Son günlərin hadisələri ermənilərin kürkünə əməlli-başlı birə salıb. Qaragöl məsələsinin gündəmə gəlməsi, Azərbaycan əsgərlərinin tarixi ərazilərimizdə görünməsi nəinki erməni siyasətçiləri, eləcə də bizim kəndlərdə yaşayan sadə erməniləri də qıcıqlandırır.
Həm Gorusda yaşayan ermənilər, həm də erməni siyasətçiləri sosial şəbəkələrdə və KİV-də Azərbaycan dövlətçiliyinə qarşı şər-böhtan kampaniyası aparırlar, xüsusən də xarici KİV-in oradan hazırladıqları reportajlarda danışan ermənilər Azərbaycanla bağlı təxribatçı, həqiqətə uyğun olmayan fikirlər səsləndirirlər.
Ermənilər iddia edirlər ki, guya “erməni dövlətçiliyinin tarixi qədim”, Azərbaycan dövlətçiliyinin tarixi isə “1920-ci ildə başlayıb”. Bir sözlə, ermənilər sosial şəbəkələrdə və KİV-də Azərbaycanın 1920-ci ildə Bolşevik Rusiyası tərəfindən “yaradıldığı” barədə cəfəngiyyatlar danışmaqdadırlar.
Zəngəzur məsələsində Azərbaycanla bağlı təxribatlar yayan ermənilər yalandan iddia edirlər ki, guya Ermənistan 1918-ci, Azərbaycan isə 1920-ci ildə “qurulub”.
Qasım Hacıyev: “Erməni tarixçiləri həmişə bu cəfəng fikri yazıblar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, nəinki erməni siyasətçiləri, hətta erməni tarixçiləri belə keçən əsrin ortalarından, xüsusən də 80-ci illərin sonlarından bu cəfəng fikri yazıblar, hətta o vaxt bunu Mərkəzi Komitəyə də təqdim ediblər.
Q.Hacıyev qeyd etdi ki, keçən əsrin 80-ci illərinin sonlarına yaxın bir sıra şovinist erməni tarixçiləri Azərbaycan dövlətçiliyinin tarixi ilə bağlı cəfəngiyyatlar, heç bir əsası olmayan fikirlər tirajlamağa başlayıblar, bu isə Qorbaçov tərəfindən dəstəklənib. “Bu cəfəngiyyat yeni uydurulmayıb, erməni tarixçiləri bu çürük fikirləri çoxdan yaymağa başlayıblar, bu barədə məqalələr, kitablar yazıblar.
Azərbaycanlıların, türklərin Cənubi Qafqaza “gəlmə olduğu” iddiası ilə erməni tarixçiləri uzun illərdir cəfəngiyyatlar ixrac edirlər. Özləri Cənubi Qafqaza gəlmə olan və burada tarixən heç bir dövləti olmayan, yalnız 1918-ci ildə Azərbaycan ərazilərində özlərinə dövlət quran ermənilər öz adlarını bizə qoymaq istəyirlər. Bununla da özlərinin bu torpaqlara gəlmə olduqlarını gizlətməyə çalışırlar. O vaxt, yaxşı yadımdadır, azərbaycanlılar və ermənilərlə bağlı Moskva tarixi arayış istəmişdi. Azərbaycandan o arayışı Tarix İnstitutunun direktoru hazırlamışdı. Ermənistan tərəfindən isə tarixçi Muradyan 60 səhifəlik tarixi arayış hazırlayıb Qorbaçova təqdim etmişdi. Qorbaçov da Mərkəzi Komitədə Arakelyanın, Ambarsumyanın və başqa ermənilərin iştirakı ilə Muradyanın 60 səhifəlik “tarixi arayış”ını müzakirə edib. Yəni demək istəyirəm ki, Azərbaycan dövləti, Azərbaycan xalqı barədə həqiqətə uyğun olmayan məsələlərin dövriyyəyə buraxılmasına hələ Sovet dövründən başlanmışdı, təbii ki, rəsmi Moskvanın, Qorbaçovun dəstəyilə.
Hətta akademik Babkin Arutunyan elə cəfənglər yazmışdı ki, adam məəttəl qalırdı. O yazırdı ki, “nə Albaniya olub, nə də Azərbaycan”. Əlbəttə, bu, cavabsız qalmazdı və mən ona cavab olaraq kitab yazdım, onun iddialarını alt-üst etdim.
Erməni tarixçiləri həmişə bu cəfəng fikri yazıblar, o vaxt erməni dilində yazdıqları üçün çoxlarının bundan xəbəri yox idi. Amma o mətnlər rus dilinə çevrildikdən sonra onların yazdıqları hər kəsə məlum olur” - deyə Q.Hacıyev qeyd etdi.
Aynur Əzimzadə: “Zəngəzur dəhlizinin açılması məsələsinin gündəmdə olduğu bir vaxtda bu cəfəngiyyatın ortaya atılması təsadüfi deyil”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin kiçik elmi işçisi, ermənişünas Aynur Əzimzadə məsələni daha çox başqa amillərlə bağlayır. A.Əzimzadə hesab edir ki, ermənilərin “Azərbaycan 1920-ci ildə yaranıb” təxribatının arxasında daha təhlükəli məqamlar durur. “Zəngəzur dəhlizinin açılması məsələsinin gündəmdə olduğu bir vaxtda bu cəfəngiyyatın ortaya atılması təsadüfi deyil. Bu təxribat məqsədli şəkildə yayılır. Burada söhbət ondan gedir ki, Azərbaycan öz torpaqlarını geri tələb edə bilər. İrəvan ermənilərə müvəqqəti paytaxt kimi 1918-ci ilin 29 may tarixində verilib. Artıq mayın 29-u yaxınlaşır. Ermənistan belə rəy yaratmaq istəyir ki, 1918-ci ildə Azərbaycan Xalq Cümhuriyyəti “yox imiş”. Bu da səbəbsiz deyil. Bütün beynəlxalq müqavilələrin öz bitmə müddəti var. Bizim ermənilərə İrəvanı verməyimizdən artıq bir əsr keçib. Beynəlxalq müqavilələrə görə isə biz İrəvanı da, başqa torpaqlarımızı da tələb edə bilərik. Düzdür, artıq dünya xəritəsi qurulub və s. Amma bu ərazilər dünyada Azərbaycanın tarixi ərazisi kimi bilinir. Ermənilər isə bunu gözardı etmək istəyirlər ki, guya “AXC 1920-ci ildə yaranıb” və onlar İrəvanın onlara paytaxt kimi verilməsi üçün Xalq Cümhuriyyətinin Milli Şurası ilə müqavilə bağlamayıblar, bu ərazilər “elə onların olub”. Bu isə absurddur. Azərbaycan Xalq Cümhuriyyəti elan ediləndə heç Ermənistan yox idi, bu ölkə bizim ərazidə qurulub. Onlar 1918-ci ildə İrəvanın ermənilərə verilməsi ilə bağlı beynəlxalq müqaviləni ört-basdır etmək istəyirlər. Yəni guya bu ərazilər parçalanmış ərazilər olub onlar da burada özlərinə “dövlət” qurublar. Əlbəttə, bütün bunlar kökündən yanlış məsələdir. Zaqafqaziya Seymi 1918-ci ilin mayında dağıldı və ondan sonra Azərbaycan Respublikası, Gürcüstan Respublikası, Azərbaycan ərazilərində isə Ararat Respublikası yarandı. Yəni ermənilər bu həqiqəti inkar etmək istəyiblər, amma bu alınmayacaq” - deyə A.Əzimzadə qeyd etdi.
İradə SARIYEVA
