.Əliyevin açıqlamasına əsasən, ötən il xüsusi müsadirə sahəsində aktivlərin aşkarlanması və izlənməsi üzrə görülən tədbirlər nəticəsində müttəhimlərə məxsus 227 daşınmaz əmlak, 83 torpaq sahəsi, 314 nəqliyyat vasitəsi, müxtəlif banklarda 51 kart hesabı və 22 cari hesab müəyyən edilib. Faktiki olaraq təqsirləndirilən şəxslərə məxsus 109 nəqliyyat vasitəsi və 12 daşınmaz əmlak aşkar edilib. Eyni zamanda, xaricdə olan əmlakın müsadirəsilə bağlı lazımi tədbirlər görülüb.
Sirr deyil ki, ümumilikdə bir sıra məmurlar dövlətdən oğradıqları vəsaitləri əsasən xaricə aparır. Sonradan onu aşkar edib geri qaytarmaq olduqca çətin olur. Buna həm böyük vaxt lazım olur, həm də ciddi həcmdə vəsaitlər. O üzdən necə etmək olar ki, həmin pullar gedib xaricdə əmlaka çevrilməsin? Elə etmək olmazmı ki, məmurlar pulumuzu xaricdəki şəxsi əmlaklara yönəltməsin? Ən azından belə hallar minimum səviyyəyə ensin.
“Maliyyə Nazirliyi hüquq müafizə orqanları ilə birlikdə məmurların hesablarına nəzarət etməlidir”
Sözügedən məsələyə aydınlıq gətirən hüquqşünas Şəmsəddin Əliyevin fikrincə, bununla bağlı yeni hüquqi mexanizmlər tapılmalıdır: “Çünki bəzi məmurların korrupsiya yolu ilə mənimsədikləri vəsaitləri xaricə daşımaları yeni deyil. Uzun illərdir ki, bu, problem var. Onlar müxtəlif qanunsuz yollarla vəsaitləri ölkədən çıxarıb xaricdə onu leqallaşdırırlar. Nəticədə ölkədən kapital axını güclənir və iqtisadiyyatmız bundan itirir. Qərb ölkələrində mənşəyi bəlli olmayan vəsaitlərlə bağlı hüquqi addımlar atılır. Etiraf etmək lazımdır ki, belə hallar az deyil. Hesab edirəm ki, korrupsiya ilə mübarizə tədbirləri çərçivəsində onlarla əməkdaşlığı genişləndirməliyik. Son illər dövlət vəsaitlərini mənimsədiklərinə görə, bir sıra kiçik və orta ranqlı məmurlar məsuliyyətə cəlb edilib. Onların əmlakı müsadirə edilib. Ancaq bu hələ hamısı deyil. Müxtəlif vasitələrlə oğurladıqları vəsaitləri xaricə aparmağa nail olan şəxslər var. Hesab edirəm ki, vəzifə başında olan məmurların fəaliyyətinə nəzarət olmalıdır. Adətən onlar formal olaraq hansısa qohumu adına şirkət açaraq belə fəaliyyətlə məşğul olurlar. Ona görə də bu kimi məsələlərə nəzarət artırılmalıdır. İllər əvvəl Rabitə Nazirliyində məmurların küllü miqdarda vəsaitləri mənimsədiklərinin şahidi olduq. Onların bəziləri bir müddət həbsdə qaldıqdan sonra azadlığa çıxdı. Təkcə onların həbsi ilə məsələ bitmir. Ona görə də Maliyyə Nazirliyi hüquq müafizə orqanları ilə birlikdə məmurların hesablarına nəzarət etməlidir. Dolayı vasitələrlə ölkədə vəsaitlərin çıxarılmasına imkan verilməməlidir. Ən nəhayət maliyyə amnistiyası verilsə, hesab edirəm ki, çıxarılan vəsait ölkə iqtisadiyyatına investisiya şəklində yönəldilə bilər. O üzdən, iqtisadiyyatı daha da liberallaşdırmaq və islahatları dərinləşdirmək lazımdır”.
Hüquqşunas hesab edir ki, bütün bunlardan sonra korrupsiya yolu ilə ölkədən vəsaitlərin çıxarılması minimuma enə bilər.
Vidadi ORDAHALLI
