Ermənistanda müxalifəti təmsil edən "Parlaq Ermənistan" partiyasının lideri Edmon Marukyan bildirib ki, ölkə parlamentinə iyunun 20-nə planlaşdırılan növbədənkənar seçkilər ləğv edilə bilər. Siyasətçi bunu partiyasının qurultayında deyib.
Marukyan bəyan edib ki, Azərbaycan-Ermənistan sərhədindəki Zəngəzurda (Sünik) gərginlik kəskinləşəcəyi təqdirdə, parlamentə erkən seçkilərin ləğv olunacağını istisna etmir: "Bilin ki, bu baxımdan vəziyyət çox mürəkkəbdir və daha da ağırlaşarsa, seçkilərin baş tutmayacağını istisna etmirəm".
Marukyan erməni cəmiyyətində nifrətin hökm sürdüyünü də vurğulayıb: "Ölkə bölünüb, cəmiyyətimiz bir-birinə qarşı nifrətlə doludur. Bu nifrət çoxdan təbliğ olunur, biz bu barədə demişik. Əfsuslar olsun ki, indiki seçki prosesi yenə də nifrətin, ayırıcı xətlərin və qarşıdurmaların təbliği yolu ilə gedir".
Ermənistan müxaifətinin Zəngəzur bəhanəsi ilə seçkini təxirə salmaq planının arxasında hansı amillər dura bilər?
Politoloq Rəşad Bayramov “Bakı-Xəbər”ə açıqlamasında bildirdi ki, Ermənistanda seçki öncəsi siyasi situasiya mürəkkəbdir: “Biz görürük ki, Zəngəzurla bağlı situasiyanı erməni hakim dairələri məqsədli şəkildə qabardır. Hiss edilir ki, Ermənistan nədənsə yayınmaq üçün bu bəhanəni ortaya atır. Əslində isə Zəngəzur ətrafında heç nə baş vermir. Sadəcə, Azərbaycan öz sərhədini bərpa edir. Paşinyan hakimiyyəti bilir ki, seçki onların son şansıdır. Həm də anlayırlar ki, cəmiyyətdəki gərginlikdən seçkidə istifadə oluna bilər. Reytiqdə Paşinyan hamını üstələyir. Ancaq onun hakimiyyətdə qalmasını istəməyən qüvvələr bu amildən istifadə edə bilər. Buna görə də, özünə nisbətən yaxın olan müxaliflərin dili ilə belə təklif irəli sürür. Başlıca məqsədlərdən biri də Azərbaycanla nəzərdə tutulan sülh sazişinin imzalanmasından yayınmaq cəhdidir. Çünki Azərbaycanın müəyyən gözləmələri oradakı seçki ilə bağlıdır. Hətta Prezident İlham Əliyevin özü də bəyan etdi ki, seçkilərlə bağlı həssas anda Ermənistan hakimiyyəti hansısa sazişi imzalamaq gücündə deyil. Yəni Azərbaycan Ermənistan daxilində gedən siyasi prosesləri diqqətlə izləyir. Hətta deyərdim ki, bizim ora olan təsirimiz də güclüdür. Ermənistandakı seçkiləri pozmaqda maraqlı olan dairələrdən biri də Qərbdir. Məsələn, Fransa kimi ölkə bölgədə dayanıqlı sülhün bərqərar olmasını istəmir. Çünki bunun əsas qarantoru Rusiya sayılacaq. Onlar da Rusiyanın bölgədəki nüfuzunun artmasına qarşıdırlar”.
Politoloqun sözlərinə görə, Ermənistan müxalifətinin bu tələbi keçərli olmayacaq: “Çünki əhali seçkiyə ümid bəsləyir. Onlar Ermənistanın gələcəyini həmin seçkidə görürlər. Hansısa məqsədə görə onun təxirə salınması baş tutarsa, Ermənistanda üsyan baş qaldıra bilər. Narazı təbəqə istəyini qeyri-sivil üsulla reallaşdıra bilər”.
Məhəmmədəli QƏRİBLİ
